Dhurandhar Box Office Collection: ଧୁରନ୍ଧର ସୁନାମୀରେ ଧୋଇଗଲା 'ସୈୟାରା', ଭାଙ୍ଗିଲା ୫ ରେକର୍ଡ

ମୁମ୍ବାଇ: ଦର୍ଶକଙ୍କ ମଧ୍ୟରେ ଧୁରନ୍ଧରକୁ ନେଇ କ୍ରେଜ୍ କମିବାର ନାଁ ଧରୁନି । ରଣବୀର ସିଂହଙ୍କ ଫିଲ୍ମ ବକ୍ସ ଅଫିସରେ ରେକର୍ଡ ଭାଙ୍ଗିବାରେ ଲାଗିଛି। ଧୁରନ୍ଧର ପ୍ରତିଦିନ ହିଟ୍, ସୁପରହିଟ୍ ଏବଂ ବ୍ଲକବଷ୍ଟର ଫିଲ୍ମକୁ ପଛରେ ପକାଉଛି। ଫିଲ୍ମଟି ଥିଏଟରରେ ରିଲିଜ ହେବାର ୧୦ ଦିନ ବିତିଗଲାଣି, ତଥାପି ଫିଲ୍ମ ପାଇଁ କ୍ରେଜ୍ ବଢ଼ିଚାଲିଛି । ଦଶମ ଦିନରେ, ଧୁରନ୍ଧର ୫ଟି ରେକର୍ଡ ଭାଙ୍ଗିଛି । ୨୦୨୫ରେ ଦ୍ୱିତୀୟ ସବୁଠାରୁ ବଡ଼ ହିନ୍ଦୀ ଫିଲ୍ମ ହୋଇସାରିଛି ଧୁରନ୍ଧର ।

ଧୁରନ୍ଦର ପ୍ରଥମ ସପ୍ତାହରେ ବକ୍ସ ଅଫିସରେ ୨୧୮ କୋଟି ଟଙ୍କା କଲେକ୍ସନ କରିଥିଲା । ଫିଲ୍ମଟି ୮ମ ଦିନରେ ୩୪.୭୦ କୋଟି ଟଙ୍କା ଏବଂ ୯ମ ଦିନରେ ୫୩.୭୦ କୋଟି ଟଙ୍କା ଆୟ କରିଥିଲା। ଦ୍ବିତୀୟ ରବିବାର ଅର୍ଥା ଦଶମ ଦିନରେ ଧୁରନ୍ଧରର କଲେକ୍ସନ ତଥ୍ୟ ସାମ୍ନାକୁ ଆସିଛି । Sacnilk ଅନୁସାରେ, ରଣବୀର ସିଂହଙ୍କ ଫିଲ୍ମ ଆଜି ରାତି ୮ଟା ସୁଦ୍ଧା ୪୮.୨୪ କୋଟି ଟଙ୍କା ଆୟ କରିଛି। ଏବେ ଭାରତୀୟ ବକ୍ସ ଅଫିସରେ ଧୁରନ୍ଧରର ମୋଟ କଲେକ୍ସନ ୩୫୪.୬୪ କୋଟି ଟଙ୍କାରେ ପହଞ୍ଚିଛି।

୩୫୪.୬୪ କୋଟି ଆୟ କରି ଧୁରନ୍ଧର "ସୈୟାରା" ର ଅଲଟାଇମ୍ କଲେକ୍ସନକୁ ପଛରେ ପକାଇ ଦେଇଛି। ଏହି ବର୍ଷ ଆରମ୍ଭରେ ମୁକ୍ତିଲାଭ କରିଥିବା "ସୈୟାରା" ବକ୍ସ ଅଫିସରେ ୩୨୯.୭୩ କୋଟି ଟଙ୍କା ଆୟ କରିଥିଲା। ଅନୀତ ପଡ୍ଡା ଏବଂ ଆହାନ ପାଣ୍ଡେ ଅଭିନୀତ ଏହି ରୋମାଣ୍ଟିକ ଚଳଚ୍ଚିତ୍ରଟି ୨୦୨୫ର ଦ୍ୱିତୀୟ ସର୍ବାଧିକ ଆୟକାରୀ ବଲିଉଡ୍ ଚଳଚ୍ଚିତ୍ର ଥିଲା। ଏହି ଟାଇଟଲ୍ ଏବେ ନିଜ ନାଁରେ କରିଛି ଧୁରନ୍ଧର ।

ସୈୟାରା ବ୍ୟତୀତ, ଧୁରନ୍ଧର ଦଶମ ଦିନରେ ଅନେକ ହିଟ୍, ସୁପରହିଟ୍ ଏବଂ ବ୍ଲକବଷ୍ଟର ଫିଲ୍ମର ରେକର୍ଡ ଭାଙ୍ଗିଛି। ରଣବୀର ସିଂହଙ୍କ କ୍ରାଇମ୍-ଆକ୍ସନ୍ ଫିଲ୍ମ ସଲମାନ ଖାନ ଏବଂ ଆମିର ଖାନଙ୍କ ଫିଲ୍ମକୁ ପଛରେ ପକାଇ ଦେଇଛି। ଧୁରନ୍ଧର ସଲମାନ ଖାନଙ୍କ ବ୍ଲକବଷ୍ଟର ଫିଲ୍ମ ବଜରଙ୍ଗୀ ଭାଇଜାନ (୩୨୦.୩୪ କୋଟି) ଏବଂ ଟାଇଗର ଜିନ୍ଦା ହୈ (୩୩୯.୧୬ କୋଟି)କୁ ପଛରେ ପକାଇଛି। ଏହା ବ୍ୟତୀତ ଧୁରନ୍ଧର, ସଞ୍ଜୁ ଏବଂ ପିକେ ଆୟକୁ ଟପିଯାଇଛି ।