ନେପାଳୀ ଛାତ୍ରୀ ଆତ୍ମହତ୍ୟା ମାମଲା, ପୁଣି ରିପୋର୍ଟ ମାଗିଲେ NHRC

ଭୁବନେଶ୍ୱର ୨୨।୧୧ :ଘରୋଇ ବିଶ୍ୱବିଦ୍ୟାଳୟ ‘କିଟ୍’ରେ ନେପାଳୀ ଛାତ୍ରୀ ଆତ୍ମହତ୍ୟା ଘଟଣା । ଜାତୀୟ ମାନବାଧିକାର ଆୟୋଗ (ଏନଏଚଆରସି) ରାଜ୍ୟ ସରକାରଙ୍କୁ କାର୍ଯ୍ୟାନୁଷ୍ଠାନ ରିପୋର୍ଟ(ଏଟିଆର) ମାଗିଛନ୍ତି । ୧୫ ଦିନ ଭିତରେ ସବିଶେଷ ଏଟିଆର ଦାଖଲ କରିବାକୁ ମୁଖ୍ୟ ଶାସନ ସଚିବ ଆଦେଶିତ ହୋଇଛନ୍ତି ।

ହାଇକୋର୍ଟଙ୍କ ରହିତାଦେଶକୁ ଢ଼ାଲ କରି ନିଶ୍ଚିନ୍ତରେ ବସିଥିବା ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ପାଇଁ ଅଡ଼ୁଆ ବଢ଼ିଛି । ନେପାଳୀ ଛାତ୍ରୀ ପ୍ରକୃତି ଲାମସଲଙ୍କ ୨୦୨୫ ଫେବ୍ରୁଆରୀ ୧୬ରେ ସନ୍ଦେହଜନକ ମୃତ୍ୟୁ ଘଟିଥଲା । ଏହାପରେ କିଟ୍ କର୍ତ୍ତୃପକ୍ଷ ଅମାନବୀୟ କାଣ୍ଡ ସାମ୍ନାକୁ ଆସିଥିଲା । ନ୍ୟାୟ ପାଇଁ ଶାନ୍ତିପୂର୍ଣ୍ଣ ଧାରଣା ଦେଇଥିବା ଅନ୍ୟ ନେପାଳୀ ଛାତ୍ରଛାତ୍ରୀଙ୍କ ଉପରେ କିଟ୍ର ସୁରକ୍ଷାକର୍ମୀମାନେ ରାଗ ସୁଝାଇଥିଲେ । ସେମାନଙ୍କୁ ଧକ୍କା ମାରି ଶିକ୍ଷାନୁଷ୍ଠାନରୁ ତଡି଼ ଦେଇଥିଲେ । ଏକ ଘରୋଇ ଶିକ୍ଷାନୁଷ୍ଠାନର ଏଭଳି ବର୍ବରକାଣ୍ଡକୁ ନେଇ ସାରା ଦେଶରେ ବଦନାମ ମୁଣ୍ଡାଇଥିଲା କିଟ୍ । ଏନଏଚଆରସିଙ୍କ ନିକଟରେ ଏନେଇ ଦୁଇଟି ଭିନ୍ନ ଭିନ୍ନ ମାମଲା ପଞ୍ଜିକୃତ ହୋଇଥିଲା । ଆଶୁତାଷ ବି. ନାମକ ଜଣେ ବ୍ୟକ୍ତିଙ୍କ ଦ୍ୱାରା ଦାଖଲ ହୋଇଥିବା ପିଟିସନରେ ଗତ ଏପ୍ରିଲ ୭ରେ ହାଇକୋର୍ଟ ଜଷ୍ଟିସ ଏସ.କେ ପାଣିଗ୍ରାହୀ ଅନ୍ତରୀଣ ରହିତାଦେଶ ଜାରି କରିଥିଲେ । ନେପାଳ ମାନବାଧିକାର ଆୟୋଗଙ୍କ ଅନୁସଚିବ କମଲ ଥାପାଛେତ୍ରୀ ଗତ ଫେବ୍ରୁଆରୀ ୧୯ରେ ମଧ୍ୟ ଏକ ପିଟିସନ ଦାଖଲ କରିଥିଲେ । ଏନଏଚଆରସି ଏହି ମାମଲାକୁ ଗମ୍ଭୀରତାର ସହ ନେଇଛନ୍ତି । ଗତ ୧୧ରେ ରାଜ୍ୟ ମୁଖ୍ୟ ଶାସନ ସଚିବଙ୍କୁ ନୋଟିସ୍ ପଠାଇଛନ୍ତି । ନୋଟିସରେ ସ୍ପଷ୍ଟ ଭାବେ ଉଲ୍ଲେଖ କରାଯାଇଛି ଯେ ନେପାଳୀ ଛାତ୍ରଛାତ୍ରୀଙ୍କୁ ପରୀକ୍ଷା ସମୟରେ ବଳପୂର୍ବକ ହଷ୍ଟେଲରୁ ବିଦା କରିବା ଓ ମୃତ ଛାତ୍ରୀଙ୍କୁ ନ୍ୟାୟ ନମିଳିବା ଏକ ଗୁରୁତର ମାନବାଧିକାର ଉଲ୍ଲଙ୍ଘନ । ଏଭଳି କାର୍ଯ୍ୟ ଓଡ଼ିଶାର ଶିକ୍ଷା ବ୍ୟବସ୍ଥାକୁ ବିଶ୍ୱ ଦରବାରରେ ନିନ୍ଦିତ କରିଛି । ଗୃହ ବିଭାଗ ଅତିରିକ୍ତ ଶାସନ ସଚିବ ସତ୍ୟବ୍ରତ ସାହୁଙ୍କ ଅଧ୍ୟକ୍ଷତାରେ ସରକାର ଗଢ଼ାଯାଇଥିବା ତଥ୍ୟ ଅନୁସନ୍ଧାନ କମିଟିରେ ମହିଳା, ଶିଶୁ କଲ୍ୟାଣ ବିଭାଗ ପ୍ରମୁଖ ସଚିବ ଓ ଉଚ୍ଚଶିକ୍ଷା ବିଭାଗର ସଚିବ ସଦସ୍ୟ ଅଛନ୍ତି । ଏଦି ଘଟଣାର ତଦନ୍ତ କରିବାକୁ କମିଟିକୁ ନିର୍ଦ୍ଦେଶ ଦିଆଯାଇଥିଲା । ଯେଉଁମାନେ ଦୋଷୀ ସାବ୍ୟସ୍ତ ହେବେ, ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସରକାର ରୋକଠୋକ ଶୁଣାଇଥିଲେ । କିନ୍ତୁ କମିଟି ଗଢ଼ାଯିବାର ୯ମାସ ପରେ ମଧ୍ୟ କିଟ୍ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ ।