ଘରୋଇ ବିଶ୍ୱବିଦ୍ୟାଳୟ ଉପରେ ରହିବ 'ସୁପ୍ରିମ' ନଜର, ସରକାର ଏବଂ ୟୁଜିସିକୁ ତଥ୍ୟ ମାଗିଲେ ସର୍ବୋଚ୍ଚ ନ୍ୟାୟାଳୟ

ନୂଆଦିଲ୍ଲୀ, ୨୬/୧୧: ଏବେ ସମସ୍ତ ଘରୋଇ ବିଶ୍ୱବିଦ୍ୟାଳୟ ଉପରେ ରହିବ ସୁପ୍ରିମ ନଜର । ଘରୋଇ ବିଶ୍ୱବିଦ୍ୟାଳୟ ପରିଚାଳନା ସମ୍ବନ୍ଧରେ ସମସ୍ତ କାଗଜପତ୍ର ଦାଖଲ କରିବେ । ଦେଶରେ ହୁହୁ ହୋଇ ଗଢି ଉଠୁଥିବା ଘରୋଇ ଶିକ୍ଷାନୁଷ୍ଠାନର କାର୍ଯ୍ୟପ୍ରଣାଳୀ, ନିୟମ ଏବଂ ଏହାର ଢାଞ୍ଚାର ଯାଞ୍ଚ୍ କରିବା ପାଇଁ କେନ୍ଦ୍ର ସରକାର, ବିଭିନ୍ନ ରାଜ୍ୟ ସରକାର ଓ ୟୁଜିସିକୁ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି । ଏହାର ରିପୋର୍ଟ କୋର୍ଟଙ୍କୁ ପ୍ରଦାନ କରିବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି ।

ସୁପ୍ରିମକୋର୍ଟ କହିଛନ୍ତି ଯେ, ତଥ୍ୟକୁ ଲୁଚାଯାଇ ପାରିବ ନାହିଁ । ଏଥିରେ କିଛି ଟ୍ୟାମ୍ପରିଂ କରିବା ଠିକ୍ ନୁହେଁ । ସମସ୍ତ ଘରୋଇ ବିଶ୍ବବିଦ୍ୟାଳର ନିୟମ, କର୍ତ୍ତବ୍ୟ, ପ୍ରତିଷ୍ଠାର ଢାଞ୍ଚାକୁ ୟୁଜିସି ଯାଞ୍ଚ୍ କରିବା ଦରକାର । ଘରୋଇ ବିଶ୍ୱବିଦ୍ୟାଳୟର ବାସ୍ତବିକ ବ୍ୟବସ୍ଥା ସମସ୍ତେ ଜାଣିବା ଜରୁରୀ ।

ଜଷ୍ଟିସ ଅହସାନୁଦ୍ଦୀନ ଅମାନୁଲ୍ଲାହ ଏବଂ ଜଷ୍ଟିସ ଏନବି ଅଞ୍ଜାରିଆଙ୍କ ଖଣ୍ଡପୀଠ କହିଥିଲେ ଯେ, ୟୁଜିସି ଅଧିକ ତତ୍ପରତାର ସହ କାମ କରିବା ଆବଶ୍ୟକ । ବିଶ୍ବବିଦ୍ୟାଳୟର ଛାତ୍ର ପ୍ରବେଶ ନୀତି, ଶିକ୍ଷକଙ୍କ ନିଯୁକ୍ତି ପ୍ରକ୍ରିୟା, ନିୟାମକ ଯାଞ୍ଚ ଓ ସରକାରଙ୍କଠୁ ମିଳୁଥିବା ସୁବିଧା ସୁଯୋଗର ପାଳନ ହେଉଛି ନା ନାହିଁ ସେନେଇ ୟୁଜିସି ଦୃଷ୍ଟି ଦେବା ଉଚିତ । ଏନଜିଓ ଏବଂ ଟ୍ରଷ୍ଟ ଦ୍ୱାରା ଏହା ପରିଚାଳିତ ହେଉଛି ନା ନାହିଁ ତାହାର ତଦନ୍ତ ହେବା ଦରକାର । ସରକାରଙ୍କ ପାଖରେ ଏନେଇ ସ୍ପଷ୍ଟ ତଥ୍ୟ ରହିବା ଜରୁରି । ପାଠ ପଢୁଥିବା ଛାଚ୍ର ଏବଂ କର୍ମଚାରୀଙ୍କ ପାଇଁ ୟୁନିଭର୍ସିଟିରେ ଅଭିଯୋଗ ପ୍ରକୋଷ୍ଠ ରହିବା ନେଇ ସରକାର ସୁନିଶ୍ଚିତ କରନ୍ତୁ ବୋଲି ଖଣ୍ଡପୀଠ କହିଛନ୍ତି।

