ଭାରତୀୟ ପିଚ୍‌କୁ ସମାଲୋଚନା କଲେ ହରଭଜନ ସିଂହ: କହିଲେ, ଆର୍ ଅଶ୍ୱିନଙ୍କ ପରେ ଭଲ ଅଫ୍ ସ୍ପିନର ନାହାନ୍ତି

ନୂଆଦିଲ୍ଲୀ: ଘରୋଇ ଟେଷ୍ଟ ମ୍ୟାଚ୍ ଖେଳିବାକୁ ଭାରତରେ ତିଆରି କରାଯାଉଥିବା ପିଚ୍‌ଗୁଡ଼ିକ ଟିମ୍ ଇଣ୍ଡିଆର ପୂର୍ବତନ ଅଫ ସ୍ପିନର ହରଭଜନ ସିଂହ ସମାଲୋଚନା କରିଛନ୍ତି। ଅଧିକ ଟର୍ଣ୍ଣ ହେଉଥିବା ପିଚ୍‌ଗୁଡ଼ିକ ଦେଶର ଉଭୟ ବ୍ୟାଟର ଓ ବୋଲରଙ୍କ ଗ୍ରୋଥରେ ବାଧା ସୃଷ୍ଟି କରିଛି। ନିକଟରେ ଶେଷ ହୋଇଥିବା ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜ୍ରେ ଭାରତ ୨-୦ରେ ପରାସ୍ତ ହେବା ପରେ ହରଭଜନଙ୍କର ଏଭଳି ମନ୍ତବ୍ୟ ଆସିଛି। ତେଣୁ ଏବେ ସମୟ ଆସି ଯାଇଛି, ଅଧିକ ଟର୍ଣ୍ଣ ହେଉଥିବା ପିଚଗୁଡ଼ିକ ଠାରୁ ଟିମ୍ ପ୍ରଥମ ଦିନରୁ ଦୂରେଇ ରହିବା ଉଚିତ ବୋଲି ହରଭଜନ କହିଛନ୍ତି।

ପିଟିଆଇକୁ ସାକ୍ଷାତ୍କାର ଦେଇ ହରଭଜନ ଆହୁରି କହିଛନ୍ତି ଯେ ଆମେ ଯେଉଁପ୍ରକାର ପିଚ୍ରେ ଖେଳୁଛୁ, ସେଠି କାହାକୁ ବୋଲର ବନାଇବାର ଆବଶ୍ୟକତା ନାହିଁ। କାରଣ ପ୍ରତ୍ୟେକ ବଲ ଟର୍ଣ୍ଣ ହେଉଛି ନହେଲେ କିଛିଟା ସିଧା ଯାଉଛି। ଜଣେ ବୋଲରଙ୍କୁ ଭଲ ବୋଲର ସେତେବେଳେ କୁହାଯିବ ଯେତେବେଳେ ସେ ଏକ ଭଲ ପିଚ୍ରେ ୱିକେଟ ନେଇପାରିବେ।

ଭାରତର ବୋଲିଂକୁ ନେଇ ହରଭଜନ କହିଛନ୍ତି ଯେ ଭାରତ ଏକ ଦଶନ୍ଧୀରୁ ଅଧିକ ସମୟ ଧରି ଦ୍ରୁତ ଟର୍ଣ୍ଣିଂ ବୋଲିଂ ଉପରେ ନିର୍ଭର କରୁଥିଲା। ଏଥିରେ ଖେଳାଳିଙ୍କ ସର୍ବାଙ୍ଗୀନ ବିକାଶ କମି ଯାଇଛି। ନିକଟରେ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରେ ଭାରତ ଯେଉଁଭଳି ୨-୨ରେ ସିରିଜ ଡ୍ର ରଖିଲା ତାର ଉଦ୍ଧାହରଣ ଦେଇଛନ୍ତି ହରଭଜନ। ଭାରତୀୟ ବ୍ୟାଟରଙ୍କୁ ବି ନିଜ ଦେଶରେ ଫେୟର ସର୍ଫେସ୍ରେ ଖେଳିବାକୁ ଭଲ ସୁଯୋଗ ମିଳିବା ଉଚିତ୍ ବୋଲି ସେ କହିଛନ୍ତି।

ଦଶନ୍ଧିରୁ ଅଧିକ ସମୟ ହେଲା ସେହି ପିଚ୍‌ଗୁଡ଼ିକରେ ଖେଳାଯାଉଛି ଯେଉଁଠାରେ (ଭାରତୀୟ) କ୍ରିକେଟ୍ର ସାମଗ୍ରିକ ବିକାଶ ହୋଇପାରୁ ନାହିଁ। ତେଣୁ ବର୍ତ୍ତମାନ ସମୟ ଆସି ଯାଇଛି, ଆମକୁ ଭଲ କ୍ରିକେଟ୍ ପିଚ୍‌ରେ ମ୍ୟାଚ୍ ଖେଳିବାକୁ ପଡ଼ିବ ବୋଲି ହରଭଜନ କହିଛନ୍ତି।

