ଗୋଟିଏ ଜିଦ୍ ବଦଳାଇ ଦେଲା ଭାଗ୍ୟ, ରାତାରାତି କୋଟିପତି ପାଲଟିଲା ୧୧ ବର୍ଷର ଆରବ

ନୂଆଦିଲ୍ଲୀ ୦୩।୧୧; ଭାଗ୍ୟ କେତେବେଳେ କାହାର ବଦଳିବ ତାହା କେହି ଜାଣନ୍ତି ନାହିଁ । ଆଜି ଯିଏ କୋଟିପତି ତ କାଲି ଗରିବ , ଆଜି ଯିଏ ଗରିବ ତ କାଲି କୋଟିପତି ମଧ୍ୟ ହୋଇପାରେ । ଭାଗ୍ୟ କେତେ ବେଳେ ବି ୟୁଟର୍ଣ୍ଣ ନେଇ ପାରେ। ଯାହା ଫଳରେ ଆପଣ ରାତାରାତି କୋଟିପତି ପାଲଟିଥାଆନ୍ତି । ଆପଣଯକ ଉପରେ ଟଙ୍କା ବର୍ଷା ହୁଏ । ଠିକ୍‌ ସେହିଭଳି ଏକ ଘଟଣା ପଞ୍ଜାବର ଜଣେ କୁନି ପୁଅ ସହ ଘଟିଛି । ଯିଏ କି ନିଜ ପଇସାର ମୂଲ୍ୟ ବୁଝୁ ନଥିବା ବୟସରେ ପାଲଟି ଯାଇଛନ୍ତି କୋଟିପତି ।

ପଞ୍ଜାବର ଲୁଧିଆନାର ୧୧ ବର୍ଷୀୟ ଆରବ ରାତାରାତି ପାଲଟି ଯାଇଛନ୍ତି କୋଟିପତି । ଦୀପାବଳି ପୂର୍ବରୁ କିଣାଯାଇଥିବା ପଞ୍ଜାବ ଷ୍ଟେଟ୍ ଡିଅର୍ ଦିୱାଲି ବମ୍ପର ଲଟେରୀ ଏହି କୁନି ପୁଅକୁ କୋଟିପତି କରିଦେଇଛି । ବଦଳି ଯାଇଛି ଆରବଙ୍କ ଭାଗ୍ୟ।  ୧ କୋଟି ଲଟେରି ଜିତିବା ପରେ ତାଙ୍କ ପରିବାରରେ ଖୁସି ଲହରି ଖେଳି ଯାଇଛି । ସୂଚନା ମୁତାବକ ଆରବ ହୋସିଆରପୁରର ବାସିନ୍ଦା । ସେ ବର୍ତ୍ତମାନ ତାଙ୍କ ମାମୁଁ କରଣଙ୍କ ସହ ଲୁଧିଆନାର ହାଇବୋୱାଲରେ ରୁହନ୍ତି । କିଛି ଦିନ ପୂର୍ବରୁ ଆରବ ତାଙ୍କ ମାମୁଁଙ୍କ ସହ ବଜାର ଯାଇଥିଲେ । ଲଟେରୀ ଦୋକାନରେ ଭିଡ଼ ଦେଖି ସେ ଟିକେଟ୍ କିଣିବାକୁ ଜିଦ୍ କରିଥିଲେ । ପ୍ରଥମେ ତାଙ୍କ ମାମୁଁ ମନା କରିଥିଲେ, କିନ୍ତୁ ଆରବ ଜିଦ୍ କରିବାରୁ ତାଙ୍କୁ ଶେଷରେ ଟିକେଟ୍ କିଣିବାକୁ ରାଜି ହୋଇଥିଲେ ।

ଶୁକ୍ରବାର ରାତିରେ ଲଟେରୀ ଡ୍ର ଫଳାଫଳ YouTube ରେ ପୋଷ୍ଟ କରାଯାଇଥିଲା । କରଣ ଟିକେଟ୍ ନମ୍ବର ସହିତ ମେଳ ଖାଇଲେ ଏବଂ ଦେଖିଲେ ଯେ ଆରବଙ୍କ ନାମରେ କିଣାଯାଇଥିବା ଟିକେଟ୍ ୧ କୋଟି ଟଙ୍କାର ପୁରସ୍କାର ଜିତିଛି । ଏହା ପରେ ପରିବାରରେ ଖୁସି କହିଲେ ନସରେ । ଦୋକାନ ବାହାରେ ଢୋଲ ବଜାଯାଇଥିଲା ଏବଂ ମିଠା ବଣ୍ଟନ କରାଯାଇଥିଲା । ଲୋକମାନେ ଆରବ ଓ ତାଙ୍କ ପରିବାରକୁ ଅଭିନନ୍ଦନ ଜଣାଉଛନ୍ତି ।