ହୃଦୟସ୍ପର୍ଶୀ ଦୃଶ୍ୟ : ନିଜ ଛୁଆକୁ କୂଅରୁ ଉଦ୍ଧାର କଲା ମା' ହାତୀ

ଢେଙ୍କାନାଳ: ଢେଙ୍କାନାଳ ବନାଞ୍ଚଳରେ ଏକ ହୃଦୟସ୍ପର୍ଶୀ ଦୃଶ୍ୟ ଦେଖିବାକୁ ମିଳିଛି। ଗୋଟିଏ ମା' ହାତୀ ତାର ଛୁଆ ପାଇଁ ନିଜ ଜୀବନକୁ ବି ବାଜି ଲଗେଇ ଦେଇଛି। ତାର ଶୁଣ୍ଢ ସାହାଯ୍ୟରେ କୂଅରେ ପଡ଼ିଯାଇ ଥିବା ନିଜ ଛୁଆକୁ କରିଛି ଉଦ୍ଧାର। ଏହି ଘଟଣା ସଂପୃକ୍ତ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।

ଘଟଣାଟି ଢେଙ୍କାନାଳ ସଦର ରେଞ୍ଜର ମେରାମୁଣ୍ଡଳୀ ସେକ୍ସନ ଅନ୍ତର୍ଗତ ଖଡଗ ପ୍ରସାଦ ଗ୍ରାମ ନିକଟରେ ଘଟିଥିଲା। ହାତୀ ପଲ ସେହି ବାଟ ଦେଇ ଯାଉଥିବା ବେଳେ ଗୋଟିଏ ଛୁଆହାତୀ ଏକ ପରିତ୍ୟକ୍ତ କୂଅରେ ପଡ଼ି ଯାଇଥିଲା। ଯେତେବେଳେ ଅନ୍ୟ ହାତ ପଲ ସେଠାରୁ ପଳାଇ ଯାଇଥିଲେ , ହେଲେ ମା' ହାତୀଟି କିନ୍ତୁ ପଛରେ ରହି ଯାଇଥିଲା ଏବଂ ନିଜ ଛୁଆକୁ ଉଦ୍ଧାର କରିବା ପାଇଁ ଅକ୍ଲାନ୍ତ ପରିଶ୍ରମ କରିଥିଲା।  ସେ ତାର ଶୁଣ୍ଢ ସାହାଯ୍ୟରେ ସାବଧାନତାର ସହ ଛୁଆକୁ କୂଅରୁ ଉଠାଇ ଥିଲା। ହାତୀଟି ଏପରି ଅକ୍ଲାନ୍ତ ପରିଶ୍ରମ ପ୍ରାୟ ଏକ ଘଣ୍ଟା ଧରି ଚଳେଇ ଥିଲା। ଆଉ ଶେଷରେ ସଫଳ ହୋଇଥିଲା।

ଖବର ପାଇ ଆଖପାଖ ଅଞ୍ଚଳର ଲୋକେ ସେଠାରେ ଭିଡ ଜମେଇଥିଲେ। ଲୋକଙ୍କ ଉପସ୍ଥିତି ସତ୍ତ୍ୱେ, ମା' ହାତୀ ତା କାର୍ଯ୍ୟରୁ ବିଚ୍ୟୁତ ହୋଇ ନଥିଲା। ତା ଛୁଆକୁ ଉଦ୍ଧାର କରିବା ଉପରେ ଧ୍ୟାନ କେନ୍ଦ୍ରିତ କରିଥିଲା। କେବେବି ବିଚଳିତ ହୋଇ ନଥିଲା। ସଫଳତାର ସହ ତା ଛୁଆଙ୍କୁ କୂଅରୁ ଉଦ୍ଧାର କରିବା ପରେ, ସେ ଛୁଆକୁ ସାଥିରେ ନେଇ ନିକଟସ୍ଥ ଜଙ୍ଗଲକୁ ପଳାଇ ଥିଲା ଏବଂ ନିମିଷକେ ସେଠାରୁ ଅଦୃଶ୍ୟ ହୋଇ ଯାଇଥିଲା।

ଏହି ଦୃଶ୍ୟ ଜଣେ ମା' ଓ ତା ପିଲା ମଧ୍ୟରେ ଥିବା ଗଭୀର ଓ ଅନାବିଳ ସମ୍ପର୍କକୁ ଦର୍ଶାଇ ଥାଏ। ନିଜ ଛୁଆ ପାଇଁ ମାଆର ମମତା କେତେ ଯେ ବଡ଼ ଆଶୀର୍ବାଦ ଏହା ଚିତ୍ରାୟନ କରେ। ସେଥିପାଇଁ ତ କୁହାଯାଏ ମାଆ ପରି କିଏ ହେବ। ପିଲାକୁ ମୃତ୍ୟୁ ମୁଖରୁ ବଞ୍ଚାଇବାରେ ମାଆ ହିଁ ସିଦ୍ଧହସ୍ତ । ଯାହା ଏହି ହାତୀ ଛୁଆ ଉଦ୍ଧାର ଘଟଣାକୁ ସହଜରେ ଅନୁମେୟ କରି ହୁଏ। ମା' ହାତୀଟିର ତା ଛୁଆ ପ୍ରତି ସମର୍ପଣ ଭାବ ଏବଂ ପ୍ରେମ ପ୍ରାଣୀ ଜଗତରେ ମିଳୁଥିବା ଦୃଢ଼ ମାତୃତ୍ୱ ପ୍ରବୃତ୍ତିର ଚାକ୍ଷୁଶ ପ୍ରମାଣ।