ଛତିଶଗଡ ଟ୍ରେନ୍ ଦୁର୍ଘଟଣାରେ ଗଲାଣି ୧୧ ଜଣଙ୍କ ଜୀବନ, ସିଗନାଲକୁ ଅଣଦେଖା କରିଥିଲେ ଲୋକୋ ପାଇଲଟ୍

ନୂଆଦିଲ୍ଲୀ ୦୫।୧୧; ମଙ୍ଗଳବାର ଛତିଶଗଡ଼ରେ ବଡ ଟ୍ରେନ୍ ଦୁର୍ଘଟଣା ହୋଇଥିଲା। ଏଥିରେ ଏପର୍ଯ୍ୟନ୍ତ ୧୧ ଜଣଙ୍କର ମୃତ୍ୟୁ ହୋଇଛି। ଏହା ସହ ଅନେକ ଗୁରୁତର ଆହତ ହୋଇଛନ୍ତି। ଆହତଙ୍କ ପାଇଁ କ୍ଷତିପୂରଣ ଘୋଷଣା କରାଯାଇଛି। ୨୦ ଜଣ ଆହତଙ୍କ ୫୦,୦୦୦ ଟଙ୍କା ମିଳିବ। ଭାରତୀୟ ରେଳବାଇ ଦୁର୍ଘଟଣାର ପ୍ରତିକ୍ରିୟା ଏବଂ ଦୁର୍ଘଟଣାର କାରଣ ପ୍ରକାଶ କରିଛି।

ରେଳବାଇ ଦୁର୍ଘଟଣା ବିଷୟରେ ଗୁରୁତ୍ୱପୂର୍ଣ୍ଣ ସୂଚନା ସେୟାର କରିଛି। ବିଳାସପୁର ଦୁର୍ଘଟଣାର କାରଣ ବ୍ୟାଖ୍ୟା କରି ରେଳବାଇ କହିଛି, "ପ୍ରାଥମିକ ମୂଲ୍ୟାଙ୍କନ ଅନୁସାରେ, DEMU (ଡିଜେଲ୍ ଇଲେକ୍ଟ୍ରିକ୍ ମଲ୍ଟିପଲ୍ ୟୁନିଟ୍) ଟ୍ରେନ୍ ଏକ ବିପଦପୂର୍ଣ୍ଣ ସ୍ଥାନରେ ସିଗନାଲ ପାର କରିଥିଲା। ଯାହା ଦୁର୍ଘଟଣାର କାରଣ ହୋଇଥିଲା। ଯାତ୍ରୀବାହୀ ଟ୍ରେନ୍ ଏକ ମାଲବାହୀ ଟ୍ରେନ୍ ସହିତ ଧକ୍କା ହୋଇଥିଲା। ଏହା ଏତେ ତୀବ୍ର ଥିଲା ଯେ MEMU ଟ୍ରେନର ପ୍ରଥମ କୋଚ୍ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲା ।

ରେଳ ଟ୍ରାକ୍ ମରାମତି ପାଇଁ ଚାଲିଛି କାର୍ଯ୍ୟ

ଦୁର୍ଘଟଣା ପରେ ଟ୍ରେନ୍ କୋଚ୍ ଗୁଡ଼ିକ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା। କୋଚ୍‌ର ଅନେକ ଅଂଶ ରେଳ ଟ୍ରାକ୍ ଉପରେ ବିଛାଡ଼ି ହୋଇ ପଡିଥିଲା। ଉଦ୍ଧାରକାରୀ ଦଳ ପହଞ୍ଚିବା ପରେ, ଟ୍ରାକ୍ ସଫା କରିବା କାମ ଦ୍ରୁତ ଗତିରେ ଆରମ୍ଭ ହୋଇଥିଲା। ଏହା ଅନେକ ଟ୍ରେନକୁ ମଧ୍ୟ ପ୍ରଭାବିତ କରିଛି। ରେଳବାଇ କହିଛି ଯେ ଦୁର୍ଘଟଣାରେ ପ୍ରଭାବିତ ଲୋକଙ୍କୁ ସମସ୍ତ ସହାୟତା ଯୋଗାଇ ଦିଆଯାଉଛି। ରେଳବାଇ ବୋର୍ଡ କହିଛି, "ସଠିକ କାରଣ ଜାଣିବା ପାଇଁ ରେଳ ସୁରକ୍ଷା କମିଶନର (CRS) ସ୍ତରରେ ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଯିବ।