ଏଣେ ତେଣେ ବୁଲାଇଲା, ୪ ଶହ ମିଟର ପାଇଁ ନେଲା ୧୮ ହଜାର; ବିଦେଶୀ ପର୍ଯ୍ୟଟକଙ୍କୁ ଚୂନ ଲଗାଇ ଫସିଲେ ଟ୍ୟାକ୍ସି ଡ୍ରାଇଭର

ମୁମ୍ବାଇ: ଅତିଥି ଦେବୋ ଭବଃ । ଆତିଥ୍ୟ ପାଇଁ ନିଜର ଏକ ସ୍ବତନ୍ତ୍ର ପରିଚୟ ବଜାୟ ରଖିଥିବା ଭାରତକୁ ଆଜି କେତେ ଜଣ ଅସାଧୁ ବ୍ୟକ୍ତିଙ୍କ ଲାଗି ସମାଲୋଚନାର ଶିକାର ହେବାକୁ ପଡ଼ୁଛି । ମୁମ୍ବାଇ ଏୟାରପୋର୍ଟରେ ଏମିତି ଘଟଣା ଘଟିଛି, ଯାହାକୁ ନେଇ ସାରା ଭାରତରେ ଚର୍ଚ୍ଚା । ଜଣେ ଟ୍ୟାକ୍ସି ଡ୍ରାଇଭର ବିଦେଶୀ ମହିଳା ପର୍ଯ୍ୟଟକଙ୍କୁ ଚୂନ୍ ଲଗାଇ ଗିରଫ ହୋଇଛନ୍ତି । ସେ ଏମିତି କାଣ୍ଡ କରିଛନ୍ତି, ଜାଣିଲେ ଆପଣ ଆଶ୍ଚର୍ଯ୍ୟ ହେବେ । ସତରେ କ’ଣ ଏମିତି ମାନସିକତାର ଲୋକ, ଆମ ଦେଶ ଭାରତରେ ଅଛନ୍ତି ?

ମୁମ୍ବାଇର ଜଣେ ଟ୍ୟାକ୍ସି ଡ୍ରାଇଭର ଜଣେ ବିଦେଶୀ ପର୍ଯ୍ୟଟକଙ୍କଠାରୁ ମାତ୍ର ୪୦୦ ମିଟର ଯାତ୍ରା ପାଇଁ ୧୮,୦୦୦ ଟଙ୍କା ଆଦାୟ କରିଥିଲେ। ଏହି କଥିତ ଡକାୟତି ପରେ ଅଭିଯୁକ୍ତ ଡ୍ରାଇଭରଙ୍କୁ ଗିରଫ କରାଯାଇଛି । ଏହି ଘଟଣା ପୁଣି ଥରେ ପ୍ରମାଣିତ କରିଛି ଯେ, କିଛି ଲୋକ ଭାରତ ଆସୁଥିବା ବିଦେଶୀ ପର୍ଯ୍ୟଟକଙ୍କ ପ୍ରତି କିପରି ବ୍ୟବହାର କରନ୍ତି। କେତେକ ସମୟରେ, ବିଦେଶୀ ମହିଳାମାନଙ୍କୁ ଖୋଲାଖୋଲି ହଇରାଣ କରାଯାଏ, ଅନ୍ୟ କେତେକ ସମୟରେ, ସେମାନଙ୍କୁ ଜାଣିଶୁଣି ଠକି ଟଙ୍କା ଆଦାୟ କରାଯାଏ।

ମୁମ୍ବାଇ ପୋଲିସ କହିଛି ଯେ, ଦେଶରାଜ ଯାଦବ ନାମକ ଅଭିଯୁକ୍ତ ଡ୍ରାଇଭର ଜଣେ ଆମେରିକୀୟ ମହିଳାଙ୍କୁ ଅଧା କିଲୋମିଟରରୁ କମ୍ ଦୂରତା ପାଇଁ ୧୮୦୦୦ ଟଙ୍କା ଆଦାୟ କରିଥିବା ଅଭିଯୋଗ ହୋଇଛି। ମହିଳା ଜଣଙ୍କ କାମ ପାଇଁ ଜାନୁଆରୀ ୧୨ ତାରିଖରେ ମୁମ୍ବାଇ ଆସିଥିଲେ। ମୁମ୍ବାଇ ଅନ୍ତର୍ଜାତୀୟ ବିମାନବନ୍ଦରରୁ ତାଙ୍କୁ ବିମାନବନ୍ଦର ନିକଟରେ ଅବସ୍ଥିତ ପଞ୍ଚତାରକା ହିଲଟନ ହୋଟେଲକୁ ଯିବାର ଥିଲା।

