'ଭାରତ ଯେକୌଣସି ଯୁଦ୍ଧ ପାଇଁ ପ୍ରସ୍ତୁତ...ପାକିସ୍ତାନକୁ କଡ଼ା ଚେତାବନୀ ଦେଲେ ଜେନେରାଲ ଦ୍ୱିବେଦୀ

ନୂଆଦିଲ୍ଲୀ ୧୭/୧୧: ସାବଧାନ ଶତ୍ରୁ । ଆଉ ନୁହେଁ । ଏଥରେ ଇଟାର ଜବାବ ଇଟାରେ । ଯେ କୌଣସି ଯୁଦ୍ଧ ପାଇଁ ଭାରତ ତୟାର । କହିଲେ 'ଅପରେସନ ସିନ୍ଦୂର ଥିଲା ଟ୍ରେଲର । ବାକି ଅଛି ପୁରା ଫିଲ୍ମ । ଯଦି କେହି ଆତଙ୍କୀଙ୍କୁ ପ୍ରୋତ୍ସାହିତ କରେ, ଦେବୁ କଡ଼ା ଜବାବ । ଏମିତିକି ସୁଯୋଗ ମିଳିଲେ, ପଡ଼ୋଶୀକୁ କିପରି କରାଯାଏ ବ୍ୟବହାର ଶିଖାଇ ଦେବୁ । ଏମିତି କହି ପଡୋଶୀ ଦେଶକୁ କଡ୍ଡା ଚେତାବନୀ ଦେଇଛନ୍ତି ଜେନେରାଲ ଦ୍ୱିବେଦୀ । ସ୍ପଷ୍ଟ ଭାବରେ କହିଛନ୍ତି ଯେ ଭାରତ ଯେକୌଣସି ଲମ୍ବା ଯୁଦ୍ଧ ପାଇଁ ପ୍ରସ୍ତୁତ ।

ଶତ୍ରୁ ପାକିସ୍ତାନ ହେଉ କିମ୍ବା ଏହାର ସମର୍ଥିତ ଆତଙ୍କବାଦୀ, ପ୍ରତ୍ୟେକ ବିପଦର ଉପଯୁକ୍ତ ଜବାବ ଦେବାର କ୍ଷମତା ସେନାର ଅଛି ।ଜେନେରାଲ ଦ୍ୱିବେଦୀ କହିଛନ୍ତି, ପାକିସ୍ତାନ ଗୁପ୍ତ ଭାବରେ ଆତଙ୍କବାଦକୁ ଯେତେ ପ୍ରୋତ୍ସାହିତ କରୁନା କାହିଁକି, ଭାରତୀୟ ସେନା ଏହାର ପ୍ରତ୍ୟେକ ଗତିବିଧି ଉପରେ ନଜର ରଖିଛି । ସେ ଆହୁରି ମଧ୍ୟ କହିଛନ୍ତି ଯେ ଗତ ପାଞ୍ଚ ବର୍ଷ ମଧ୍ୟରେ କାଶ୍ମୀରରେ ଆତଙ୍କବାଦ ଯଥେଷ୍ଟ ହ୍ରାସ ପାଇଛି । ନିହତ ଆତଙ୍କବାଦୀଙ୍କ ମଧ୍ୟରୁ ୬୧ପ୍ରତିଶତ ପାକିସ୍ତାନୀ ଥିଲେ । ଯାହା ପ୍ରମାଣ କରୁଛି ଯେ ସୀମା ପାରରୁ ଆତଙ୍କବାଦ ପଠାଇବାର ଷଡ଼ଯନ୍ତ୍ର ଜାରି ରହିଛି ।

ଜମ୍ମୁ ଏବଂ କାଶ୍ମୀରର ପରିସ୍ଥିତି ଦ୍ରୁତ ଗତିରେ ବଦଳୁଛି, ଏବଂ ଆଜିର ଯୁବପିଢ଼ି ଭାରତ ସହିତ ଏକ ଭବିଷ୍ୟତ ଦେଖୁଛନ୍ତି ବୋଲି ଦ୍ୱିବେଦୀ କହିଛନ୍ତି ।ଅପରେସନ୍ ସିନ୍ଦୂର ବିଷୟରେ ଉଲ୍ଲେଖ କରି ଜେନେରାଲ୍ ଦ୍ୱିବେଦୀ କହିଥିଲେ, "ଏହା କେବଳ ଏକ ଟ୍ରେଲର ଥିଲା । ଆବଶ୍ୟକ ହେଲେ, ପାକିସ୍ତାନକୁ ଶିଖାଯିବ ଯେ ଏକ ଦାୟିତ୍ୱବାନ ଦେଶ ତା'ର ପଡ଼ୋଶୀ ସହିତ କିପରି ବ୍ୟବହାର କରେ ।" ସେ ଏହା ମଧ୍ୟ ସ୍ପଷ୍ଟ କରିଥିଲେ ଯେ ଭାରତ ପ୍ରକାରର ପରମାଣୁ ବ୍ଲାକମେଲ୍କୁ ଭୟ କରେ ନାହିଁ ଏବଂ ଭାରତୀୟ ସେନା ଯେକୌଣସି ପରିସ୍ଥିତି ପାଇଁ ପ୍ରସ୍ତୁତ, ଯୁଦ୍ଧ ଚାରି ମାସ ହେଉ କି ଚାରି ବର୍ଷ ।

ଚୀନ୍ ସହ ସମ୍ପର୍କ ବିଷୟରେ, ସେ କହିଛନ୍ତି, ପୂର୍ବ ଲଦାଖରେ ଉତ୍ତେଜନା ହ୍ରାସ ପରେ ଦୁଇ ଦେଶର ସମ୍ପର୍କ ସ୍ୱାଭାବିକ ଆଡକୁ ଗତି କରୁଛନ୍ତି । ରାଜନୈତିକ ନେତୃତ୍ୱ ମଧ୍ୟରେ ଆଲୋଚନା ବୃଦ୍ଧି ଯୋଗୁଁ ସେଠାରେ ପରିସ୍ଥିତି ଦ୍ରୁତ ଗତିରେ ସୁଧାର ଆସିଛି । "ଯେତେବେଳେ କୂଟନୀତି ଏବଂ ରାଜନୈତିକ ଦିଗ ଏକାଠି ହୁଏ, ପ୍ରତିରକ୍ଷା କୂଟନୀତି ସ୍ମାର୍ଟ ଶକ୍ତିରେ ପରିଣତ ହୁଏ ।

ସେହିପରି ଜେନେରାଲ ଦ୍ୱିବେଦୀ ମଣିପୁର ହିଂସା ଉପରେ ମଧ୍ୟ ମତାମତ ଦେଇଥିଲେ । ସେ କହିଛନ୍ତି, ମଣିପୁର ତାଙ୍କ ପାଇଁ ସ୍ୱର୍ଗ ସଦୃଶ ଏବଂ ରାଷ୍ଟ୍ରପତି ଶାସନ ଲାଗୁ ହେବା ପରେ ପରିସ୍ଥିତି ସ୍ୱାଭାବିକ ହେବାକୁ ଯାଉଛି । ସେ ଆଶା ପ୍ରକାଶ କରିଥିଲେ ଯେ ଯଦି ସେଠାକାର ସମ୍ପ୍ରଦାୟଗୁଡ଼ିକ ସେମାନଙ୍କର ମତଭେଦ ଦୂର କରନ୍ତି, ତେବେ ପରିସ୍ଥିତିରେ ଆହୁରି ଉନ୍ନତି ହେବ ।