ବେନ୍ ଡକେଟଙ୍କୁ କଙ୍ଗାରୁ ଫ୍ୟାନ୍ସଙ୍କ ସ୍ଲେଜିଂ, ପଚାରିଲେ 'ବିଅର୍ ପିଇବ କି' ?

ନୂଆଦିଲ୍ଲୀ, ୨୯/୧୨: କିଛି ଦିନ ତଳେ ଇଂଲଣ୍ଡ ଖେଳାଳିଙ୍କ ଏକ ଭିଡିଓ ଭାଇରାଲ ହୋଇଥିଲା । ଯେଉଁଥିରେ କିଛି କ୍ରିକେଟର ମଦ୍ୟପାନ କରୁଥିଲେ । ଆଉ କିଛି ନାଇଟ୍ କ୍ଲବରେ ପାର୍ଟି କରୁଥିଲେ । ଆସେସ୍ ସିରିଜ ହାରିବା ପରେ ଇଂଲଣ୍ଡ ଖେଳାଳିଙ୍କ ମଜାମସ୍ତି ଫ୍ୟାନ୍ସଙ୍କୁ ନିରାଶ କରିଥିଲା । ଭାଇରାଲ ହୋଇଥିବା ଭିଡିଓରେ ସବୁଠୁ ଚର୍ଚ୍ଚାରେ ଥିଲେ ବେନ୍ ଡକେଟ୍ । ସେ ଏତେ ମାତ୍ରାରେ ମଦ ପିଇଥିଲେ ଯେ ଠିକ୍ ଭାବେ କଥା କହିପାରୁ ନଥିଲେ । ଏବେ ପଡିଆରେ ମଧ୍ୟ ତାଙ୍କୁ ଭିଡିଓ ପାଇଁ ସମାଲୋଚନାର ଶିକାର ହେବାକୁ ପଡିଛି । ଯାହାର ଜବାବ ମଧ୍ୟ ଡକେଟ୍ ଦେଇଛନ୍ତି ।

ରିପୋର୍ଟ ଅନୁସାରେ, ଇଂଲଣ୍ଡ ଅଷ୍ଟ୍ରେଲିଆରେ ଆସେସ ସିରିଜ୍ ଖେଳୁଛି । ହ୍ୟାଟ୍ରିକ ପରାଜୟ ପରେ ବକ୍ସି ଡେ ଟେଷ୍ଟରେ ବିଜୟୀ ହୋଇଛି ଇଂଲଣ୍ଡ । ତେବେ ମ୍ୟାଚର ଦ୍ୱିତୀୟ ଦିନରେ ବାଉଣ୍ଡରୀ ଲାଇନରେ ଫିଲ୍ଡିଂ କରୁଥିଲେ ବେନ୍ ଡକେଟ୍ । ଏହି ସମୟରେ କିଛି ଅଷ୍ଟ୍ରେଲୀୟ ଫ୍ୟାନ୍ସ ତାଙ୍କୁ ସମାଲୋଚନା କରିଥିଲେ । ଏପରିକି ବିଅର୍ ପିଇବ କି କହି ପ୍ରଶ୍ନ କରିଥିଲେ ।

ସାଧାରଣ ଭାବେ ଏପରି ପ୍ରଶ୍ନ କଲେ ଯେ କେହି ବି ରାଗିଯିବ । କିନ୍ତୁ ବେନ୍ ଡକେଟ୍ ସେପରି କିଛି କରିନଥିଲେ । ସେ ସମାଲୋଚନାକୁ ସଠିକ ଭାବେ ଗ୍ରହଣ କରିଥିଲେ । ଫ୍ୟାନ୍ସଙ୍କ ପ୍ରତି କୌଣସି ଆକ୍ଷେପ ନକରି ଚୁପ୍ ରହିଥିବା ଦେଖିବାକୁ ମିଳିଥିଲା ।

ମୁକାବିଲାରେ ଡକେଟ୍ ଦମଦାର ପାଳି ଖେଳିଥିଲେ । ସେ ୩୪ ରନ୍ କରିଥିଲେ । ଯାହା ଇଂଲଣ୍ଡ ବିଜୟରେ ବଡ ଭୂମିକା ନେଇଥିଲା । ମୁକାବିଲାରେ ଅଷ୍ଟ୍ରେଲିଆକୁ ହରାଇ ଇଂଲଣ୍ ପରାଜୟର ଧାରାରେ ବ୍ରେକ୍ ଲଗାଇଛି । ଏହାସହ କ୍ଲିନ୍ ସ୍ୱିପ୍ ଆଶଙ୍କାକୁ ଏଡାଇଛି । ୧୭୫ ରନର ଟାର୍ଗେଟକୁ ଦଳ ମ୍ୟାଚର ଦ୍ୱିତୀୟ ଦିନରେ ହିଁ ହାସଲ କରିନେଇଥିଲା । ଫଳରେ ସିରିଜ୍ ଏବେ ୩-୧କୁ ଆସିଛି ।