କୋଲକାତା ଟେଷ୍ଟରେ ଶୁଷ୍କ ଓ ଟର୍ଣ୍ଣିଂ ପିଚ୍ ଉପରେ ମ୍ୟାଚ୍ ତିନି ଦିନ ମଧ୍ୟରେ ଶେଷ ହେବା ନେଇ ମଧ୍ୟ ଚିନ୍ତା ପ୍ରକାଶ କରିଛନ୍ତି ହରଭଜନ। ସେ କହିଛନ୍ତି ଯେ ଏପରି ପିଚ୍ ଟେଷ୍ଟ କ୍ରିକେଟ୍କୁ ପ୍ରୋତ୍ସାହନ ଦେବାରେ ଭାରତ ଦାବିକୁ ଦୁର୍ବଳ କରୁଛି। ସେ ଚେତାବନୀ ଦେଇଛନ୍ତି ଯେ ଅତ୍ୟଧିକ ଏକପାଖିଆ ୱିକେଟ୍ ସବୁଠାରୁ ଲମ୍ବା ଫର୍ମାଟର ଭବିଷ୍ୟତ ପାଇଁ ଭଲ ହୋଇନଥାଏ।

ପିଚ୍ ସମସ୍ୟା ପରେ ଭାରତୀୟ ଟିମରେ ସ୍ପିନରଙ୍କୁ ନେଇ ମଧ୍ୟ ଆଲୋଚନା କରିଛନ୍ତି ହରଭଜନ। ବିଶେଷ କରି ଆର୍ ଅଶ୍ୱିନଙ୍କ ଅବସର ପରେ ଭାରତ ସ୍ପିନ ବୋଲିଂରେ ସଂଘର୍ଷ କରୁଛି ବୋଲି ସେ କହିଛନ୍ତି। ଘରୋଇ ପିଚ୍ ଖେଳାଳିଙ୍କ ପାଇଁ ପରିଚିତ ଥିଲେ ବି ଦକ୍ଷିଣ ଆଫ୍ରିକୀୟ ବୋଲରଙ୍କ ତୁଳନାରେ ଆମ ଟିମ୍ କମ ୱିକେଟ୍ ନେଇଛି ବୋଲି ସେ କହିଛନ୍ତି। ଟେଷ୍ଟ କ୍ରିକେଟରେ ଭାରତ ପାଖରେ ଭଲ ଡାହାଣହାତୀ ଅଫ୍ ସ୍ପିନର ଥିବା ଦେଖାଯାଉ ନାହିଁ ବୋଲି ସେ ପିଟିଆଇକୁ କହିଛନ୍ତି।

ତେବେ ୱାଶିଂଟନ ସୁନ୍ଦରଙ୍କ ପାଖରେ ଯଦିଓ ସାମର୍ଥ୍ୟ ରହିଛି ତେବେ ତାଙ୍କ ଉପରେ ଅଧିକ ଚାପର ଆବଶ୍ୟକତା ରହିଛି, ତେବେ ଯାଇ ତାଙ୍କର ସ୍ପେଶିଆଲିଟି ସାମ୍ନାକୁ ଆସିପାରିବ ବୋଲି ହରଭଜନ କହିଛନ୍ତି। ଏ ନେଇ ସେ କହିଛନ୍ତି “ମୁଁ ଭାବୁଛି ୱାଶିଂଟନ ସୁନ୍ଦରଙ୍କ ପାଖରେ ସେ ସାମର୍ଥ୍ୟ ରହିଛି, କିନ୍ତୁ ଆମକୁ ତାଙ୍କୁ ଅଧିକ ବୋଲିଂ କରାଇବାକୁ ପଡ଼ିବ। ଟିମ୍ ମଧ୍ୟରୁ ଜଣେ ଭଲ ବୋଲର ତିଆରି କରିବା ପାଇଁ ତାଙ୍କୁ ଟେଷ୍ଟ ମ୍ୟାଚ୍ରେ ୩୦-୩୫ ଓଭର ବୋଲିଂ କରାଇବାକୁ ପଡ଼ିବ।”

ବର୍ତ୍ତମାନ ଭାରତୀୟ ଟିମ୍ ଜଣେ ଭଲ ଅଫ୍‌ ସ୍ପିନର ଓ ଭଳ ପିଚ୍ ଖୋଜୁଥିବା ବେଳେ ଟିମରେ ସାଂଗଠନିକ ପରିବର୍ତ୍ତନର ଆବଶ୍ୟକତା ରହିଛି ବୋଲି ହରଭଜନ ବିଶ୍ୱାସ କରନ୍ତି।