କୋର୍ଟ ଆହୁରି ନିର୍ଦ୍ଦେଶ ଦେଇଥିଲେ ଯେ, କେନ୍ଦ୍ରୀୟ ସ୍ତରରେ କ୍ୟାବିନେଟ୍ ସଚିବ ଏବଂ ସମସ୍ତ ରାଜ୍ୟର ମୁଖ୍ୟ ଶାସନ ସଚିବ ବିଶ୍ୱବିଦ୍ୟାଳୟର ତଥ୍ୟ ହାସଲ କରିବେ । ଏଥିରେ କୌଣସି ସତ କିମ୍ବା ତଥ୍ୟକୁ ଲୁଚାଯାଇପାରିବ ନାହିଁ । ଯଦି କୌଣସି ଅନିୟମିତତା ହୋଇଥିବା ଜଣାପଡେ ତେବେ କୋର୍ଟ ଏଦିଗରେ କଡା କାର୍ଯ୍ୟାନୁଷ୍ଠାନ ନେବେ ।

ସୂଚନାଯୋଗ୍ୟ, ଆମିଟୀ ୟୁନିଭର୍ସିଟି ବିରୋଧରେ ଜଣେ ଛାତ୍ରୀଙ୍କ ନାମ ପରିବର୍ତ୍ତନ ସମ୍ପର୍କୀୟ ମାମଲାର ଶୁଣାଣିରୁ ୟୁନିଭର୍ସିଟି ଏବଂ ୟୁଜିସିର ଉତ୍ତରାଦାୟିତ୍ୱ ଯାଏଁ କଥା ପହଁଚିଥିଲା । ଅନ୍ୟ ଏକ ଜନ ସ୍ୱାର୍ଥ ମାମଲାର ଶୁଣାଣି କରି କୋର୍ଟ ଘରୋଇ ବିଶ୍ବବିଦ୍ୟାଳୟକୁ କିପରି ନିୟନ୍ତ୍ରଣ କରାଯିବ ସେନେଇ ପ୍ରଶ୍ନ କରିଥିଲେ ।

କ'ଣ ଥିଲା ଆମିଟି ୟୁନିଭର୍ସିଟି ମାମଲା ?

ଆବେଦନକାରୀ ୨୦୨୧ରେ ନିଜ ନାଁ ଖୁସି ଜୈନରୁ ଆୟେଶା ଜୈନକୁ ପରିବର୍ତ୍ତନ କରିଥିଲେ । ସେପ୍ଟେମ୍ବର ୨୦୨୩ରେ ସେ ଆୟେଶା ନାମରେ ୟୁନିଭର୍ସିଟିରେ ବର୍ଷିକିଆ ସାର୍ଟିଫିକେଟ କୋର୍ସରେ ନାଁ ଲେଖାଇଥିଲେ । ୨୦୨୪ରେ ସେ ସମାନ ୟୁନିଭର୍ସିଟିରେ ଏମବିଏ କୋର୍ସରେ ନାଁ ଲେଖାଇଥିଲେ । ନାମ ପରିବର୍ତ୍ତନର ସମସ୍ତ କାଗଜପତ୍ର ଜମା କରିଥିଲେ । କିନ୍ତୁ କଲେଜ କର୍ତ୍ତୃପକ୍ଷ ଆୟେଶା ନାଁ ଏକ ମୁସଲିମ ନାଁ କହି ତାଙ୍କୁ ମାନସିକ ନିର୍ଯାତନା ଦେଇଥିଲେ । ନାମ ପରିବର୍ତ୍ତନ କରିବାକୁ କଲେଜ ମନା କରିଦେଇଥିଲା । ତାଙ୍କ ଉପସ୍ଥାନ ମଧ୍ୟ କମିଥିଲା । ଫଳରେ ସେ ପରୀକ୍ଷା ଦେଇପାରିନଥିଲେ । ତାଙ୍କର ଗୋଟିଏ ବର୍ଷ ବରବାଦ ହୋଇଯାଇଥିଲା ।

ଏନେଇ ସେ ୟୁଜିସିର ଦ୍ୱାରସ୍ଥ ହୋଇଥିଲେ । କିନ୍ତୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ କିଛି ଶୁଣିନଥିଲେ । ପରେ ମାମଲା କାର୍ଟକୁ ଯାଇଥିଲା । ଶୁଣାଣି କରି କୋର୍ଟ ଆୟେଶାଙ୍କୁ କ୍ଷତି ପୂରଣ ଦେବାକୁ ନିର୍ଦ୍ଦେଶ ଦେଇଥିଲେ । ଯାହାପରେ ଆୟେଶାଙ୍କୁ ବିଶ୍ୱବିଦ୍ୟାଳୟ ପକ୍ଷରୁ ଏକ ଲକ୍ଷ ଟଙ୍କା ପ୍ରଦାନ କରାଯାଇଥିଲା । ଯାହାକୁ କୋର୍ଟ ନାପସନ୍ଦ କରିବା ସହ କୋର୍ଟଙ୍କ ରାୟକୁ ଉପହାସ କରାଯାଇଥିବା କହିଥିଲେ ।