ଜୀବିତ କବର ନେଲେ ହମାସର ୨୦୦ ଆତଙ୍କବାଦୀ! ସୁଡ଼ଙ୍ଗକୁ ସିମେଣ୍ଟ କଂକ୍ରିଟରେ ପ୍ୟାକ କରିଦେଲା ଇସ୍ରାଏଲ

ଜେରୁଜେଲମ ୧୦।୧୧: ଯେଉଁ ସୁଡ଼ଙ୍ଗକୁ ହମାସ ନିଜର ସବୁଠୁ ବଡ଼ ତାକତ ବୋଲି ଭାବୁଥିଲା ଏବେ ସେହି ସୁଡ଼ଙ୍କ ତା ପାଇଁ କବର ପାଲଟିଛି। ଇସ୍ରାଏଲ ଓ ଗାଜା ମଧ୍ୟରେ ଜାରି ଯୁଦ୍ଧବିରାମ ମଧ୍ୟରେ ଏକ ଏପରି ଭିଡିଓ ସାମ୍ନାକୁ ଆସିଛି ଯାହା ସାରା ବିଶ୍ୱକୁ ଦୋହଲାଇ ଦେଇଛି। ରିପୋର୍ଟ ଅନୁସାରେ ରାଫା ବର୍ଡର ନିକଟରେ ଇସ୍ରାଏଲୀ ଫୋର୍ସ ଏକ ବଡ଼ ଟନେଲ ବା ସୁଡ଼ଙ୍ଗ ଖୋଜି କାଢିଛି। ଯେଉଁଥିରେ ପାଖାପାଖି ୨୦୦ ହମାସ ଆତଙ୍କବାଦୀ ଫଶି ରହିଛନ୍ତି।

କୁହାଯାଉଛି ହମାସର ଏହି ଆତଙ୍କବାଦୀମାନେ ମାର୍ଚ୍ଚ ୨୦୨୫ରୁ ଅର୍ଥାତ ପାଖାପାଖି ୭ ମାସ ହେଲା ଏହି ସୁଡ଼ଙ୍ଗରେ ଅଛନ୍ତି। ଏବେ ଇସ୍ରାଏଲ ଏହି ସୁଡ଼ଙ୍ଗର ୪ ପାଖରେ ଥିବା ବାହାରିବା ରାସ୍ତାଗୁଡିକୁ ବିସ୍ଫୋରକ ଏବଂ କଂକ୍ରିଟରେ ବନ୍ଦ କରିଦେଇଛି। ସେପଟେ ଗାଜା ସୁଡ଼ଙ୍ଗରେ ଫଶି ରହିଥିବା ୨୦୦ ଲୋକଙ୍କ ସୁରକ୍ଷିତ ନିଷ୍କାସନ ପାଇଁ କାମ କରୁଛି। ହମାସ ପୂର୍ବରୁ କହିଥିଲା ଇସ୍ରାଏଲ ନିୟନ୍ତ୍ରିତ ରାଫା କ୍ଷେତ୍ରର ସୁଡ଼ଙ୍ଗରେ ଲୁଚିଥିବା ଲୋକେ ଇସ୍ରାଏଲ ନିକଟରେ ଆତ୍ମସମର୍ପଣ କରିବେ ନାହିଁ, ଏଣୁ ମଧ୍ୟସ୍ଥଙ୍କ ମାଧ୍ୟମରେ ଏହି ସଂକଟର ସମାଧାନ କରିବାକୁ ଆଗ୍ରହ କରିଥିଲା।

ଏବେ ସୁଡ଼ଙ୍ଗରେ ଫଶି ରହିଥିବା ଲୋକେ ମାସକ ପୂର୍ବରୁ ଆରମ୍ଭ ହୋଇଥିବା ଯୁଦ୍ଧବିରାମ ପାଇଁ ବିପଦ ପାଲଟି ଯାଇଛନ୍ତି। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁ ଗତ କିଛି ସପ୍ତାହ ହେଲା କହି ଆସୁଛନ୍ତି ସୁଡଙ୍ଗରୁ ବାହାରିବାକୁ ଥିବା ଆତଙ୍କବାଦୀଙ୍କୁ ହୁଏତ ମାରି ଦିଆଯିବ ନଚେତ ଗିରଫ କରାଯିବ। ତେବେ ଇତି ମଧ୍ୟରେ ଇସ୍ରାଏଲ ସେନା ସୁଡ଼ଙ୍ଗର ସବୁ ନିଷ୍କାସନ ପଥକୁ ଖୋଜି ବାହାର କରିବା ସହ ସିମେଣ୍ଟ କଂକ୍ରିଟରେ ସିଲ କରିଦେଇଛି। ଫଳରେ ସୁଡ଼ଙ୍ଗରେ ଲୁଚିଥିବା ୨୦୦ ହମାସ ଆତଙ୍କବାଦୀ ଜୀବିତ କବର ନେଇଛନ୍ତି।