ବିକଶିତ ଭାରତ ଶିକ୍ଷା ଅଧିକ୍ଷଣ ବିଲ୍‌କୁ କ୍ୟାବିନେଟ୍ ମଞ୍ଜୁରୀ, ପ୍ରତିଷ୍ଠା ହେବ ଏକୀକୃତ ନିୟାମକ

ନୂଆଦିଲ୍ଲୀ,୧୩/୧୨: ସଂସଦର ଚଳିତ ଶୀତ ଅଧିବେଶନରେ ସଂସଦରେ କେନ୍ଦ୍ରର ମୋଦି ସରକାର ଆଣିବାକୁ ଯାଉଛନ୍ତି ଆଉ ଗୋଟିଏ ବିଲ୍ । ଯାହା ଗୃହୀତ ହେବା ପରେ ଉଚ୍ଚଶିକ୍ଷାରେ ଆସିବ ବଡ଼ ପରିବର୍ତ୍ତନ । ଏହି ବିଲ୍କୁ କେନ୍ଦ୍ର କ୍ୟାବିନେଟ ମଞ୍ଜୁରି ପ୍ରଦାନ କରିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ କ୍ୟାବିନେଟ ବୈଠକ ଅନୁଷ୍ଠିତ ହୋଇଥିଲା । ଖୁବଶୀଘ୍ର ସଂସଦରେ ଏହି ବିଲ୍‌କୁ ଆଗତ କରାଯିବ । ପ୍ରସ୍ତାବିତ ବିଲ୍ ଭାରତର ଉଚ୍ଚଶିକ୍ଷା କମିଶନ (ଏଚ୍ଇସିଆଇ)ର ନାମ ପରିବର୍ତ୍ତନ କରାଯାଇ ବିକଶିତ ଭାରତ ଶିକ୍ଷା ଅଧିକ୍ଷଣ ବିଲ୍ କରାଯାଇଛି ।

ଏହି ବିଲ୍‌ରେ ଉଚ୍ଚଶିକ୍ଷା ପାଇଁ ଏକ ୟୁନିଫାଏଡ ରେଗୁଲେଟର (ଏକୀକୃତ ନିୟାମକ) ପ୍ରତିଷ୍ଠା କରାଯିବାର ପ୍ରାବଧାନ ରହିଛି । ଅର୍ଥାତ ଏହି ବିଲ୍ ଗୃହୀତ ହେବା ପରେ ଏହା ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି), ସର୍ବଭାରତୀୟ ବୈଷୟିକ ଶିକ୍ଷା ପରିଷଦ (ଏଆଇସିଟିଇ) ଏବଂ ଜାତୀୟ ଶିକ୍ଷକ ଶିକ୍ଷା ପରିଷଦ (ଏନସିଟିଇ) ଭଳି ବର୍ତ୍ତମାନର ସଂସ୍ଥାକୁ ଗୋଟିଏ ପ୍ଲାଟଫର୍ମକୁ ଆଣିବ ।

ଜାତୀୟ ଶିକ୍ଷାନୀତି (ଏନ୍ଇପି) ୨୦୨୦ ଆଧାରରେ ଭାରତୀୟ ଉଚ୍ଚଶିକ୍ଷା କ୍ଷେତ୍ରର ସଂଚାଳନ ଓ ତଦାରଖକୁ ସହଜ କରିବା ଉଦ୍ଦେଶ୍ୟରେ ଏହି ବିଲ୍ ଅଣାଯାଇଛି । ପ୍ରସ୍ତାବିତ ନିୟାମକ ପ୍ରତିଷ୍ଠାର ଉଦ୍ଦେଶ୍ୟ ୟୁଜିସି, ଏଆଇସିଟିଇ ଏବଂ ଏନ୍ସିଟିଇର କାମକୁ ମିଶାଇ ଏକୀକୃତ ସଂସ୍ଥା ଗଠନ କରିବା । ଯାହାକି ମେଡିକାଲ ଓ ଆଇନ ମହାବିଦ୍ୟାଳୟକୁ ଛାଡ଼ି ଉଚ୍ଚଶିକ୍ଷା ପ୍ରତିଷ୍ଠାନରେ ଏକ ଶୈକ୍ଷିକ ନିୟନ୍ତ୍ରଣ, ପ୍ରମାଣନ ଓ ପେସାଗତ ମାନକ ସ୍ଥିର କରିବାର ଦାୟିତ୍ୱ ବହନ କରିବ । ବର୍ତ୍ତମାନ ଏହି ନିୟାମକ କେନ୍ଦ୍ର ଶିକ୍ଷା ମନ୍ତ୍ରଣାଳୟ ଅନ୍ତର୍ଗତ ଉଚ୍ଚଶିକ୍ଷା ବିଭାଗ ଅଧୀନରେ ରହି କାର୍ଯ୍ୟ କରିବ ।

