Cyber Loot : ବୟସ୍କଙ୍କୁ ଟାର୍ଗେଟ୍, ଅଶ୍ଳୀଳ ଭିଡ଼ିଓ କଲ୍ କରି ଗାଏବ୍ କରିଦେଲା ୮୮ଲକ୍ଷ

କଟକ  : ଟଙ୍କା ପାଇଁ ବନ୍ଧୁ ସାଜିଲା ବଇରୀ। ଫେସବୁକ ବନ୍ଧୁତାରେ ପଡ଼ିଲା ଭଟ୍ଟା... ଲୁଟ୍ ପାଇଁ କରିଥିଲେ ବଡ଼ ଷଡ଼ଯନ୍ତ୍ର। ଅଶ୍ଳୀଳ ଭିଡ଼ିଓ କଲ୍ କରି ଗାଏବ୍ କରିଦେଲା ୮୮ଲକ୍ଷ । ୨୦୨୫ ଜାନୁଆରୀରର କଥା। ବରିଷ୍ଠ ନାଗରିକ ଜଣକ ନିଜ ଏକୁଟିଆପଣ ଦୂର କରିବାକୁ ନେଇ ଥିଲେ ସୋସିଆଲ୍ ମଡିଆର ସାହାରା। ଫେସବୁକ୍ ଖେଳାଉ ଖେଳାଉ ଯାଜପୁର ଅଞ୍ଚଳର ସରୋଜ ଜେନା ନାମକ ବ୍ୟକ୍ତିଙ୍କ ସହିତ ଫେସବୁକରେ ହୋଇଥିଲା ବନ୍ଧୁତା ସ୍ଥାପନ। ଧିରେ ଧିରେ ଘନିଷ୍ଠ ହୋଇଥିଲା ବନ୍ଧୁତା। ସେହି ବନ୍ଧୁତାର ସୁଯୋଗ ନେଇ ସରୋଜ ବିରିଷ୍ଠ ନାଗରିକଙ୍କ ଠାରୁ କିଛି ଟଙ୍କା ନେଇଥିଲେ ଧାର୍ ଆକାରରେ। ତୁରନ୍ତ ସେହି ଟଙ୍କା ଫେରାଇ ସେହି ବରିଷ୍ଠ ନାଗରିକଙ୍କ ମନରେ ଜନ୍ମାଇ ଥିଲେ ବିଶ୍ୱାସ।

ଏହାପରେ ସରୋଜ ବରିଷ୍ଠ ନାଗରିକଙ୍କୁ ଏକ ଫେକ୍ ଆଇଡି ମାଧ୍ୟମରେ ଝିଅ ପରିଚୟ ଦେଇ ଦୀର୍ଘ ଦିନ ଧରି ଅଶ୍ଳୀଳ ଭିଡ଼ିଓ କଲ୍ କରିଥିଲେ। ଆଉ ଏହି ଭିଡ଼ିଓ କଲ୍ ବେଳର ରେକର୍ଡ ଓ ସ୍କ୍ରିନସର୍ଟକୁ ଭାଇରାଲ୍ କରି ଦେବାର ଧମକ ଦେଇ ଲୁଟି ନେଇଥିଲେ ୮୮ଲକ୍ଷ ଟଙ୍କା। ଲୋକ ଲଜ୍ଜା ଭୟରେ କିଛି ଦିନ ଚୁପ୍ ରହିଲେ। ପରେ କିନ୍ତୁ ପରିବାରର ସହଯୋଗ ପରେ ବରିଷ୍ଠ ନାଗରିକଜଣଙ୍କ ସାହସ ଝୁଟାଇ ସାଇବର ଥାନାର ହୋଇଥିଲେ। ଏହାପରେ ସାଇବର ଥାନା ପୋଲିସ ତଦନ୍ତ କରି ଏହି ଘଟଣାରେ ସମ୍ପୃକ୍ତ ୫ଜଣକୁ କରିଛି ଗିରଫ । ସେମାନେ ହେଲେ ମନୋଜ ଜେନା, ପ୍ରପୁଲ୍ଲ ବିଶ୍ୱାଳ, ସଂଗ୍ରାମ ଜେନା, ବାସୁଦେବ ରାଉତ, ମନୋରଞ୍ଜନ ରାଉତ। ହେଲେ ଏବେବି ଫେରାର୍ ଅଛି ମୁଖ୍ୟ ଅଭିଯୁକ୍ତ ସରୋଜ ଜେନା।

ଗିରଫ ଅଭିଯୁକ୍ତଙ୍କ ନିକଟରୁ ନଗଦ ୧୪ଲକ୍ଷ ଟଙ୍କା, ୫ ଲକ୍ଷ ଟଙ୍କାର ସୁନା ଗହଣା ଜବତ କରିବା ସହ ମୁଖ୍ୟ ଅଭିଯୁକ୍ତ ସରୋଜର ବ୍ୟାଙ୍କ ଆକାଉଣ୍ଟକୁ ଫ୍ରିଜ୍ କରାଯାଇଛି। ତେବେ ଏହି ଘଟଣାରେ ପୋଲିସର ତଦନ୍ତ ଜାରି ରହିଛି। ଘଟଣାରେ ଆଉ କେଉଁମାନଙ୍କର ସମ୍ପୃକ୍ତି ରହିଛି ତାହା ଖୁବ୍ ଶୀଘ୍ର ଜଣାପଡିବ। ଯେଉଁମାନେ ଏଭଳି ଠକାମୀର ଶିକାର ହେଉଛନ୍ତି ସେମାନେ ସାଇବର ଥାନାକୁ ଜଣାନ୍ତୁ ବୋଲି ପ୍ରେସମିଟ୍ ରେ ସୂଚନା ଦେଇଛନ୍ତି ପୋଲିସ୍ କମିଶନର।

ଦିନକୁ ଦିନ ବଢ଼ିବାରେ ଲାଗିଛି ସାଇବର ଅପରାଧ। ସାଇବର ଅପରାଧୀମାନେ ବେଶ୍ ଚତୁରତାର ସହ ଲୁଟି ନେଉଛନ୍ତି ଟଙ୍କା। ସେଥିପାଇଁ ଏମାନଙ୍କଠୁ ଦୂରରେ ରହିବା ପାଇଁ ପୋଲିସ ଏବଂ ସରକାର ବିଭିନ୍ନ କାର୍ଯ୍ୟକ୍ରମ କରୁଛନ୍ତି। ହେଲେ କାହିଁକି ଲୋକେ ଏଭଳି ଠକାମୀର ଶିକାର ହେଉଛନ୍ତି ତାହା ଏବେ ଏକ ବଡ଼ ପ୍ରଶ୍ନ।