ଦିନିକିଆ ସିରିଜ୍ ଖେଳିବେ ନାହିଁ ଗିଲ୍ ! ଅଧିନାୟକ ଦୌଡ଼ରେ ଏହି ଖେଳାଳି

ନୂଆଦିଲ୍ଲୀ: ଯୁବ ଭାରତୀୟ କ୍ରିକେଟ ଅଧିନାୟକ ଶୁଭମନ ଗିଲ ଆହତ ଜନିତ ସମସ୍ୟା ଦେଇ ଗତି କରୁଛନ୍ତି। ଗୌହାଟୀରେ ଖେଳା ଯାଉଥିବା ଦକ୍ଷିଣ ଆଫ୍ରିକା ବିପକ୍ଷରେ ଦ୍ୱିତୀୟ ଟେଷ୍ଟରେ ସେ ଖେଳୁ ନାହାନ୍ତି। ତାଙ୍କ ସ୍ଥାନରେ ରିଷଭ ପନ୍ତ ଦଳର ଅଧିନାୟକତ୍ୱ କରୁଛନ୍ତି। ସଦ୍ୟତମ ଖବର ଅନୁଯାୟୀ, ଗିଲ୍ ଦିନିକିଆ ସିରିଜ୍‌ରୁ ବାଦ୍ ପଡ଼ି ପାରନ୍ତି। ଏମିତି ସ୍ଥିତିରେ ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜରେ ଦଳର ନେତୃତ୍ଵ କିଏ ନେବ ତାକୁ ନେଇ ଚର୍ଚ୍ଚା ଆରମ୍ଭ ହୋଇ ଯାଇଛି। କୁହାଯାଉଛି ଋଷଭ ପନ୍ତ ଦକ୍ଷିଣ ଆଫ୍ରିକା ବିପକ୍ଷରେ ଦିନିକିଆ ସିରିଜରେ ଦଳର ନେତୃତ୍ଵ ନେଇ ପାରନ୍ତି।

ଋଷଭ ପନ୍ତ ଅଗଷ୍ଟ ୨୦୨୪ରୁ ଦିନିକିଆ ଦଳରୁ ବାହାରେ ଅଛନ୍ତି। କିନ୍ତୁ ଏବେ ସେ କେବଳ ଦିନିକିଆ ଦଳକୁ ଫେରିବେ ନାହିଁ ବରଂ ତାଙ୍କୁ ଅଧିନାୟକ ଦାୟିତ୍ଵ ମଧ୍ୟ ତୁଲାଇବେ। ଦି ୱିକରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଭାରତୀୟ ଦଳ ପରିଚାଳନା ଶୁଭମନ ଗିଲଙ୍କୁ ନେଇ କୌଣସି ପ୍ରକାରର ତରବରିଆ ନିଷ୍ପତ୍ତି ନେବାକୁ ଚାହୁଁ ନାହାନ୍ତି। ଗିଲଙ୍କ ବେକରେ ଆଘାତ ଲାଗିଛି। ସେ କୋଲକାତାରେ ଦକ୍ଷିଣ ଆଫ୍ରିକା ବିପକ୍ଷରେ ପ୍ରଥମ ଟେଷ୍ଟର ପ୍ରଥମ ଇନିଂସରେ ଆହତ ହୋଇଥିଲେ।

ପନ୍ତ ଶେଷ ଥର ପାଇଁ ଅଗଷ୍ଟ ୨୦୨୪ରେ ଶ୍ରୀଲଙ୍କା ବିପକ୍ଷରେ ଏକ ଦିନିକିଆ ଖେଳିଥିଲେ। ସେବେଠାରୁ ତାଙ୍କୁ ୫୦ ଓଭର ଏବଂ ଟି-୨୦ ଆନ୍ତର୍ଜାତୀୟ ଫର୍ମାଟରୁ ବାଦ ଦିଆଯାଇଛି। କେଏଲ ରାହୁଲ ଦିନିକିଆରେ ପ୍ରଥମ ପସନ୍ଦର ୱିକେଟ କିପର ବ୍ୟାଟର ଭାବରେ ଖେଳି ଆସୁଛନ୍ତି। ପୂର୍ବରୁ ଏକ ରିପୋର୍ଟରେ କୁହାଯାଇଥିଲା ଯେ ଗିଲ୍ ଏବଂ ଆୟରଙ୍କ ଅନୁପସ୍ଥିତିରେ କେଏଲ ରାହୁଲଙ୍କୁ ମଧ୍ୟ ଅଧିନାୟକ ନିଯୁକ୍ତ କରାଯାଇପାରେ।

ଶ୍ରେୟସ ଆୟର ଖେଳିବେ ନାହିଁ

ସୂଚନାଯୋଗ୍ୟ, ଶ୍ରେୟସ ଆୟରଙ୍କୁ ଦିନିକିଆରେ ଟିମ୍ ଇଣ୍ଡିଆର ଉପ-ଅଧିନାୟକ ନିଯୁକ୍ତ କରାଯାଇଥିଲା। ଗିଲଙ୍କ ଅନୁପସ୍ଥିତିରେ ଆୟର ଅଧିନାୟକ ପଦ ଗ୍ରହଣ କରିଥାନ୍ତେ, କିନ୍ତୁ ସେ ଆହତ ହୋଇଛନ୍ତି। ଶ୍ରେୟସ ଆୟର ଦକ୍ଷିଣ ଆଫ୍ରିକା ବିପକ୍ଷରେ ଦିନିକିଆ ସିରିଜରେ ଖେଳିପାରିବେ ନାହିଁ। ଏହି କାରଣରୁ ପନ୍ତଙ୍କୁ ଅଧିନାୟକ ପଦ ଦିଆଯିବାର ରିପୋର୍ଟ ସାମ୍ନାକୁ ଆସିଛି। ରୋହିତ ଶର୍ମା ଏବଂ କେଏଲ ରାହୁଲଙ୍କ ପରି ବରିଷ୍ଠ ଖେଳାଳିମାନେ ମଧ୍ୟ ଦକ୍ଷିଣ ଆଫ୍ରିକା ବିପକ୍ଷରେ ଦିନିକିଆ ସିରିଜ ଖେଳିବେ।

ଭାରତ-ଦକ୍ଷିଣ ଆଫ୍ରିକା ଦିନିକିଆ ସିରିଜ କ୍ରୀଡ଼ାସୂଚୀ

ପ୍ରଥମ ଦିନିକିଆ - ନଭେମ୍ବର ୩୦, ରାଞ୍ଚି

ଦ୍ୱିତୀୟ ଦିନିକିଆ - ଡିସେମ୍ବର ୩, ରାୟପୁର

ତୃତୀୟ ଦିନିକିଆ - ଡିସେମ୍ବର ୬, ବିଶାଖାପାଟଣା