ଦେଶର ପ୍ରଥମ ଥର ହେବ ଘରୋଇ ଆୟର ସର୍ଭେ: କାହାର ରୋଜଗାର କେତେ ଜାଣିବାକୁ ତଥ୍ୟ ସଂଗ୍ରହ କରିବେ ସରକାର

ନୂଆଦିଲ୍ଲୀ: ଦେଶରେ ପ୍ରଥମ ଥର ଆୟ(ଇନକମ) ସର୍ଭେ ହେବାକୁ ଯାଉଛି। ସରକାର ଆସନ୍ତା ବର୍ଷ ଫେବୃଆରୀରେ ଜାତୀୟ ଘରୋଇ ଆୟ ସର୍ଭେ (NHIS) ଆରମ୍ଭ କରିବାକୁ ଯୋଜନା କରୁଛନ୍ତି। ଏନେଇ ପରିସଂଖ୍ୟାନ ଏବଂ କାର୍ଯ୍ୟକ୍ରମ କାର୍ଯ୍ୟାନ୍ୱୟନ (MoSPI) ମନ୍ତ୍ରଣାଳୟର ସଚିବ ସୌରଭ ଗର୍ଗ ଦି ଇଣ୍ଡିଆନ ଏକ୍ସପ୍ରେସକୁ ଏକ ସାକ୍ଷାତକାରରେ କହିଛନ୍ତି।

ଭାରତରେ ପ୍ରଥମ ଥର ପାଇଁ, ଏଭଳି ଏକ ସର୍ଭେ ହେବାକୁ ଯାଉଛି ଯେଉଁଥିରେ ପ୍ରତ୍ୟେକ ପରିବାରର ସମ୍ପୂର୍ଣ୍ଣ ଆୟର ତଥ୍ୟ ସଂଗ୍ରହ କରାଯିବ। ଦେଶର ବିଭିନ୍ନ ସ୍ଥାନରେ ଲୋକମାନେ କେତେ ରୋଜଗାର କରନ୍ତି, ସେମାନଙ୍କର ଆୟର ଉତ୍ସ  ଏବଂ ସେମାନଙ୍କ ଆର୍ଥିକ ସ୍ଥିତି ବିଷୟରେ ସବିଶେଷ ସୂଚନା ସଂଗ୍ରହ କରିବ।

ଦେଶରେ ଆର୍ଥିକ ଅସମାନତା ଏବଂ ଦାରିଦ୍ର୍ୟର ପରିମାଣକୁ ଭଲଭାବରେ ବୁଝିବା, ଏବଂ କେଉଁ କ୍ଷେତ୍ରଗୁଡ଼ିକ ଉପରେ ଅଧିକ ଧ୍ୟାନ ଦେବା ଆବଶ୍ୟକ ତାହା ଜାଣିବା ଏହି ସର୍ଭେର ମୁଖ୍ୟ ଲକ୍ଷ୍ୟ। ଗର୍ଗଙ୍କ ଅନୁସାରେ, ଏହା ଏପର୍ଯ୍ୟନ୍ତ କରାଯାଇଥିବା ସବୁଠାରୁ ଜଟିଳ ଏବଂ ଚ୍ୟାଲେଞ୍ଜିଂ ସର୍ଭେ ହେବ।

ବର୍ତ୍ତମାନ, ସରକାରଙ୍କ ପାଖରେ ଲୋକଙ୍କ ଖର୍ଚ୍ଚ ଓ ନିଯୁକ୍ତି ସମ୍ପର୍କିତ ଡଟା ତ ରହିଛି, କିନ୍ତୁ ରୋଜଗାର କେତେ ହେଉଛି ତାର ସମ୍ପୂର୍ଣ୍ଣ ତଥ୍ୟ ନାହିଁ। ଏହି ସର୍ଭେ ଦ୍ୱାରା ଦେଶର କେତେ ଲୋକ ଗରିବ, କେତେ ମଧ୍ୟବିତ୍ତ ଶ୍ରେଣୀର ଏବଂ କେତେ ଧନୀ ତାହା ନିର୍ଣ୍ଣୟ କରିବାରେ ସାହାଯ୍ୟ ହେବ। ଏହି ସୂଚନା ନୀତି ନିର୍ଦ୍ଧାରଣ, ସବସିଡି ଏବଂ ଅନ୍ୟାନ୍ୟ ସରକାରୀ ଯୋଜନାଗୁଡ଼ିକୁ ଉନ୍ନତ କରିବାରେ ସାହାଯ୍ୟ କରିବ ବୋଲି ଶ୍ରୀ ଗର୍ଗ କହିଛନ୍ତି।

ଏହି ସର୍ଭେ ପାଇଁ ପରିସଂଖ୍ୟାନ ମନ୍ତ୍ରଣାଳୟର ଟିମ ଗାଁ ଏବଂ ସହରକୁ ଯାଇ ଲୋକଙ୍କ ସାକ୍ଷାତକାର ନେବେ, ସେମାନଙ୍କ ଆୟ, ଖର୍ଚ୍ଚ, ସଞ୍ଚୟ ଏବଂ ଅନ୍ୟାନ୍ୟ ଆର୍ଥିକ କାର୍ଯ୍ୟକଳାପ ବିଷୟରେ ସୂଚନା ସଂଗ୍ରହ କରିବେ। ସଠିକ୍ ଏବଂ ଶୀଘ୍ର ତଥ୍ୟ ସଂଗ୍ରହ ସୁନିଶ୍ଚିତ କରିବା ପାଇଁ ଏହା ସବୁ ଡିଜିଟାଲ୍ ଏବଂ ଏକ ଉଚ୍ଚ ପରିଚାଳନା ଉପାୟରେ କରାଯିବ।