ବର୍ତ୍ତମାନ ୟୁଜିସି ଅଣ-ଟେକ୍ନିକାଲ ଉଚ୍ଚଶିକ୍ଷା ବିଭାଗ କଥା ବୁଝୁଥିଲା ବେଳେ ଏଆଇସିଟିଇ ଟେକ୍ନିକାଲ ଶିକ୍ଷା କଥା ସମ୍ଭାଳୁଛି । ସେହିଭଳି ଏନ୍ସିଟିଇ ଶିକ୍ଷକ ଶିକ୍ଷାର ପରିଚାଳନା କରୁଛି । ନୂଆ ବିଲ୍ରେ କେବଳ ଗୋଟିଏ ନିୟାମକ ହିଁ ଏସବୁ ବିଷୟ ନିୟନ୍ତ୍ରଣ କରିବାର ବ୍ୟବସ୍ଥା ରହିଛି । ଏକୀକୃତ ସଂସ୍ଥା ଦ୍ୱାରା ଉଚ୍ଚଶିକ୍ଷାର ତଦାରଖ କରିବା ପ୍ରସ୍ତାବ ଉପରେ ବହୁଦିନ ହେଲା ବିଚାର ଆଲୋଚନା ଜାରି ରହିଛି । ଏଚ୍ଇସିଆଇ ବିଲ୍‌ର ପ୍ରଥମ ଚିଠା ୨୦୧୮ରେ ଆସିଥିଲା ।

ସେତେବେଳେ ଏହାର ଉଦ୍ଦେଶ୍ୟ ଥିଲା ୟୁଜିସିକୁ ରଦ୍ଦ କରି ଏକ ନୂଆ କେନ୍ଦ୍ରୀୟ ଆୟୋଗ ଗଠନ କରିବା । କିନ୍ତୁ ସେତେବେଳେ ରାଜ୍ୟସ୍ତରରେ ଏହାର ଜୋର୍ଦାର ବିରୋଧ କରାଯାଇଥିଲା । ରାଜ୍ୟ ସରକାରମାନେ ଅଭିଯୋଗ କରିଥିଲେ କି ଏଭଳି ହେବା ଫଳରେ ସବୁ କିଛି କେନ୍ଦ୍ର ହାତକୁ ଚାଲିଯିବ । ଯାହାଫଳରେ ଏହି ବିଲ୍ ଉପରେ ଆଉ ଚର୍ଚ୍ଚା ହୋଇନଥିଲା ।

ବର୍ତ୍ତମାନ ଯେଉଁ ନୂଆ ବିଲ୍ ଆସିଛି ତାହା ଜାତୀୟ ଶିକ୍ଷାନୀତି ୨୦୨୦ର ଭିଜନ ଲାଗୁ କରିବାର ଉଦ୍ଦେଶ୍ୟରେ ହିଁ ଅଣାଯାଇଛି । ଜାତୀୟ ଶିକ୍ଷାନୀତିର କହିବାନୁଯାୟୀ ଉଚ୍ଚଶିକ୍ଷା ବ୍ୟବସ୍ଥାକୁ ଆଧୁନିକ ତଥା ସରଳ କରିବା ଲାଗି ଏକୀକୃତ ନିୟାମକ ହେବା ଆବଶ୍ୟକ । ଯାହା ଟେକ୍ନିକାଲ ଶିକ୍ଷା ଓ ଶିକ୍ଷକ ଶିକ୍ଷା ଭଳି ସବୁ ବିଷୟର ପରିଚାଳନା କରିବ ।