ଦିଲ୍ଲୀରେ ଘନ କୁହୁଡ଼ି ଓ ପ୍ରଦୂଷଣର ପ୍ରକୋପ ଜାରି, ଘଣ୍ଟାକୁ ଘଣ୍ଟା ବାତିଲ ହେଉଛି ଉଡାଣ, ଯାତ୍ରୀ ହନ୍ତସନ୍ତ

ନୂଆଦିଲ୍ଲୀ ୨୧।୧୨: ଦିଲ୍ଲୀ ଇନ୍ଦିରାଗାନ୍ଧି ଇଣ୍ଟରନ୍ୟାସନାଲ ଏୟାରପୋର୍ଟ (ଆଇଜିଆଇଏ)ରେ ଘନ କୁହୁଡ଼ି ଓ ଦୃଶ୍ୟତା ହ୍ରାସ ଯୋଗୁ ବିମାନ ଯାତାୟାତ ରବିବାର ଗୁରୁତର ପ୍ରଭାବିତ ହୋଇଛି। ପରିସ୍ଥିତି ଏପରି ହୋଇଛି ଯେ ଏ ପର୍ଯ୍ୟନ୍ତ ପାଖାପାଖି ୧୧୦ ଉଡାଣ ବାତିଲ ହେଲାଣି। ସେହିପରି ୩୭୦ ରୁ ଅଧିକ ବିମାନ ବିଳମ୍ବିତ ହେଉଛି। ଯାତ୍ରୀଙ୍କୁ ଦୀର୍ଘ ଅପେକ୍ଷା କରିବାକୁ ପଡୁଥିବା ବେଳେ ଏୟାରପୋର୍ଟରେ ଜନଗହଳି ବଢିବାରେ ଲାଗିଛି। ଏୟାରପୋର୍ଟ ଅଧିକାରୀଙ୍କ ଅନୁସାରେ ରଦ୍ଦ ହୋଇଥିବା ୧୧୦ ଉଡାଣ ମଧ୍ୟରୁ ୫୯ଟି ଆସିବାକୁ ଥିବା ଓ ୫୧ଟି ଯିବାକୁ ଥିବା ଫ୍ଲାଇଟ୍ ଅଛନ୍ତି।

ସେହିପରି ୩୭୦ରୁ ଅଧିକ ବିମାନ ଉଡାଣ ଓ ଅବତରଣରେ ୨୬ ମିନିଟ୍ ବିଳମ୍ବ ରେକର୍ଡ କରାଯାଇଛି। ଘନ କୁହୁଡ଼ି ଓ କମ ଦୃଶ୍ୟତା ଯୋଗୁ ଏପରି ପରିସ୍ଥିତି ଉପୁଜିଛି। ଦିଲ୍ଲୀ ଇଣ୍ଟରନ୍ୟାସନାଲ ଏୟାରପୋର୍ଟ (ଡିଆଇଏଏଲ) ଅନୁସାରେ ତମାମ ଅସୁବିଧା ସତ୍ତ୍ୱେ ଏୟାରପୋର୍ଟରେ ଅପରେସନ ଜାରି ରହିଛି। ଆଇଜିଆଇ ଏୟାରପୋର୍ଟ ଦୈନିକ ପ୍ରାୟ ୧୩୦୦ ଉଡାଣ ସଞ୍ଚାଳନ କରିଥାଏ। ଏଣୁ ପାଣିପାଗ ଜନିତ ସମସ୍ୟାର ପ୍ରଭାବ ଏଠାରେ ଖୁବ୍ ଶୀଘ୍ର ଦେଖାଯାଇଥାଏ। ଗତ କିଛିଦିନ ହେଲା ଲଗାତାର କୁହୁଡ଼ି କାରଣରୁ ଦିଲ୍ଲୀ ଓ ଉତ୍ତର ଭାରତର ଅନେକ ଏୟାରପୋର୍ଟରେ ଫ୍ଲାଇଟ୍ ଅପରେସନ ପ୍ରଭାବିତ ହେଉଛି।

ଏଥି ମଧ୍ୟରେ ସେଣ୍ଟ୍ରାଲ ପଲ୍ୟୁସନ ବୋର୍ଡ (ସିପିସିବି)ଙ୍କ ରିପୋର୍ଟ ଜାତୀୟ ରାଜଧାନୀରେ ଚିନ୍ତାକୁ ଆହୁରି ବଢେଇ ଦେଇଛି। ରବିବାର ସକାଳେ ଦିଲ୍ଲୀ ଏୟାର କ୍ୱାଲିଟି ଇଣ୍ଡେକ୍ସ (ଏକ୍ୟୁଆଇ) ୩୮୬ ରେକର୍ଡ ହୋଇଛି। ଯାହା ବହୁତ ଖରାପ ବା ଗମ୍ଭୀର ଶ୍ରେଣୀରେ ରହିଛି। ସହରର ୧୬ ମନିଟରିଂ ଷ୍ଟେସନରେ ଏକ୍ୟୁଆଇ ଗୁରୁତର ସ୍ଥିତିରେ ରହିଛି। ଏବେକା ପରିସ୍ଥିତିରେ ଦିଲ୍ଲୀର ବାୟୁ ସ୍ୱାସ୍ଥ୍ୟ ଲାଗି ବିପଦଜନକ ହୋଇ ରହିଛି। ଏଥିରେ ପାଣିପାଗ ସ୍ଥିତି ପରିସ୍ଥିତିକୁ ଆହୁରି ଜଟିଳ କରିଛି। ଜାତୀୟ ରାଜଧାନୀର ସର୍ବ ନିମ୍ନ ତାପମାତ୍ରା ୯.୪ ଡିଗ୍ରି ସେଲସିୟସ ରେକର୍ଡ କରାଯାଇଥିବା ବେଳେ ଅଧିକତମ ତାପାମାତ୍ରା ୧୭ ଡିଗ୍ରି ସେଲସିୟସ ରହିପାରେ ବୋଲି ଅନୁମାନ କରାଯାଉଛି। ଏଣୁ ଦିଲ୍ଲୀ ଏବେ ଥଣ୍ଡାରେ ଥରୁଛି।

ଉତ୍ତର ଭାରତର ପାର୍ବତ୍ୟ ଅଞ୍ଚଳରେ ଭୀଷଣ ହୀମପାତ ହେଉଥିବା ବେଳେ ସମତଳରେ ବର୍ଷାର ପ୍ରଭାବ ଆଜି ଶ୍ରୀନଗର ଏୟାରପୋର୍ଟରେ ଦେଖିବାକୁ ମିଳିଛି। ଏଠାରେ ଅନୁନ୍ୟ ୧୧ଟି ଫ୍ଲାଇଟ୍ କ୍ୟାନସଲ କରାଯାଇଛି। ଏବେ ଏୟାରପୋର୍ଟର ଏପ୍ରନରେ ୪ଟି ବିମାନ ଷ୍ଟାଣ୍ଡବାୟ ରହିଛନ୍ତି। ପାଗ ସଫା ହେଲେ ପୁଣି ଉଡାଣ ସଞ୍ଚାଳ ଆରମ୍ଭ ହେବ ବୋଲି ଏୟାରପୋର୍ଟ କର୍ତ୍ତୃପକ୍ଷ କହିଛନ୍ତି।