ମହିଳା ଜଣଙ୍କ ଦୂରତା ବିଷୟରେ ଅଜ୍ଞ ଥିଲେ। ସେ ଏକ ଟ୍ୟାକ୍ସି ବୁକ୍ କରିଥିଲେ। କିନ୍ତୁ ତାଙ୍କୁ ସିଧା ତାଙ୍କ ଗନ୍ତବ୍ୟସ୍ଥଳକୁ ନେବା ପରିବର୍ତ୍ତେ, ଟ୍ୟାକ୍ସି ଡ୍ରାଇଭର ଦେଶରାଜ ଏଣେତେଣେ ଗାଡ଼ି ଚଲାଇଥିଲେ। ତା’ପରେ ସେ ତାଙ୍କୁ ଯେଉଁଠାରୁ ନେଇଥିଲେ ସେହି ସ୍ଥାନ ପାଖରେ ଛାଡ଼ି ଦେଇଥିଲେ । କାରଣ ହୋଟେଲ ସେହି ପାଖରେ ଥିଲା । ମହିଳା ଜଣଙ୍କ ଏନେଇ ଏକ୍ସରେ ପୋଷ୍ଟ କରିବା ପରେ ପୂରା ଘଟଣା ସାମ୍ନାକୁ ଆସିଥିଲା।

ଆର୍ଜେଣ୍ଟିନା ଆରିଆନୋ ନାମକ ଏହି ମହିଳା X ରେ ଲେଖିଥିଲେ, ‘ଆମେ ମୁମ୍ବାଇରେ ଓହ୍ଲାଇ ହିଲଟନ୍ ହୋଟେଲକୁ ଏକ ଟ୍ୟାକ୍ସି ନେଇ ଗଲୁ। ପ୍ରଥମେ, ଟ୍ୟାକ୍ସି ଡ୍ରାଇଭର ଏବଂ ଅନ୍ୟ ଜଣେ ବ୍ୟକ୍ତି ଆମକୁ ଏକ ଅଜଣା ସ୍ଥାନକୁ ନେଇଗଲେ। ତା'ପରେ ସେମାନେ ଆମକୁ ହୋଟେଲ ନିକଟରେ ଛାଡ଼ିଦେଲେ ଏବଂ ଆମଠାରୁ ୨୦୦ ଡଲାର (୧୮,୦୦୦ ଟଙ୍କା) ଆଦାୟ କଲେ। ହୋଟେଲଟି ବିମାନବନ୍ଦରରୁ ୪୦୦ ମିଟର ଦୂରରେ ଥିଲା। ଟ୍ୟାକ୍ସି ନମ୍ବର MH ୦୧ BD ୫୪୦୫।’

ଟାଇମ୍ସ ଅଫ୍ ଇଣ୍ଡିଆର ଏକ ରିପୋର୍ଟ ଅନୁଯାୟୀ , ଭାଇରାଲ୍ ପୋଷ୍ଟକୁ ଆଧାର କରି ମୁମ୍ବାଇ ପୋଲିସ ତଦନ୍ତ ଆରମ୍ଭ କରିଥିଲା। ପୋଲିସ ପୀଡିତାଙ୍କ ସହ ତୁରନ୍ତ ଯୋଗାଯୋଗ କରିପାରି ନଥିଲା । ତେଣୁ ପୋଲିସ ନିଜ ଆଡ଼ୁ ଜାନୁଆରୀ ୨୭ ତାରିଖରେ ଏକ ମାମଲା ରୁଜୁ କରିଥିଲା । ଅଭିଯୁକ୍ତ ଡ୍ରାଇଭରଙ୍କ ବିରୁଦ୍ଧରେ ଭାରତୀୟ ଦଣ୍ଡ ସଂହିତା (ଆଇପିସି)ର ଧାରା 318(4) (ପ୍ରତାରଣା) ଏବଂ 3(5) ଅନୁଯାୟୀ ଏକ ମାମଲା ରୁଜୁ କରାଯାଇଥିଲା। ପୋଲିସ ଦେଶରାଜଙ୍କୁ ଗିରଫ କରିଛି। ଆଉ ଜଣେ ଅଭିଯୁକ୍ତ ଏବେ ବି ଫେରାର୍ ଅଛି । ଅଭିଯୁକ୍ତର କ୍ୟାବ୍ ଜବତ କରାଯାଇଛି। ତାଙ୍କର ଡ୍ରାଇଭିଂ ଲାଇସେନ୍ସ ବାତିଲ କରିବା ପାଇଁ ତାଙ୍କର ବିବରଣୀ RTOକୁ ପଠାଯିବ ବୋଲି ପୋଲିସ କହିଛି ।