୪ ଜିଲ୍ଲାର ୪୬ ସ୍ଥାନରେ ପୋଲିସର ଚଢାଉ, ଏବେ ଯାଏଁ ମିଳିଲାଣି ୭୦ ଲକ୍ଷ ଟଙ୍କା ଓ ପୁଳାପୁଳା ସୁନା-ରୂପା

ଭଦ୍ରକ ୧୭।୦୧ : ଗୋତସ୍କରୀ ଲିଙ୍କରେ ୪ ଜିଲ୍ଲାରେ ଚଢ଼ାଉ । ଭଦ୍ରକ, କେନ୍ଦୁଝର, ଯାଜପୁର ଏବଂ ମୟୁରଭଞ୍ଜର ୪୬ଟି ସ୍ଥାନରେ କେନ୍ଦୁଝର ପୋଲିସ ଚଢ଼ାଉ କରୁଛି । କେନ୍ଦୁଝର ଜିଲ୍ଲାର ହରିଚନ୍ଦନପୁର ଅନ୍ତର୍ଗତ ସାନ୍ତରାପୁର, କାଳିଆହାତା, ତେଲକୋଇ, ଘସିପୁରା, ତୁରୁମୁଙ୍ଗା ଏବଂ ଜାମୁଜୋଡି; ମୟୂରଭଞ୍ଜ ଜିଲ୍ଲାର ବିଶୋଇ, କରଞ୍ଜିଆ, ଝାରପୋଖରିଆ, ତେଣ୍ଟୋପୋଶି, ଚଢେଇଭୋଳ, କେନ୍ଦ୍ରେଇ ଏବଂ ଠାକୁରମୁଣ୍ଡା; ଯାଜପୁର ଜିଲ୍ଲାର କୋରେଇ ଏବଂ ଭଦ୍ରକ ଜିଲ୍ଲାରେ ଚଢ଼ାଉ ଚାଲିଛି। ଏହି ବ୍ୟାପକ ଅଭିଯାନର ନେତୃତ୍ୱ ଦୁଇଜଣ ଅତିରିକ୍ତ ପୋଲିସ ଏସ୍ ପି ନେଉଛନ୍ତି। ଚଢାଉ ଟିମ୍ ରେ ୫ ଜଣ ଡିଏସପି, ୨୫ ଜଣ ଇନ୍ସପେକ୍ଟର, ୩୬ ଜଣ ଏସଆଇ ଏବଂ ASI ସାମିଲ ଅଛନ୍ତି । ୧୮ ପ୍ଲାଟୁନ ପୋଲିସ ଫୋର୍ସ ସହାୟତାରେ ଜୋରଦାର ଚଢାଉ ଅଭିଯାନ ଜାରି ରହିଛି। ବର୍ତ୍ତମାନ ସୁଦ୍ଧା ୭୦ ଲକ୍ଷ ଟଙ୍କା , ସୁନା ଗହଣା, ସପିଙ୍ଗ ମଲ୍ ଏବଂ ଏକାଧିକ ଗାଡ଼ି ଠାବ କରାଯାଇଛି।