ଅଜିତ ପାୱରାଙ୍କ କାରକେଡର ଗାଡ଼ି ଦୁର୍ଘଟଣାର ଶିକାର, ୪ ପଥଚାରୀ ଆହତ

ଧାରୁର ୨୨।୧୧: ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ କାରକେଡରେ ସାମିଲ ଏକ ବାହନ ୨୨ ନଭେମ୍ବର ଶନିବାର ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଘଟଣାରେ ୪ ଜଣ ପଥଚାରୀ ଗୁରୁତର ଆହତ ହୋଇଛନ୍ତି। ସମସ୍ତ ଆହତଙ୍କୁ ଧାରୁର ଗ୍ରାମୀଣ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଜଣକର ଅବସ୍ଥା ଉଦବେଗଜନକ ରହିଛି। ଏହି ଦୁର୍ଘଟଣା ବିଡ ଜିଲ୍ଲା ତେଲଗାଓଁ-ଧାରୁର ମାର୍ଗର ଦନୁକାଭାଡ ଫାଟା ଅଞ୍ଚଳରେ ହୋଇଛି। ସୂଚନା ଅନୁସାରେ କାରକେଡରେ ସାମିଲ ଏକ ଗାଡ଼ି ରାସ୍ତାରେ ଯାଉଥିବା ଏକ ମୋଟର ସାଇକେଲକୁ ଧକ୍କା ଦେଇଛି।

ଏହି ଦୁର୍ଘଟଣାରେ ମୋଟରସାଇକେଲରେ ଯାତ୍ରା କରୁଥିବା ବିଷ୍ଣୁ ଦାମୋଦର ସୁଦେ, ତାଙ୍କ ପତ୍ନୀ କୁସୁମ ସୁଦେ ଓ ତାଙ୍କ ୨ ଝିଅ ରାସ୍ତାରେ ପଡି ଯାଇଥିଲେ। ୪ ଜଣ ଗୁରୁତର ଆହତ ହୋଇଛନ୍ତି। ଏହି ଦୁର୍ଘଟଣା ଯୋଗୁ ଘଟଣା ସ୍ଥଳରେ ଆତଙ୍କ ଖେଳି ଯାଇଥିଲା। ସମସ୍ତଙ୍କୁ ତୁରନ୍ତ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଛି। ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ ୪ ଚକିଆ ବାହନଟି ରାସ୍ତା ଉପରେ ଓଲଟି ପଡିଥିଲା। କୁହାଯାଉଛି ଅଜିତ ପାୱାର ଧାରୁର ରାସ୍ତାରେ ଲାଟୁରର ଏକ କାର୍ଯ୍ୟକ୍ରମରେ ଯୋଗଦେବାକୁ ଯାଉଥିଲେ। ତାଙ୍କ କାରକେଡରେ ସାମିଲ ଏକ ବାହନ ଏମଏଚ୦୨ଜିଏଚ୫୭୩୨ ରାସ୍ତାରେ ଏକ ମୋଟର ସାଇକେଲକୁ ଧକ୍କା ଦେଇଥିଲା। ପ୍ରାଥମିକ ଯାଞ୍ଚରୁ କାରକେଡ ଡ୍ରାଇଭରଙ୍କ ବେପରୁଆ ଗାଡ଼ି ଚାଳନା ଯୋଗୁ ଏହି ଦୁର୍ଘଟଣା ଘଟିଥିବା କୁହାଯାଉଛି।

ଏହି ଦୁର୍ଘଟଣା ପରେ ସଡ଼କ ଭୀଷଣ ଜାମ ହୋଇଯାଇଥିଲା। ସୂଚନା ମିଳିବାମାତ୍ରେ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିବା ସହ ସଡ଼କରେ ବାହନ ଚଳାଚଳ ସ୍ୱଭାବିକ କରିଥିଲା। ପୋଲିସ ଉପମୁଖ୍ୟମନ୍ତ୍ରୀ ଙ୍କ କାରକେଡରେ ସାମିଲ ଦୁର୍ଘଟଣାଗ୍ରସ୍ତ ଗାଡିର ଡ୍ରାଇଭରଙ୍କ ବିରୋଧରେ ଏତଲା ରୁଜୁ କରିଛି। ଅନ୍ୟପଟେ ସ୍ଥାନୀୟ ଲୋକେ ଆହତ ପରିବାରଙ୍କ ପ୍ରତି ନ୍ୟାୟ ନିମନ୍ତେ ଦାବି କରିଛନ୍ତି।