ବର୍ଷା ଧୋଇନେଲା ପ୍ରଥମ ସୁପର-୮ ମୁକାବିଲା, ଉଭୟ ଟିମଙ୍କୁ ମିଳିଲା ୧-୧ ପଏଣ୍ଟ

କଲମ୍ବୋ: ଟି-୨୦ ବିଶ୍ବକପ୍ ୨୦୨୬ର ସୁପର-୮ ପର୍ଯ୍ୟାୟ ମ୍ୟାଚ୍ ଆରମ୍ଭରୁ ଝୁଣ୍ଟିଛି । ପ୍ରଥମ ମ୍ୟାଚକୁ ଧୋଇନେଇଛି ବର୍ଷା । ଆର. ପ୍ରେମାଦାସା ଷ୍ଟାଡିୟମ୍ରେ ହେବାକୁ ଥିବା ଏହି ମ୍ୟାଚରେ ଗୋଟିଏ ବଲ୍ ପଡ଼ିପାରିଲା ନାହିଁ । ଫଳରେ ମ୍ୟାଚ୍ ବାତିଲ ହୋଇଛି ଏବଂ ଉଭୟ ଟିମଙ୍କୁ ପଏଣ୍ଟ ବାଣ୍ଟି ଦିଆଯାଇଛି । ପାକିସ୍ତାନ ଏବଂ ନ୍ୟୁଜିଲାଣ୍ଡ ମଧ୍ୟରେ ସୁପର ୮ ମ୍ୟାଚ୍ ବାତିଲ ହୋଇଛି। ବର୍ଷା ଯୋଗୁଁ ମ୍ୟାଚ୍ରେ ଗୋଟିଏ ବି ବଲ୍ ପଡ଼ିନଥିଲା। ପାକିସ୍ତାନ ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା, କିନ୍ତୁ ବର୍ଷା ଜାରି ରହିଥିଲା। ମ୍ୟାଚକୁ ପାଞ୍ଚ ଓଭର ବିଶିଷ୍ଟ କରିବାକୁ ଚେଷ୍ଟା କରାଯାଇଥିଲା । କିନ୍ତୁ ସମସ୍ତ ପ୍ରୟାସ ବିଫଳ ହୋଇଥିଲା ।

ପ୍ରଥମ ସୁପର- ୮ ମ୍ୟାଚ୍ ବାତିଲ ହେବା ଯୋଗୁଁ ପାକିସ୍ତାନ ଏବଂ ନ୍ୟୁଜିଲାଣ୍ଡ ପ୍ରତ୍ୟେକେ ଗୋଟିଏ ପଏଣ୍ଟ ପାଇଛନ୍ତି । ପାଞ୍ଚ ଓଭର ବିଶିଷ୍ଟ ମ୍ୟାଚ୍ ପାଇଁ କଟ-ଅଫ୍ ସମୟ ୧୦.୧୬ ଧାର୍ଯ୍ୟ କରାଯାଇଥିଲା । କିନ୍ତୁ ରାତି ୯.୫ ସମୟରେ ମ୍ୟାଚକୁ ଆନୁଷ୍ଠାନିକ ଭାବରେ ବାତିଲ କରାଯାଇଥିଲା ।

ଏହି ମ୍ୟାଚ୍ ପୂର୍ବରୁ, ବାବର ଆଜମଙ୍କ ଖେଳିବାକୁ ନେଇ ଆଶଙ୍କା ପ୍ରକାଶ ପାଇଥିଲା। ଖରାପ ଫର୍ମରେ ଥିବା ବାବର ସଂଘର୍ଷ କରୁଛନ୍ତି ଏବଂ ତାଙ୍କର ଷ୍ଟ୍ରାଇକ୍ ରେଟ୍ ବହୁତ ଖରାପ ରହିଛି। ଏହା ସତ୍ତ୍ୱେ, ବାବରଙ୍କୁ ପ୍ଲେଇଂ ଇଲେଭେନରେ ସୁଯୋଗ ଦିଆଯାଇଥିଲା । କିନ୍ତୁ ଏଥର ଫଖର ଜମାନ ପାକିସ୍ତାନ ଦଳକୁ ଫେରିଥିଲେ। ଫଖର ଖାୱାଜା ନାଫାୟଙ୍କ ସ୍ଥାନ ନେଇଥିଲେ ଫଖର ଜମାନ।

ଅନ୍ୟପକ୍ଷରେ, ନ୍ୟୁଜିଲାଣ୍ଡ ସମ୍ପୂର୍ଣ୍ଣ ପ୍ରସ୍ତୁତ ହୋଇ ପଡ଼ିଆକୁ ଓହ୍ଲାଇଥିଲା । ଏହାର ପ୍ଲେଇଂ ଇଲେଭେନରେ ଗୋଟିଏ କି ଦୁଇଟି ନୁହେଁ ବରଂ ତିନୋଟି ବଡ଼ ପରିବର୍ତ୍ତନ ହୋଇଥିଲା। ଇଶ୍ ସୋଢ଼ି ଏବଂ ଲକି ଫର୍ଗ୍ୟୁସନ୍ ମଧ୍ୟ ଟିମକୁ ଫେରିଥିଲେ।

ପାକିସ୍ତାନର ପରବର୍ତ୍ତୀ ସୁପର-୮ ମ୍ୟାଚ୍ ଫେବୃଆରୀ ୨୪ ତାରିଖରେ ଇଂଲଣ୍ଡ ବିପକ୍ଷରେ ହେବ। ସେହିପରି ନ୍ୟୁଜିଲାଣ୍ଡ ଫେବୃଆରୀ ୨୫ ତାରିଖରେ ଶ୍ରୀଲଙ୍କା ସହିତ ମୁକାବିଲା କରିବ। ଆସନ୍ତାକାଲି (ରବିବାର) ଦୁଇଟି ସୁପର-୮ ମ୍ୟାଚ୍ ଖେଳାଯିବ। ଭାରତ ଦକ୍ଷିଣ ଆଫ୍ରିକା ସହିତ ମୁକାବିଲା କରିବାକୁ ଥିବା ବେଳେ, ଇଂଲଣ୍ଡ ବନାମ ଶ୍ରୀଲଙ୍କା ମୁକାବିଲା ହେବ ।