ଉପରେ ବାୟୁ, ତଳେ ଜଳ, ବିଷାକ୍ତ ଦିଲ୍ଲୀ ଡହଳବିକଳ: ରାଜଧାନୀର ଭୂତଳ ଜଳରେ ୟୁରାନିୟମ

ନୂଆଦିଲ୍ଲୀ: ରାଜଧାନୀ ଦିଲ୍ଲୀ ବର୍ତ୍ତମାନ ବାୟୁ ପ୍ରଦୂଷଣ ବିପଦ ସହ ଲଢ଼ୁଥିବା ବେଳେ ଏବେ ପାଣି ପ୍ରଦୂଷଣ ଚିନ୍ତା ଘାରିଛି। ରାଜଧାନୀ ଦିଲ୍ଲୀରେ ଭୂତଳ ଜଳରେ ୟୁରାନିୟମ ମାତ୍ରା ଅଧିକ ରହିଛି। ପଞ୍ଜାବ ଓ ହରିଆଣା ପରେ ଦିଲ୍ଲୀର ଏଭଳି ଅବସ୍ଥା ରାଜଧାନୀବାସୀଙ୍କ ଚିନ୍ତା ବଢ଼ାଇଲାଣି।।

କେନ୍ଦ୍ରୀୟ ଭୂତଳ ଜଳ ବୋର୍ଡ (CGWB) ଦ୍ୱାରା ସଦ୍ୟ ପ୍ରକାଶିତ ବାର୍ଷିକ ଭୂତଳ ଜଳ ମାନ ରିପୋର୍ଟ ୨୦୨୫ରେ ଯେ ଦିଲ୍ଲୀରେ ପରୀକ୍ଷିତ ଭୂତଳ ଜଳ ନମୁନାର ୧୩-୧୫% ରେ ଆବଶ୍ୟକତା ସୀମା ୩୦ ପିପିବିରୁ ଅଧିକ ୟୁରାନିୟମ ମିଳିଛି। ଯାହା ପାନୀୟ ଜଳ ସୁରକ୍ଷା ଏବଂ ଜନସ୍ୱାସ୍ଥ୍ୟ ପ୍ରତି ଚିନ୍ତା ବଢ଼ାଇଛି। ଏନେଇ ଟାଇମ୍ସ ଅଫ୍ ଇଣ୍ଡିଆରେ ରିପୋର୍ଟ ପ୍ରକାଶ ପାଇଛି।

ରିପୋର୍ଟରେ ଜଳ ପ୍ରଦୂଷଣ ନିରନ୍ତର ବଢୁଛି। ୨୦୨୦ ମସିହାରେ କରାଯାଇଥିବା ଏକ ଏକ ବିସ୍ତୃତ ପରୀକ୍ଷାରେ ୧୧.୭% ନମୁନାରେ ୟୁରାନିୟମ ସୀମାଠାରୁ ମାତ୍ରାଧିକ ମିଳିଥିଲା। ଏବଂ ଉତ୍ତର ପଶ୍ଚିମ ଜିଲ୍ଲାର ଏକ ଟ୍ୟୁବୱେଲରୁ ସର୍ବାଧିକ ୮୯.୪ ପିପିବି ୟୁରାନିୟମ ରେକର୍ଡ କରାଯାଇଥିଲା। ୨୦୨୪ ସୁଦ୍ଧା, ୬ ଜିଲ୍ଲା - ଉତ୍ତର, ଉତ୍ତର ପଶ୍ଚିମ, ଦକ୍ଷିଣ, ଦକ୍ଷିଣ ପୂର୍ବ, ଦକ୍ଷିଣ ପଶ୍ଚିମ ଏବଂ ପଶ୍ଚିମରେ ଭୂତଳ ଜଳରେ ସୁରକ୍ଷିତ ସୀମାଠାରୁ ଅଧିକ ୟୁରାନିୟମ ଥିବା ରିପୋର୍ଟରେ କୁହାଯାଇଛି।

ଏହି ସଦ୍ୟତମ ତଥ୍ୟ ପରିବେଶବିତ ଓ ସମ୍ପର୍କିତ ସଂସ୍ଥାଗୁଡ଼ିକୁ ଚିନ୍ତାର ପକାଇଛି। ସେମାନେ ଜଳ-ମାନ ସମ୍ବନ୍ଧୀୟ ବିସ୍ତୃତ ତଥ୍ୟ ଏବଂ ଚିକିତ୍ସା ପ୍ରୋଟୋକଲ୍ ଉପରେ ସ୍ପଷ୍ଟତା ମାଗିଛନ୍ତି। ବିଶେଷକରି ଚିନ୍ତାଜନକ କଥା ହେଉଛି ଭୂତଳ ଜଳରେ କେବଳ ୟୁରାନିୟମ ନୁହେଁ, ନାଇଟ୍ରେଟ୍, ଫ୍ଲୋରାଇଡ୍ ଏବଂ ଲବଣତା ସ୍ତର ମଧ୍ୟ ଅଧିକ ରହୁଛି। ଯାହା ଗୁରୁତର ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିପାରେ।

ସ୍ୱାସ୍ଥ୍ୟ ଉପରେ ସାଂଘାତିକ ପ୍ରଭାବ

ନୂଆ ରିପୋର୍ଟ ଅନୁଯାୟୀ, ମାତ୍ରାଧିକ ୟୁରାନିୟମ, ଆର୍ସେନିକ୍ ଏବଂ ସୀସା ଭାଗ ଥିବା ପାଣି ଦୀର୍ଘଦିନ ଧରି ବ୍ୟବହାର କରିବା ଦ୍ୱାରା କିଡ୍ନୀ ସମସ୍ୟା, ସ୍ନାୟୁଗତ ସମସ୍ୟା, କଙ୍କାଳ ବିକୃତି ଏବଂ କର୍କଟ ରୋଗର ଆଶଙ୍କା ବଢ଼ିପାରେ। ଲୌହ ଏବଂ ମାଙ୍ଗାନିଜର ଉଚ୍ଚ ସ୍ତର ଥିଲେ ଶିଶୁ ଏବଂ ପିଲାମାନଙ୍କ ପାଇଁ ଅତିରିକ୍ତ ବିପଦ ସୃଷ୍ଟି କରେ। ଏହି ପ୍ରଦୂଷଣ ଭୂତଳ ଜଳର ପାନୀୟ କ୍ଷମତାକୁ ହ୍ରାସ କରିବା ସହ ମାଟି ଏବଂ ଫସଲରେ ବିଷାକ୍ତ ପଦାର୍ଥ ଜମା କରି କୃଷିକୁ ମଧ୍ୟ କ୍ଷତି ପହଞ୍ଚାଏ। ୟୁରାନିୟମ୍ ଏକ ଭାରୀ ଧାତୁ ଏବଂ ରେଡିଓଆକ୍ଟିଭ୍ ମୌଳିକ, ଏବଂ ଏହାର ସ୍ୱାସ୍ଥ୍ୟ ଉପରେ ପ୍ରଭାବ ମୁଖ୍ୟତଃ ବିକିରଣ ନୁହେଁ ବରଂ ଏହାର ରାସାୟନିକ ବିଷାକ୍ତତାରୁ ଆସିଥାଏ।