୮୫ତମ ଶତକ ମାରି ଇତିହାସ ରଚିଲେ କୋହଲି, ସେହ୍ଵାଗ-ପଣ୍ଟିଂଙ୍କୁ ପଛରେ ପକାଇଲେ

ଇନ୍ଦୋର: ବିରାଟ କୋହଲିଙ୍କ ପ୍ରଭାବଶାଳୀ ଫର୍ମ ଜାରି ରହିଛି। ଗତବର୍ଷ ଅଷ୍ଟ୍ରେଲିଆ ଗସ୍ତର ତୃତୀୟ ଦିନିକିଆରେ କୋହଲି ଫର୍ମ ପାଇଥିଲେ ଏବଂ ସେବେଠାରୁ ପ୍ରାୟ ପ୍ରତ୍ୟେକ ମ୍ୟାଚ୍‌ରେ ତାଙ୍କ ବ୍ୟାଟରୁ ରନ ବର୍ଷା ହୋଇ ଚାଲିଛି। ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜରେ ସର୍ବାଧିକ ରନ୍ ସ୍କୋରର୍ ବିରାଟ କୋହଲି ନ୍ୟୁଜିଲାଣ୍ଡ୍ ବିପକ୍ଷ ସିରିଜ୍ରେ ଏକ ଚମତ୍କାର ଆରମ୍ଭ କରିଥିଲେ। ସେ ପ୍ରଥମ ମ୍ୟାଚ୍ରେ ଅର୍ଦ୍ଧଶତକ ହାସଲ କରିଥିଲେ। ମାତ୍ର ୭ ରନ୍ ପାଇଁ ଶତକ ହାତଛଡ଼ା କରିଥିଲେ। ପରେ ସେ ଦ୍ଵିତୀୟ ମ୍ୟାଚରେ କେବଳ ୨୩ ରନ୍ କରିପାରିଥିଲେ, କିନ୍ତୁ ତୃତୀୟ ମ୍ୟାଚରେ ସେ ପୁଣି ଥରେ ବ୍ୟାଟରେ ଚମତ୍କାର ପ୍ରଦର୍ଶନ କରିଛନ୍ତି। ସେ ଇନ୍ଦୋରର ହୋଲକର ଷ୍ଟାଡିୟମରେ ଦମଦାର ଶତକ ହାସଲ କରିଛନ୍ତି।

ବିରାଟ କୋହଲି ମାତ୍ର ୯୧ ବଲରେ ଶତକ ହାସଲ କରିଛନ୍ତି। ଏହା ତାଙ୍କର ୫୪ତମ ଦିନିକିଆ ଶତକ। ଏହା ତାଙ୍କର ୮୫ତମ ଅନ୍ତର୍ଜାତୀୟ ଶତକ ମଧ୍ୟ ଥିଲା। ସର୍ବାଧିକ ଅନ୍ତର୍ଜାତୀୟ ଶତକରେ ସେ ସଚିନ୍ ତେନ୍ଦୁଲକରଙ୍କ ଠାରୁ ୧୫ ଶତକ ପଛରେ ଅଛନ୍ତି। ଯଦି କୋହଲି ଏହି ଗତିରେ ଶତକ ମାରି ଚାଲନ୍ତି, ତେବେ ସଚିନଙ୍କ ବିଶ୍ଵ ରେକର୍ଡ ଭାଙ୍ଗିଯାଇପାରେ।

ଅନ୍ତର୍ଜାତୀୟ କ୍ରିକେଟରେ ସର୍ବାଧିକ ଶତକ ହାସଲକାରୀ ବ୍ୟାଟର

ସଚିନ ତେନ୍ଦୁଲକର - ୧୦୦

ବିରାଟ କୋହଲି - ୮୫

ରିକି ପଣ୍ଟିଂ - ୭୧

କୁମାର ସାଙ୍ଗାକାରା - ୬୩

ଜ୍ୟାକ୍ସ କାଲିସ୍ - ୬୨

ଜୋ ରୁଟ୍ – ୬୦

ବିରାଟ କୋହଲି ୮ଟି ଚୌକା ଏବଂ ୨ଟି ଛକା ସହାୟତାରେ ନ୍ୟୁଜିଲାଣ୍ଡ ବିପକ୍ଷରେ ତାଙ୍କର ୭ମ ଦିନିକିଆ ଶତକ ହାସଲ କରିବାର କୃତିତ୍ୱ ହାସଲ କରିଛନ୍ତି। ଏହା ସହିତ ସେ ନ୍ୟୁଜିଲାଣ୍ଡ ବିପକ୍ଷରେ ସର୍ବାଧିକ ଦିନିକିଆ ଶତକ ହାସଲକାରୀ ବ୍ୟାଟର ହେବାର ରେକର୍ଡ କରି। ସେ ଏହି ମାଇଲଖୁଣ୍ଟ ହାସଲ କରିବା ପାଇଁ ବୀରେନ୍ଦ୍ର ସେହୱାଗ ଏବଂ ରିକି ପଣ୍ଟିଂଙ୍କ ଭଳି କିମ୍ବଦନ୍ତୀଙ୍କୁ ପଛରେ ପକାଇ ଦେଇଛନ୍ତି। ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଏହା ଭାରତୀୟ ମାଟିରେ କୋହଲିଙ୍କ ୪୧ତମ ଶତକ।

ନ୍ୟୁଜିଲାଣ୍ଡ ବିପକ୍ଷରେ ସର୍ବାଧିକ ଦିନିକିଆ ଶତକ ହାସଲକାରୀ ବ୍ୟାଟର

ବିରାଟ କୋହଲି - ୭ ଶତକ

ବୀରେନ୍ଦ୍ର ସେହୱାଗ - ୬ ଶତକ

ରିକି ପଣ୍ଟିଂ - ୬ ଶତକ

ସଚିନ ତେନ୍ଦୁଲକର - ୫ ଶତକ

ମହେଲା ଜୟବର୍ଦ୍ଧନେ - ୫ ଶତକ

କେବଳ ଏତିକି ନୁହେଁ, ବିରାଟ ଅନ୍ତର୍ଜାତୀୟ କ୍ରିକେଟରେ ନ୍ୟୁଜିଲାଣ୍ଡ ବିପକ୍ଷରେ ସର୍ବାଧିକ ଶତକ ମାରିଥିବା ବ୍ୟାଟର ମଧ୍ୟ ହୋଇଛନ୍ତି। ସେ ଜୋ ରୁଟ୍, ଜ୍ୟାକ୍ କାଲିସ୍ ଏବଂ ସଚିନ୍ ତେନ୍ଦୁଲକରଙ୍କ ରେକର୍ଡ ଭାଙ୍ଗିଛନ୍ତି। କୋହଲିଙ୍କ ପାଖରେ ଏବେ ନ୍ୟୁଜିଲାଣ୍ଡ ବିପକ୍ଷରେ ୧୦ଟି ଶତକ ଅଛି।