ଭିଡିଓ ଗେମ୍, ଚକୋଲେଟ୍ ଏବଂ ଭଡ଼ା ଘର... ୩୩ ପିଲାଙ୍କ ଯୌନ ଶୋଷଣ, ସ୍ତ୍ରୀ ସମେତ ଇଞ୍ଜିନିୟର ସ୍ବାମୀକୁ ଫାଶୀ ଦଣ୍ଡ

ଲକ୍ଷ୍ନୌ: ଉତ୍ତର ପ୍ରଦେଶରୁ ଏକ ଆଶ୍ଚର୍ଯ୍ୟଜନକ ଏବଂ ହୃଦୟ ବିଦାରକ ମାମଲା ସାମ୍ନାକୁ ଆସିଛି। ବାନ୍ଦାରେ ଜଣେ ଇଞ୍ଜିନିୟର ଏବଂ ତା ସ୍ତ୍ରୀ ପ୍ରାୟ ୧୦ ବର୍ଷ ଧରି ଛୋଟ ପିଲାଙ୍କୁ ଯୌନ ନିର୍ଯାତନା ଦେଉଥିଲେ । ସେମାନଙ୍କର ଅଶ୍ଳୀଳ ଭିଡିଓ ତିଆରି କରୁଥିଲେ ଏବଂ ଅନଲାଇନରେ ବିକ୍ରି କରୁଥିଲେ। ଅଭିଯୋଗ ହୋଇଛି ଯେ, ରାମ ଭବନ ଏବଂ ତା ପତ୍ନୀ ଦୁର୍ଗାବତୀ ଏକ ଭଡା ଘରେ ଏହି କେଳେଙ୍କାରୀ ଚଳାଉଥିଲେ । ସେମାନେ ଆଖପାଖ ଅଞ୍ଚଳର ଗରିବ ଏବଂ ଦୁର୍ବଳ ପରିବାରର ପିଲାମାନଙ୍କୁ ଭିଡିଓ ଗେମ୍, ଚକୋଲେଟ୍, ଟଙ୍କା ଏବଂ ମୋବାଇଲ୍ ଫୋନ୍ ଦେଇ ପ୍ରଲୋଭିତ କରୁଥିଲେ। ଯେତେବେଳେ ପିଲାମାନେ ସେମାନଙ୍କ କୋଠରୀରେ ପ୍ରବେଶ କରୁଥିଲେ, ସେମାନେ ସେମାନଙ୍କୁ ଯୌନ ନିର୍ଯାତନା ଦେବା ସମୟରେ ରେକର୍ଡ କରୁଥିଲେ ଭିଡିଓ ।

ଉଭୟଙ୍କୁ ଯୌନ ନିର୍ଯାତନା ଏବଂ ଅଶ୍ଳୀଳ ଭିଡିଓ ସୁଟ୍ ଉଦ୍ଦେଶ୍ୟରେ ନାବାଳକଙ୍କୁ ବ୍ୟବହାର କରିବା ପାଇଁ ଦୋଷୀ ସାବ୍ୟସ୍ତ କରାଯାଇଛି। ଉତ୍ତର ପ୍ରଦେଶର ବାନ୍ଦାରେ POCSO କୋର୍ଟର ସ୍ୱତନ୍ତ୍ର ବିଚାରପତି ସେମାନଙ୍କୁ ମୃତ୍ୟୁଦଣ୍ଡ ଦେଇଛନ୍ତି। ଟ୍ରାଏଲ୍ କୋର୍ଟ ପ୍ରତ୍ୟେକ ପୀଡିତଙ୍କୁ ୧୦ ଲକ୍ଷ ଟଙ୍କା ଲେଖାଁଏ କ୍ଷତିପୂରଣ ପ୍ରଦାନ କରିବାକୁ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ।

ତଦନ୍ତରୁ ଜଣାପଡିଛି ଯେ, ଅଭିଯୁକ୍ତମାନେ ୩୩ ନାବାଳକଙ୍କୁ ଟାର୍ଗେଟ କରିଥିଲେ । ୨ ଲକ୍ଷରୁ ଅଧିକ ଅଶ୍ଳୀଳ ଭିଡିଓ ତିଆରି କରିଥିଲେ ଏବଂ ଅନଲାଇନ୍ ପ୍ଲାଟଫର୍ମ ମାଧ୍ୟମରେ ବିଦେଶରେ ବିକ୍ରି କରିଥିଲେ । ଏହି ସବୁ ଭିଡିଓ ବିକ୍ରି କରି ମୋଟାଅଙ୍କର ରୋଜଗାର କରିଥିଲେ ଅଭିଯୁକ୍ତ ଦମ୍ପତି । ଏକ ଅନ୍ତର୍ଜାତୀୟ ଏଜେନ୍ସିରୁ ସୂଚନା ପାଇବା ପରେ ପୋଲିସ ଏହି ରାକେଟ ବିଷୟରେ ଅବଗତ ହୋଇଥିଲା। ଏହା ପରେ, ଭାରତୀୟ ଏଜେନ୍ସିଗୁଡ଼ିକ ତଦନ୍ତ ଆରମ୍ଭ କରିଥିଲେ। ମାମଲାଟି କେନ୍ଦ୍ରୀୟ ତଦନ୍ତ ବ୍ୟୁରୋ (CBI)କୁ ହସ୍ତାନ୍ତର କରାଯାଇଥିଲ । ଏହା ଡିଜିଟାଲ୍ ପ୍ରମାଣ ଆଧାରରେ ସମ୍ପୂର୍ଣ୍ଣ ନେଟୱାର୍କର ପର୍ଦ୍ଦାଫାସ କରିଥିଲା। ତଦନ୍ତକାରୀ ଏଜେନ୍ସି ଅଭିଯୁକ୍ତଙ୍କଠାରୁ ଲାପଟପ୍, ହାର୍ଡ ଡିସ୍କ, ପେନ୍ ଡ୍ରାଇଭ୍ ଏବଂ ମୋବାଇଲ୍ ଫୋନ୍ ଜବତ କରିଥିଲା । ଏଥିରେ ବହୁ ସଂଖ୍ୟକ ଅଶ୍ଳୀଳ ଭିଡିଓ ଥିଲା। ଅନେକ ପିଲା ଏତେ ଭୟଭୀତ ହୋଇଯାