ସେମାନେ କଥା ହେବାକୁ ଚାହୁଁଛନ୍ତି, କିନ୍ତୁ ବିଳମ୍ବ ହୋଇସାରିଛି...ଇରାନ ଯୁଦ୍ଧକୁ ନେଇ ଟ୍ରମ୍ପଙ୍କ ବଡ଼ ଦାବି

ନୂଆଦିଲ୍ଲୀ: ଇରାନ ଉପରେ ଇସ୍ରାଏଲ୍ ଏବଂ ଆମେରିକା ମିଳିତ ଆକ୍ରମଣ ମଧ୍ୟରେ ଡୋନାଲ୍ଡ ଟ୍ରମ୍ପ ଏକ ବଡ଼ ଦାବି କରିଛନ୍ତି। ସେ କହିଛନ୍ତି, ସେମାନଙ୍କର ବାୟୁସେନା, ପ୍ରତିରକ୍ଷା ପ୍ରଣାଳୀ, ନୈସେନା ଏବଂ ଶୀର୍ଷ ନେତୃତ୍ବ ସବୁ ଖତମ । ଏବେ ସେମାନେ ମୋ ସହିତ କଥା ହେବାକୁ ଚାହୁଁଛନ୍ତି, କିନ୍ତୁ ଏବେ ବହୁତ ଡେରି ହୋଇଗଲାଣି । ଟ୍ରମ୍ପଙ୍କ ଏଭଳି ମନ୍ତବ୍ୟ, ମଧ୍ୟପ୍ରାଚ୍ୟରେ ଜାରି ଯୁଦ୍ଧର ତୀବ୍ରତା ବୃଦ୍ଧି କରିପାରେ । ଆମେରିକା ଏବେ ଯୁଦ୍ଧ ସମାପ୍ତ କରିବା ପକ୍ଷରେ ନଥିବା ଜଣାପଡ଼ୁଛି । ତେବେ ଇରାନ୍‌ ମଧ୍ୟ ପ୍ରତିଜବାବ ଦେଉଛି । ଇରାନ୍‌ ଯୁଦ୍ଧ ଚତୁର୍ଥ ଦିନରେ ପ୍ରବେଶ କରିଛି । ହେଲେ ଏହାର ତୀବ୍ରତା ବୃଦ୍ଧି ପାଇବାରେ ଲାଗିଛି ।

​​​​​​​

ଆମେରିକା ଏବଂ ଇସ୍ରାଏଲ ଫେବୃଆରୀ ୨୮ ରେ ଇରାନ ବିରୁଦ୍ଧରେ ସେମାନଙ୍କର ମିଳିତ ସାମରିକ ଅଭିଯାନ ଜାରି ରଖିଛନ୍ତି। ଏହି ସଂଘର୍ଷରେ ଶହ ଶହ ଲୋକ ପ୍ରାଣ ହରାଇଛନ୍ତି, ଯେଉଁଥିରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନି ଏବଂ ତେହେରାନର ଅନେକ ଶୀର୍ଷ ରାଜନୈତିକ ଓ ସାମରିକ ନେତା ମଧ୍ୟ ସାମିଲ । ମଙ୍ଗଳବାର ଠାରୁ ଆମେରିକା ଏବଂ ଇସ୍ରାଏଲ ଦ୍ୱାରା ଲଗାତାର ଆକ୍ରମଣ ସତ୍ତ୍ୱେ ଇରାନ ପ୍ରତିଆକ୍ରମଣ କରୁଛି । ଇରାନ ପଡ଼ୋଶୀ ଆରବ ଦେଶଗୁଡ଼ିକରେ ଥିବା ଅନେକ ଆମେରିକୀୟ ବେସ୍‌ ଉପରେ କ୍ଷେପଣାସ୍ତ୍ର ଏବଂ ଡ୍ରୋନ ମାଡ଼ କରୁଛି।

ଇରାନର ଏକ ଡ୍ରୋନ୍ ସାଉଦି ଆରବରେ ଥିବା ଆମେରିକୀୟ ଦୂତାବାସରେ ମାଡ଼ ହୋଇଛି ।  ଫଳରେ କୋଠାର ବହୁତ କ୍ଷତି ହୋଇଛି । ପୂର୍ବରୁ କୁଏତରେ ଥିବା ମିଶନ ଉପରେ ମଧ୍ୟ ଆକ୍ରମଣ କରାଯାଇଥିଲା। ଇରାନ ପଡ଼ୋଶୀ ଆରବ ଦେଶଗୁଡ଼ିକ ବିରୁଦ୍ଧରେ ପ୍ରାୟତଃ କ୍ଷେପଣାସ୍ତ୍ର ଏବଂ ଡ୍ରୋନ୍ ମାଡ଼ କରିଆସୁଛି। ଏହା ହର୍ମୁଜ୍ ପ୍ରଣାଳୀ ଦେଇ ଯାଉଥିବା ଜାହାଜଗୁଡ଼ିକୁ ମଧ୍ୟ ଅବରୋଧ କରୁଛି । ଏହି ପ୍ରଣାଳୀ ଦେଇ ବିଶ୍ବର ୨୦ ପ୍ରତିଶତ ତୈଳ ଏବଂ ପ୍ରାକୃତିକ ଗ୍ୟାସ ପରିବହନ ହୋଇଥାଏ ।

ଇରାନ ରେଡ କ୍ରିସେଣ୍ଟ ସୋସାଇଟି ଅନୁଯାୟୀ, ଆମେରିକା-ଇସ୍ରାଏଲ ଆକ୍ରମଣରେ ଇରାନରେ ପ୍ରାୟ ୭୮୭ ଜଣଙ୍କର ମୃତ୍ୟୁ ହୋଇଛି। ଇରାନ୍‌ର ମିସାଇଲ୍‌ ମାଡ଼ରେ ଇସ୍ରାଏଲରେ ବିଭିନ୍ନ ସ୍ଥାନ କ୍ଷତିଗ୍ରସ୍ତ ହୋଇଛି । ଇସ୍ରାଏଲରେ ୧୧ ଜଣଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ଇରାନ ସମର୍ଥିତ ଆତଙ୍କବାଦୀ ଗୋଷ୍ଠୀ ହିଜବୁଲ୍ଲା ମଧ୍ୟ ଇସ୍ରାଏଲ ଉପରେ ଆକ୍ରମଣ କରିଛି । ସେପଟେ ଇସ୍ରାଏଲର ପ୍ରତିଶୋଧମୂଳକ ଆକ୍ରମଣରେ ଲେବାନନରେ ୫୨ ଜଣ ଲୋକ ପ୍ରାଣ ହରାଇଛନ୍ତି।