Pulp Fiction ଅଭିନେତା ପିଟର ଗ୍ରୀନଙ୍କ ନିଧନ, ଆପାର୍ଟମେଣ୍ଟରୁ ମିଳିଲା ମୃତଦେହ

ନୂଆଦିଲ୍ଲୀ: ହଲିଉଡ ପ୍ରଶଂସକମାନଙ୍କୁ ବଡ଼ ଝଟକା । କ୍ୱାଣ୍ଟିନ ଟାରାଣ୍ଟିନୋଙ୍କ ପଲ୍ପ ଫିକ୍ସନରେ ଜେଡ୍ ଭୂମିକା ପାଇଁ ଜଣାଶୁଣା ଅଭିନେତା ପିଟର ଗ୍ରୀନଙ୍କ ମୃତ୍ୟୁ ହୋଇଛି। ତାଙ୍କୁ ୬୦ ବର୍ଷ ବୟସ ହୋଇଥିଲା। ତାଙ୍କ ମୃତଦେହ ତାଙ୍କ ମ୍ୟାନହଟନ ଆପାର୍ଟମେଣ୍ଟରୁ ମିଳିଛି । ଗ୍ରୀନଙ୍କ ମ୍ୟାନେଜର ତାଙ୍କ ମୃତ୍ୟୁ ଖବର ଦେଇଛନ୍ତି।

ପିଟର ଖଳନାୟକ ଭୂମିକା ପାଇଁ ଜଣାଶୁଣା ଥିଲେ। ରିପୋର୍ଟ ଅନୁଯାୟୀ, ଡିସେମ୍ବର ୧୨ ତାରିଖରେ ତାଙ୍କ ମ୍ୟାନହଟନ ଆପାର୍ଟମେଣ୍ଟରୁ ତାଙ୍କ ମୃତଦେହ ମିଳିଥିଲା। ଗ୍ରୀନଙ୍କ ମୃତ୍ୟୁର କାରଣ ସଂପର୍କରେ ନିର୍ଦ୍ଦିଷ୍ଟ ସୂଚନା ମିଳିପାରି ନାହିଁ ।

ଗ୍ରୀନ୍ ତାଙ୍କ କ୍ୟାରିୟରରେ ବହୁ ଅବିଶ୍ବସନୀୟ ଭୂମିକାରେ ଅଭିନୟ କରିଥିଲେ। "ପଲ୍ପ ଫିକ୍ସନ"ରେ ତାଙ୍କର ଭୂମିକା ଭୟଙ୍କର ଥିଲା। ଜଣେ ସିରିଏଲ୍ କିଲର୍, ବଳାତ୍କାରୀ ଏବଂ ଏକ ବିପଦଜନକ ଚରିତ୍ରରେ ସେ ସମସ୍ତଙ୍କୁ ଚମକାଇ ଦେଇଥିଲେ । ଏହି ଚଳଚ୍ଚିତ୍ର ତାଙ୍କୁ ଘରେ ଘରେ ପରିଚିତ କରାଇଥିଲା। "ଦି ମାସ୍କ"ରେ ଡୋରିଆନ୍ ଭୂମିକା ପାଇଁ ସେ ଖୁବ ପ୍ରଶଂସା ସାଉଁଟିଥିଲେ ।

ଗ୍ରୀନ୍ ୧୯୬୫ ମସିହା ଅକ୍ଟୋବର ୮ ତାରିଖରେ ନ୍ୟୁ ଜର୍ସିରେ ଜନ୍ମଗ୍ରହଣ କରିଥିଲେ। ରିପୋର୍ଟ ଅନୁଯାୟୀ, ପିଟର୍ ୧୫ ବର୍ଷ ବୟସରେ ଘରୁ ପଳାଇ ଆସିଥିଲେ ଏବଂ କିଛି ବର୍ଷ ଧରି ବାସହୀନ ଥିଲେ। ଗ୍ରୀନ୍ ୧୯୯୦ ଦଶକର ପ୍ରାରମ୍ଭରେ ସିନେମାରେ କାମ କରିବା ଆରମ୍ଭ କରିଥିଲେ। ସେ "ଲଜ୍ ଅଫ୍ ଗ୍ରାଭିଟି" (୧୯୯୨), "ଜଜମେଣ୍ଟ ନାଇଟ୍" (୧୯୯୩), "କ୍ଲିନ୍, ସେଭେନ୍" (୧୯୯୩), "ଅଣ୍ଡର ସିଜ୍ ୨" (୧୯୯୫), ଏବଂ "ଦି ୟୁଜୁଆଲ୍ ସସପେକ୍ଟସ୍" (୧୯୯୫) ଭଳି ଚଳଚ୍ଚିତ୍ରରେ ଅଭିନୟ କରି ଦର୍ଶକଙ୍କ ହୃଦୟ ଜିଣିଥିଲେ ।