ନ୍ୟୁୟର୍କରୁ ଭର୍ଜିନିଆ : ଟ୍ରମ୍ପଙ୍କ ପାଇଁ ଟେନସନ୍ ୩ ଭାରତୀୟ ବଂଶୋଦ୍ଭବ

ନ୍ୟୁୟର୍କ, ୦୬ |୧୧  :  ଟ୍ରମ୍ପଙ୍କୁ ଚ୍ୟାଲେଞ୍ଜ୍ ଦେଉଛନ୍ତି ଭାରତୀୟ ବଂଶୋଦ୍ଭବ । ଆମେରିକାରେ ରହି ୟୁଏସ ପ୍ରେସିଡେଣ୍ଟଙ୍କ ପାଇଁ ସାଜୁଛନ୍ତି କଣ୍ଟା । ଏହାସହ ଡେମୋକ୍ରାଟିକ୍ ପାର୍ଟିକୁ ସୁଦୃଢ କରୁଛନ୍ତି । ଯାହା ନ୍ୟୁୟର୍କ ମେୟର ନିର୍ବାଚନରେ ଦେଖିବାକୁ ମିଳିଛି । ଜୋହରାନ ମମଦାନୀ ମେୟର ନିର୍ବାଚନ ଜିତିବା ଟ୍ରମ୍ପଙ୍କ ପାଇଁ ଝଟକା ଥିଲା । ତାଙ୍କ ବ୍ୟତୀତ ଆଉ ଦୁଇ ଭାରତୀୟ ମଧ୍ୟ ଟ୍ରମ୍ପଙ୍କୁ ଦେଉଛନ୍ତି ଚେକ୍ ।

ତେବେ ଆମେରିକା ରାଷ୍ଟ୍ରପତିଙ୍କୁ ଗତ ବର୍ଷ ନଭେମ୍ବରରୁ ଚେକ୍ ଦେଉଥିବା ତିନି ନେତା ହେଲେ ମମଦାନୀ, ଅଫତାବ ପୁରେଭାଲ ଏବଂ ଘାଜାଲା ହାସମୀ । ଏହି ତିନିଜଣ ନ୍ୟୁୟର୍କ, ସିନସିନାଟି ଏବଂ ଭର୍ଜିନିଆର ବିଭିନ୍ନ ନିର୍ବାଚନରେ ବିଜୟ ହାସଲ କରିଛନ୍ତି । ଯାହା ରିପବ୍ଲିକାନ୍ ଦଳ ପାଇଁ ଚିନ୍ତାର କାରଣ ପାଲଟିଛି ।

ଜୋହରାନ ମମଦାନୀ

୩୪ ବର୍ଷୀୟ ଜୋହରାନ ହଠାତ ନିର୍ବାଚନରେ ଉଭା ହୋଇଥିଲେ । ଯାହା ସମସ୍ତଙ୍କୁ ଚକିତ କରିଥିଲା । ନିଜକୁ ସୋସିଆଲିଷ୍ଟ କହୁଥିବା ଜୋହରାନ ଏବେ ନ୍ୟୁୟର୍କର ମେୟର ପଦ ସମ୍ଭାଳିବେ । ଉଗାଣ୍ଡାରେ ଜନ୍ମିତ ଜୋହରାନଙ୍କ ମାଆ ମୀରା ନାୟର ଏବଂ ପିତା ମହମ୍ମଦ ମମଦାନୀ । ଯିଏକି କଲମ୍ବିଆ ବିଶ୍ବବିଦ୍ୟାଳୟରେ ପ୍ରଫେସର ଅଛନ୍ତି । ମହମ୍ମଦ ୭ ବର୍ଷର ହୋଇଥିବା ବେଳେ ନ୍ୟୁୟର୍କ ଚାଲିଯାଇଥିଲେ ।

