ମୁର୍ତ୍ତୀ ଦମ୍ପତିଙ୍କୁ କଡ଼ା ସମାଲୋଚନା କଲେ କର୍ଣ୍ଣାଟକ ମୁଖ୍ୟମନ୍ତ୍ରୀ: କହିଲେ, ସେମାନେ ସୁବ ଜାଣିଛନ୍ତି ବୋଲି ଭାବୁଛନ୍ତି କି ?

ବେଙ୍ଗାଲୁରୁ: କର୍ଣ୍ଣାଟକ ପଛୁଆ ବର୍ଗ କମିଶନ ରାଜ୍ୟରେ କରାଉଥିବା ସୋସିଆଲ୍ ଏବଂ ଏଜୁକେଶନାଲ ସର୍ଭେକୁ ସମର୍ଥନ ଦେଇ ନାହାନ୍ତି ମୁର୍ତ୍ତୀ ଦମ୍ପତି। ଇନଫୋସିସ୍‌ ସଂସ୍ଥାପକ ନାରାୟଣ ମୁର୍ତ୍ତୀ ଏବଂ ପତ୍ନୀ ସୁଧା ମୁର୍ତ୍ତୀ ଏଥିରେ ଅଂଶଗ୍ରହଣ କରିବେ ନାହିଁ ବୋଲି କହିଛନ୍ତି। ଯାହାକୁ ନେଇ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମେୟା କ୍ଷୋଭ ପ୍ରକାଶ କରିଛନ୍ତି। ଏବଂ ମୁର୍ତ୍ତୀ ଦମ୍ପତିଙ୍କୁ କଡ଼ା ସମାଲୋଚନା କରିଛନ୍ତି। ଏହି ସର୍ଭେ କେବଳ ପଛୁଆ ବର୍ଗଙ୍କର ଗଣନା ନୁହେଁ, ବର ଜନଗଣନା ଥିଲା ବୋଲି ସିଦ୍ଧରମେୟା କହିଛନ୍ତି।

ମୁର୍ତ୍ତୀ ଦମ୍ପତିଙ୍କୁ ସମାଲୋଚନା କରି ସିଦ୍ଧରମେୟା କହିଛନ୍ତି “ଏହା ସେମାନଙ୍କ ଉପରେ ଛାଡି ଦିଆଯାଉ। ଏହା ଏକ ପଛୁଆ ବର୍ଗ ସର୍ଭେ ନୁହେଁ। ଯଦି ସେମାନେ ବୁଝି ନାହାଁନ୍ତି - ମୁଁ କ’ଣ କରିପାରିବି? ସେମାନେ ଇନଫୋସିର ବୋଲି କ’ଣ ସେମାନେ ସବୁ ଜାଣନ୍ତି କି? ଆମେ ୨୦ ଥର କହିଛୁ - ଏହା ଏକ ପଛୁଆ ବର୍ଗ ସର୍ଭେ ନୁହେଁ। ଏହା ଏକ ସମ୍ପୂର୍ଣ୍ଣ ଜନସଂଖ୍ୟା ସର୍ଭେ।”

ସିଦ୍ଧରମେୟା ଆହୁରି କହିଛନ୍ତି “ଆମେ ଅନେକ ଥର ସ୍ପଷ୍ଟ କରିଛୁ, ତା’ପରେ ମଧ୍ୟ ସୁଧା ଏବଂ ନାରାୟଣ ମୂର୍ତ୍ତି ଭାବନ୍ତି ଯେ ଏହା ପଛୁଆ ବର୍ଗ ସର୍ଭେ। ଏହା ଭୁଲ। କେନ୍ଦ୍ର ସରକାର ମଧ୍ୟ ସର୍ଭେ କରୁଛନ୍ତି। ସେଥିରେ ସେମାନେ କ’ଣ କରିବେ? ସେମାନଙ୍କ ପାଖରେ ଭୁଲ ସୂଚନା ଥାଇପାରେ।”

ସୂଚନା ଥାଉକି ଇନଫୋସିସ୍ ପ୍ରତିଷ୍ଠାତା ଏନ ନାରାୟଣ ମୂର୍ତ୍ତି ଏବଂ ତାଙ୍କ ପତ୍ନୀ, ଲେଖିକା ଏବଂ ସମାଜସେବୀ ସୁଧା ମୂର୍ତ୍ତି, କର୍ଣ୍ଣାଟକ ପଛୁଆ ବର୍ଗ ଆୟୋଗ ଦ୍ୱାରା କରାଯାଉଥିବା ସାମାଜିକ ଏବଂ ଶିକ୍ଷାଗତ ସର୍ଭେରେ ଅଂଶଗ୍ରହଣ କରି ନାହାନ୍ତି। ଗଣନା କରିବାକୁ ଯେତେବେଳେ ସରକାରୀ ଅଧିକାରୀମାନେ ତାଙ୍କ ଘରକୁ ଯାଇଥିଲେ ଦୁଇ ଦମ୍ପତି ସେମାନଙ୍କ ପରିବାରର ସୂଚନା ଦେବାକୁ ମନା କରିଦେଇଥିଲେ।

ମୁର୍ତ୍ତି କହିଥିଲେ ଯେ ଆମେ ଆମ ଘରେ ସର୍ଭେ କରିବାକୁ ଚାହୁଁ ନାହୁଁ। ଆମେ କୌଣସି ପଛୁଆ ସମ୍ପ୍ରଦାୟର ନୁହଁ, ତେଣୁ ଏପରି ଗୋଷ୍ଠୀ ପାଇଁ ଉଦ୍ଦିଷ୍ଟ ସରକାରୀ କାର୍ଯ୍ୟରେ ଆମେ ଅଂଶଗ୍ରହଣ କରିବୁ ନାହିଁ ବୋଲି ମୁର୍ତ୍ତି ଦମ୍ପତି କହିଥିଲେ। ଗଣନା କରିବାକୁ ଯାଇଥିବା ସରକାରୀ ଅଧିକାରୀମାନେ ଏହି ସୂଚନା ଦେଇଛନ୍ତି।

