ନ୍ୟାୟପାଳିକାକୁ ସମ୍ମାନ, ଦାୟୀ ଲୋକଙ୍କ ଉପରେ ହେବ ଆକ୍ସନ; NCERT ବିବାଦରେ ମୁହଁ ଖୋଲିଲେ ଶିକ୍ଷା ମନ୍ତ୍ରୀ

ନୂଆଦିଲ୍ଲୀ: ଏନସିଇଆରଟିର ଅଷ୍ଟମ ଶ୍ରେଣୀ ପାଠ୍ୟ ପୁସ୍ତକରେ ନ୍ୟାୟପାଳିକାରେ ଦୁର୍ନୀତି ଉପରେ ଏକ ଅଧ୍ୟାୟ ଯୋଡ଼ା ଯିବା ମାମଲାରେ ସଂପୂର୍ଣ୍ଣ ଭାବେ ବ୍ୟାକଫୁଟରେ କେନ୍ଦ୍ର ସରକାର। ସୁପ୍ରିମକୋର୍ଟ ମାମଲାକୁ ନେଇ ସରକାରଙ୍କୁ କଡ଼ା ତାଗିଦ କରି ସାରିଥିବା ବେଳେ ଅଦାଲତରେ କ୍ଷମା ମାଗି ସାରିଛନ୍ତି କେନ୍ଦ୍ର ସରକାର। ଏହି କ୍ରମରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମାମଲା ଉପରେ ପ୍ରତିକ୍ରିୟା ଦେଇଛନ୍ତି। ସେ ଏନସିଇଆରଟିର ପାଠ୍ୟ ପୁସ୍ତକରେ ବିବାଦୀୟ ଅଧ୍ୟାୟକୁ ଯୋଡ଼ିବା ନେଇ ଦୁଃଖ ପ୍ରକାଶ କରିଛନ୍ତି। ବିବାଦୀୟ ଅଂଶକୁ ଡ୍ରାଫ୍ଟ କରିଥିବା ଦାୟୀ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଭରସା ଦେଇଛନ୍ତି।

ସେ ଏହା ମଧ୍ୟ କହିଛନ୍ତି, ସରକାର ନ୍ୟାୟପାଳିକାର ପୂରା ସମ୍ମାନ କରିଥାଏ। ନ୍ୟାୟପାଳିକାକୁ ଅପମାନିତ କରିବାର କୌଣସି ଉଦ୍ଦେଶ୍ୟ ନାହିଁ। ଆଜି ମାମଲା ଉପରେ ଶୁଣାଣି କରି ସୁପ୍ରିମକୋର୍ଟ କହିଥିଲେ ଯେ, ନ୍ୟାୟପାଳିକାକୁ ବଦନାମ କରିବା ପାଇଁ ଏହା ଏକ ସୁନିୟୋଜିତ ଷଡ଼ଯନ୍ତ୍ର ପରି ଲାଗୁଛି। ଏହା ସହ ଅଷ୍ଟମ ଶ୍ରେଣୀର ଉକ୍ତ ଏନସିଇଆରଟିର ପୁସ୍ତକ ଉପରେ ସଂପୂର୍ଣ୍ଣ ଭାବେ ରୋକ୍ ଲଗାଇଛନ୍ତି। ସମସ୍ତ କପି, ଫିଜିକାଲ୍ ଓ ଡିଜିଟାଲ୍ ଜବତ କରିବାକୁ କୋର୍ଟ ଆଦେଶ ମଧ୍ୟ ଦେଇଛନ୍ତି।

Also read: ବିକିନି ପିନ୍ଧା ଦୁଇ ମହିଳାଙ୍କ ସହ ଷ୍ଟିଫେନ ହକିଙ୍ଗ, ଏପଷ୍ଟିନ ଫାଇଲର ନୂଆ ଫଟୋକୁ ନେଇ ଚାଞ୍ଚଲ୍ୟ

ଧର୍ମେନ୍ଦ୍ର ପ୍ରଧାନ କହିଛନ୍ତି, ଯାହା ଘଟି ଯାଇଛି ତାକୁ ନେଇ ମୁଁ ବହୁତ ଦୁଃଖିତ। ନ୍ୟାୟପାଳିକାକୁ ଅପମାନିତ କରିବାର କୌଣସି ଅଭିପ୍ରାୟ ନାହିଁ। ତଦନ୍ତ ହେବ, ଘଟଣା ପାଇଁ କିଏ ଦାୟୀ ତାହା ସ୍ଥିର କରାଯିବ। ଅଧ୍ୟାୟକୁ ଡ୍ରାଫ୍ଟ କରିବାରେ ସାମିଲ୍ ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଯେମିତି ଘଟଣା ବିଷୟରେ ଜାଣିଲୁ ତୁରନ୍ତ ପୁସ୍ତକର ବିତରଣ ଉପରେ ରୋକ୍ ଲଗାଇଛୁ।

କେନ୍ଦ୍ର ଶିକ୍ଷା ମନ୍ତ୍ରୀ ଜାମସେଦପୁରରେ ସାମ୍ବାଦିକଙ୍କ ସହ ଆଲୋଚନା ବେଳେ କହିଛନ୍ତି, ଭାରତ ପରି ଗଣତାନ୍ତ୍ରିକ ଦେଶରେ ନ୍ୟାୟପାଳିକା ସବୁଠୁ ଉପରେ ରହିଛି। ଆମେ ସମସ୍ତେ ଏହାର ବହୁତ ସମ୍ମାନ କରୁ। ଆମେ ଘଟଣାକୁ ବହୁତ ଗମ୍ଭୀରତାର ସହ ଗ୍ରହଣ କରିଛୁ। କୋର୍ଟଙ୍କ ନିର୍ଦ୍ଦେଶର ପାଳନ ହେବ। ପ୍ରଧାନ ଜାମସେଦପୁରରେ ଏକ ଉତ୍ସବରେ ଯୋଗ ଦେବା ପାଇଁ ଆସିଥିଲେ। ଏଥିରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଜଗନ୍ନାଥ ଆଧ୍ୟାତ୍ମିକ କେନ୍ଦ୍ରର ଶିଳାନ୍ୟାସ କରିଛନ୍ତି।

Also read: The Kerala Story 2 ସିନେମାକୁ ନେଇ କୋର୍ଟରେ ମହାଲଢ଼େଇ: ରିଲିଜ୍ ଉପରେ ରୋକ୍ ଲଗାଇଲେ ହାଇକୋର୍ଟ, ଚ୍ୟାଲେଞ୍ଜ କରିବେ ପ୍ରଯୋଜକ​​​​​​​