କିଏ ଏହି ଶ୍ରୀଲେଖା, ଯିଏ ତିରୁଅନନ୍ତପୁରମରେ ହୋଇପାରନ୍ତି ବିଜେପିର ପ୍ରଥମ ମହିଳା ମେୟର ?

ନୂଆଦିଲ୍ଲୀ: କେରଳ ତିରୁଅନନ୍ତପୁରମ ନଗର ନିଗମରେ ବିଜେପି ବିଜୟୀ ହୋଇଛି । ଏହାପରେ ଗୋଟିଏ ନାଁ ଆର୍ ଶ୍ରୀଲେଖା ଏବେ ଦେଶରେ ଚର୍ଚ୍ଚାରେ ରହିଛି । କେରଳର ପ୍ରଥମ ମହିଳା ଆଇପିଏସ୍ ଅଧିକାରୀ ଆର୍ ଶ୍ରୀଲେଖା ରାଜଧାନୀ ତିରୁଅନନ୍ତପୁରମରେ ବିଜେପିର ପ୍ରଥମ ମେୟାର ହୋଇପାରନ୍ତି ? ତିରୁଅନନ୍ତପୁରମ କର୍ପୋରେସନର ସଂସ୍ଥାମଙ୍ଗଲମ ଡିଭିଜନରୁ ସେ ବିଜୟୀ ହୋଇଛନ୍ତି ।

ନିକଟରେ ଶେଷ ହୋଇଥିବା ସ୍ଥାନୀୟ ନିର୍ବାଚନରେ ବିଜେପି ଐତିହାସିକ ସଫଳତା ହାସଲ କରିଥିଲା । ବିଜେପି ନେତୃତ୍ୱରେ ଏନଡିଏ ସହରରେ ୪୫ ବର୍ଷ ପରେ ବାମପନ୍ଥୀ ଶାସନକୁ ଶେଷ କରିଛି । ଉଲ୍ଲେଖଯୋଗ୍ୟ ଯେ ଗତ ବର୍ଷ ଆର୍ ଶ୍ରୀଲେଖା ବିଜେପିରେ ସାମିଲ ହୋଇଥିଲା । ବିଜୟ ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ଶ୍ରୀଲେଖା ସମର୍ଥନ ପାଇଁ ଭୋଟରଙ୍କୁ ଧନ୍ୟବାଦ ଜଣାଇଥିଲେ । ସେ କହିଥିଲେ, ମୁଁ ଜାଣିବାକୁ ପାଇଛି ଯେ ସଂସ୍ଥାମଙ୍ଗଲମ ୱାର୍ଡରେ କୌଣସି ବି ପ୍ରାର୍ଥୀଙ୍କୁ ଏତେ ବଡ଼ ବିଜୟ ମିଳି ନାହିଁ । ଏହି ନିଷ୍ପତ୍ତି ପାଇଁ ଲୋକଙ୍କୁ ଜନ୍ୟବାଦ ଜଣାଇଛି । ତେବେ ମେୟାର ପ୍ରଶ୍ନ ଉପରେ ପାର୍ଟି ନିଷ୍ପତ୍ତି ନେବ ବୋଲି ସେ କହିଥିଲେ ।

ତିରୁଅନନ୍ତପୁରମରେ ଜନ୍ମିତ ଏବଂ ବଡ଼ ହୋଇଥିବା ଶ୍ରୀଲେଖା ଜାନୁଆରୀ ୧୯୮୭ରେ କେରଳର ପ୍ରଥମ ମହିଳା ଆଇପିଏସ୍ ଅଧିକାରୀ ହୋଇଥିଲେ । ତାଙ୍କର କ୍ୟାରିଅର ତିନି ଦଶନ୍ଧିରୁ ଅଧିକ ସମୟ ଧରି ରହିଥିଲା । ଏହି ସମୟ ମଧ୍ୟରେ ସେ ଅନେକ ଜିଲ୍ଲାରେ ପୋଲିସର ମୁଖ୍ୟ ଭାବରେ କାର୍ଯ୍ୟ କରିଥିଲେ । ଶ୍ରୀଲେଖା ସିବିଆଇ, କେରଳ କ୍ରାଇମ ବ୍ରାଞ୍ଚ, ଅଗ୍ନିଶମ ବାହିନୀ, ମୋଟର ଯାନ ବିଭାଗ ଏବଂ ଜେଲ ବିଭାଗରେ ମଧ୍ୟ କାର୍ଯ୍ୟ କରିଥିଲେ । ୨୦୧୭ରେ ସେ କେରଳର ପ୍ରଥମ ମହିଳା ପୋଲିସ ମହାନିର୍ଦ୍ଦେଶକ ହୋଇଥିଲେ ।

୩୩ ବର୍ଷରୁ ଅଧିକ ସାର୍ବଜନୀନ ସେବା କରିବା ପରେ, ସେ ଡିସେମ୍ବର ୨୦୨୦ରେ ଅବସର ନେଇଥିଲେ । ଅବସର ପରେ ମଧ୍ୟ ଶ୍ରୀଲେଖା ଖବରରେ ରହିଥିଲେ। ଅଭିନେତା ଦିଲୀପଙ୍କୁ ୨୦୧୭ରେ ଜଣେ ଅଭିନେତ୍ରୀଙ୍କ ସହ ଜଡିତ ଯୌନ ନିର୍ଯାତନା ମାମଲାରେ ମିଥ୍ୟା ଭାବରେ ଫସାଇ ଦିଆଯାଇଥିଲା ବୋଲି ଦାବି କରିଥିଲେ । ବହିଷ୍କୃତ କଂଗ୍ରେସ ନେତା ରାହୁଲ ମାମକୁଟାଥିଲଙ୍କ ବିରୁଦ୍ଧରେ ଯୌନ ନିର୍ଯାତନା ଅଭିଯୋଗ ଦାଖଲ କରିବାରେ ବିଳମ୍ବକୁ ପ୍ରଶ୍ନ କରି ସେ ବିବାଦ ମଧ୍ୟ ସୃଷ୍ଟି କରିଥିଲେ । ସେ ଅକ୍ଟୋବର ୨୦୨୪ରେ ବିଜେପିରେ ଯୋଗ ଦେଇଥିଲେ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ତାଙ୍କର ପ୍ରଭାବ ବିଷୟରେ କହିଥିଲେ । ସେ କହିଥିଲେ ଯେ ପୋଲିସ ଅଧିକାରୀ ଭାବରେ ଶପଥ ନେବା ପରେ, ସେ କେବେ କୌଣସି ରାଜନୈତିକ ଚିନ୍ତାଧାରା ଗ୍ରହଣ କରି ନଥିଲେ ଏବଂ କୌଣସି ରାଜନୈତିକ ପକ୍ଷପାତିତା ବିନା କାମ କରିଥିଲେ ।