ଏନେଇ ସୁଧା ମୁର୍ତ୍ତୀ କହିଛନ୍ତି ଯେ ସେ ସର୍ଭେ ଫର୍ମରେ ଏକ ବିବୃତ୍ତି ଜାରି କରିବା ସହିତ ଏହାକୁ ସ୍ୱୀକୃତି ଦେବାକୁ ଦସ୍ତଖତ ବି କରିଛନ୍ତି। ଯେଉଁଥିରେ ଘୋଷଣା କରାଯାଇଥିଲା ଯେ ସର୍ଭେ ସେମାନଙ୍କ କ୍ଷେତ୍ରରେ ସରକାରଙ୍କ ପାଇଁ କୌଣସି ପ୍ରାସଙ୍ଗିକତା କିମ୍ବା ଉପଯୋଗୀ ନୁହେଁ। ଦମ୍ପତି ଏହି ପ୍ରକ୍ରିୟାରୁ ଓହରିଯିବା ପାଇଁ ଏକ ଆତ୍ମ-ଘୋଷଣା ପତ୍ର ମଧ୍ୟ ଦାଖଲ କରିଛନ୍ତି। ମୁର୍ତ୍ତୀ ମୁଖ୍ୟଙ୍କ ଏହି ନିଷ୍ପତ୍ତିରେ କର୍ଣ୍ଣାଟକ ମୁଖ୍ୟମନ୍ତ୍ରୀ ପ୍ରତିକ୍ରିୟା ଦେଇ ଉପରୋକ୍ତ କଥା କହିବା ସହିତ ଏହା ଏକ ସ୍ୱେଚ୍ଛାକୃତ ସର୍ଭେ, ଏଥିରେ କାହାକୁ ଅଂଶଗ୍ରହଣ କରିବାକୁ ସରକାର ବାଧ୍ୟ କରନ୍ତି ନାହିଁ ବୋଲି କହିଛନ୍ତି।

ଏହା ପୂର୍ବରୁ ପୂର୍ବତନ ଇନ୍‌ଫୋସିସ ସିଓ ମୋହନଦାସ ପାଇ ମଧ୍ୟ ଜାତିଗତ ସର୍ଭେକୁ ସମାଲୋଚନା କରି ସାରିଛନ୍ତି। ଏ ନେଇ ସେ କହିଛନ୍ତି “ସୁବିଧା ଏବଂ ବିପୁଳ ଉଚ୍ଚ ଦରମା ପ୍ରାପ୍ତ ଚାକିରି ତୁଳନାରେ, ଏହା ବହୁତ କମ୍। କର୍ଣ୍ଣାଟକରେ, ମନ୍ତ୍ରୀମାନେ ଜାତି ସର୍ଭେ, ତୁଷ୍ଟିକରଣ ବିଷୟରେ ଅଧିକ ଚିନ୍ତିତ, ଅଭିବୃଦ୍ଧି, ବିକାଶ, ଭଲ ଚାକିରି କିମ୍ବା ପ୍ରଯୁକ୍ତିବିଦ୍ୟା ବିଷୟରେ ନୁହେଁ। ସେମାନେ ରାଜ୍ୟକୁ ପଛକୁ ନେଇ ଯାଉଛନ୍ତି, ମାଗଣା ପାଇଁ ଟଙ୍କା ଋଣ କରୁଛନ୍ତି।”

ରାଜ୍ୟ ସରକାରଙ୍କର ଏହି ନିଷ୍ପତ୍ତି କୋର୍ଟରେ ମଧ୍ୟ ଆହ୍ୱାନର ସାମ୍ନା କରିବାକୁ ପଡ଼ିଛି। ତେବେ ସୋସିଓ-ଇକୋନୋମି ଏଂବ ଏଜୁକେସନ ସର୍ଭେ ବାଧ୍ୟତାମୂଳକ ନୁହେଁ ବୋଲି ଘୋଷଣା କରିବାକୁ କର୍ଣ୍ଣାଟକ ସରକାରଙ୍କୁ କୋର୍ଟ ଅନ୍ତରୀଣ ନିର୍ଦ୍ଦେଶ ଦେଇଥିଲେ। କୋର୍ଟ ଏହା ମଧ୍ୟ କହିଛନ୍ତି ଯେ ସର୍ଭେକାରୀମାନେ ବିବରଣୀ ଉପରେ ଜିଦ୍ ଧରି ପାରିବେ ନାହିଁ ଏବଂ ସମସ୍ତ ସଂଗୃହୀତ ତଥ୍ୟକୁ ଗୋପନୀୟ ରଖିବେ। ଏହା କେବଳ ପଛୁଆ ବର୍ଗ କମିଶନ ପାଇଁ ଉପଲବ୍ଧ କରାଯିବ। ତେବେ ଏହି ସର୍ଭେ ପଛୁଆ ବର୍ଗଙ୍କୁ ସୁବିଧା ଯୋଗାଇବା ପାଇଁ ଉଦ୍ଦିଷ୍ଟ ଏବଂ ଏପରି ସୂଚନା ସଂଗ୍ରହ କରିବା ନାଗରିକଙ୍କ ଅଧିକାରକୁ ଉଲ୍ଲଂଘନ କରୁ ନାହିଁ ବୋଲି କୋର୍ଟ ଉଲ୍ଲେଖ କରିଥିଲେ।