ତେବେ ମମଦାନୀଙ୍କୁ ୨୦୧୮ରେ ଆମେରିକାର ନାଗରିକତ୍ୱ ପ୍ରାପ୍ତ ହୋଇଥିଲା । ସେହିବର୍ଷ ସେ ରାମା ଦୁଓ୍ୱାଜୀଙ୍କୁ ବିବାହ କରିଥିଲେ ।

ଅଫତାବ ପୁରେଭାଲ

୪୩ ବର୍ଷୀୟ ଅଫତାବ ସିନସିନାଟିର ମେୟର ଭାବେ ନିର୍ବାଚିତ ହୋଇଥିଲେ । ସେ ରିପବ୍ଲିକାନ ପାର୍ଟିର କୋରୀ ବୋମ୍ୟାନଙ୍କୁ ପରାସ୍ତ କରଥିଲେ । ୨୦୨୧ରେ ପ୍ରଥମ ଏସିଆନ-ଆମେରିକୀୟ ମେୟର ଭାବେ ସେ ଇତିହାସ ରଚିଥିଲେ ।   ବୋମାନ ୟୁଏସ ଉପ ରାଷ୍ଟ୍ରପତି ଜେଡି ଭାନ୍ସିଙ୍କ ସମ୍ପର୍କୀୟ ଭାଇ ହେବେ ।

ଅଫତାବଙ୍କ ବାପା ପଞ୍ଜାବରୁ ଆସିଥିବା ବେଳେ ଜଣେ ତିବ୍ଦତୀୟ ମହିଳାଙ୍କୁ ବିବାହ କରିଥିଲେ । ବିବାହର କିଛି ଦିନ ପରେ ଅଫତାବ ଜନ୍ମ ହୋଇଥିଲେ । ତାଙ୍କ ପିଲାଦିନ ଏବଂ ସ୍କୁଲ ଶିକ୍ଷା ଆମେରିକାରେ ସମ୍ପାଦନ ହୋଇଥିଲା ।

ଘାଜାଲା ହାସମୀ

୬୧ ବର୍ଷୀୟ ହାସମୀ ପ୍ରଥମ ଭାରତ-ଆମେରିକୀୟ ଏବଂ ପ୍ରଥମ ମୁସଲିମ ଗଭର୍ଣ୍ଣର ଅଟନ୍ତି ।  ସେ ରିପବ୍ଲିକ୍ ପାର୍ଟିର ଜନ୍ ରେଡଙ୍କୁ ପରାସ୍ତ କରିଥିଲେ । ହାଇଦ୍ରାବାଦରେ ଜନ୍ମିତ ହାସମୀ ଆମେରିକା ଚାଲିଯାଇଥିଲେ । ଜର୍ଜିଆରେ ତାଙ୍କର କର୍ମମୟ ଜୀବନ ଆରମ୍ଭ ହୋଇଥିଲା । ଏହାସହ ୨୦୧୯ରେ ଜର୍ଜିଆର ସିନେଟର ଭାବେ ନିର୍ବାଚିତ ହୋଇଥିଲେ ।

ତେବେ ସବୁଠାରୁ ବଡ କଥା ହେଉଛି ଯେ, ତିନି ନେତାଙ୍କ ବିଜୟ ସେତେବେଲେ ସାମ୍ନାକୁ ଆସିଛି ଯେତେବେଳେ ଟ୍ରମ୍ପଙ୍କ ଶାସନକୁ ଆମେରିକାବାସୀ ଜୋରଦାର ବିରୋଧ କରୁଛନ୍ତି । ତିନି ନେତାଙ୍କ ବିଜୟ ଡେମୋକ୍ରାଟିକ ପାର୍ଟିର ଶକ୍ତି ବୃଦ୍ଧି କରିବା ସହ ଟ୍ରମ୍ପଙ୍କ ପାଇଁ ବଡ ଚ୍ୟାଲେଂଜ୍ ଭାବେ ଉଭା ହୋଇଛି ।