Assam: ପୂର୍ବୋତ୍ତରରେ ନୂଆ ସୈନ୍ୟ ଷ୍ଟେସନ, ବାଂଲାଦେଶ ସୀମାରୁ ୪୦ କି.ମି. ଦୂର; ସୁରକ୍ଷା ଓ ଗୁଇନ୍ଦା ତନ୍ତ୍ର ପାଇଁ ଗୁରୁତ୍ୱପୂର୍ଣ୍ଣ

ନୂଆଦିଲ୍ଲୀ: ବାଂଲାଦେଶର ପାକିସ୍ତାନ ଓ ଚୀନ ସହ ବଢୁଥିବା ଘନିଷ୍ଠତାକୁ ଭାରତର ପୂର୍ବୋତ୍ତର ସୁରକ୍ଷା ପାଇଁ ଆହ୍ୱାନ ହୋଇପାରେ । ଏହାର ମୁକିବାଲ ପାଇଁ ଭାରତୀୟ ସେନା ବଡ଼ ରଣନୀତିରେ କାମ କରୁଛି । ଆସାମର ଧୁବରୀ ଜିଲ୍ଲାର ବମୁନିଗାଁରେ ଭାରତୀୟ ସେନା ଲାଚିତ ବୋରଫୁକନ ମିଲିଟାରୀ ଷ୍ଟେସନ୍ ନିର୍ମାଣ କରୁଛି । ଏହା ବାଂଲାଦେଶ ସୀମାଠାରୁ ପ୍ରାୟ ୪୦ କିଲୋମିଟର ଦୂରରେ ରହିଛି । ଏହା ପଶ୍ଚିମ ଆସମର ପ୍ରଥମ ଏପରି ଷ୍ଟେସନ ହେବ, ଯିଏ ସୀମା ସୁରକ୍ଷା ଓ ଗୁଇନ୍ଦା ସୂଚନା ଏକାଠି କରିବାରେ ସେନାକୁ ସାହାଯ୍ୟ କରିବ । ପୂର୍ବ କମାଣ୍ଡର ଜେନେରାଲ୍ ଅଫିସର କମାଣ୍ଡିଂ-ଇନ୍-ଚିଫ୍ ଲେଫ୍ଟନାଣ୍ଟ ଜେନେରାଲ୍ ଆରସି ତିୱାରୀ ନିକଟରେ ଫରୱାର୍ଡ ପୋଷ୍ଟ ଗସ୍ତ ବେଳେ ଏହି ସୈନ୍ୟ ଷ୍ଟେସନର ଭିତ୍ତିପ୍ରସ୍ତର ସ୍ଥାପନ କରିଥିଲେ ।

ପୂର୍ବତନ ସେନା ଅଧିକାରୀ କହିଛନ୍ତି, ବାଂଲାଦେଶରେ ବର୍ତ୍ତମାନର ରାଜନୀତିକ ସ୍ଥିତିକୁ ଦେଖି ଏହି ନିଷ୍ପତ୍ତି ସ୍ୱାଗତଯୋଗ୍ୟ ଅଟେ । ପ୍ରଥମେ ସବୁଠୁ ନିକଟତର ସୈନ୍ୟ କ୍ୟାମ୍ପ କୁଚବିହାର (ପଶ୍ଚିମବଙ୍ଗ) ଓ ତମୁଲପୁର (ଆସମ)ରେ ଥିଲା । ଏବେ ଧୁବରୀରେ ନୂଆ ଷ୍ଟେସନ ନିର୍ମାଣ ହେବା ପରେ ହ୍ୟୁମନ ଓ ସିଗନଲ୍ ଇଣ୍ଟେଲିଜେନ୍ସି ଉଭୟକୁ ମଜଭୁତି ମିଳିବ । ଅନ୍ୟପଟେ ସେନାର ମୁଖପାତ୍ର ଲେଫ୍ଟନାଣ୍ଟ କର୍ଣ୍ଣଲ ମହେନ୍ଦ୍ର ରାୱତ କହିଛନ୍ତି ଯେ ଏହି ଷ୍ଟେସନ କ୍ଷେତ୍ରରେ ସେନାର ସଂଚାଳନ କ୍ଷମତା ଓ ଭିତ୍ତିଭୂମିକୁ ମଜଭୁତ କରିବ । ସେ କହିଛନ୍ତି, ଏହାଦ୍ୱାରା ଅଞ୍ଚଳରେ ନରୀକ୍ଷିଣ ସହଜ ହେବ ଓ ସ୍ଥାନୀୟ ଲୋକଙ୍କ ମଧ୍ୟରେ ସୁରକ୍ଷା ଭାବନା ମଧ୍ୟ ବଢିବ ।

ଜଣେ ସେନା ଅଧିକାରୀ କହିଛନ୍ତି ଯେ ଏହି ନୂତନ ଷ୍ଟେସନ ତେଜପୁରରେ ଅବସ୍ଥିତ ଚତୁର୍ଥ କୋର୍ପସ ଅଧୀନରେ ରହିବ ଏବଂ ଏଥିରେ ପ୍ରାୟ ୧୨୦୦ରୁ ୧୫୦ ସୈନିକ ରହିବେ । ପ୍ରକଳ୍ପକୁ ତ୍ୱରାନ୍ୱିତ କରିବା ପାଇଁ ପ୍ରି-ଫାବ୍ରିକେଟେଡ୍ କୁଡ଼ିଆ ନିର୍ମାଣ କରାଯାଉଛି । ଆସାମ ସରକାର ଏହି ପ୍ରକଳ୍ପ ପାଇଁ ଜମିକୁ ମାତ୍ର ମାସେରୁ ଦୁଇ ମାସ ମଧ୍ୟରେ ସେନାକୁ ହସ୍ତାନ୍ତର କରିଛନ୍ତି । ଏହି ଷ୍ଟେସନରେ ଏକ ପାରା-କମାଣ୍ଡୋ ୟୁନିଟ୍ ମଧ୍ୟ ନିୟୋଜିତ କରାଯିବ । ଲେଫ୍ଟନାଣ୍ଟ କର୍ଣ୍ଣେଲ ରାୱତ କହିଛନ୍ତି, "ଲଚିତ ବୋରଫୁକନ ସାମରିକ ଷ୍ଟେସନ ସଶସ୍ତ୍ର ବାହିନୀ ଏବଂ ରାଜ୍ୟ ପ୍ରଶାସନ ମଧ୍ୟରେ ସମନ୍ୱୟର ପ୍ରତୀକ । ଏହା ଜାତୀୟ ସୁରକ୍ଷା ଏବଂ ଆଞ୍ଚଳିକ ବିକାଶ ପାଇଁ ଏକ ସହଭାଗୀ ଦୃଷ୍ଟିକୋଣକୁ ପ୍ରତିଫଳିତ କରେ।"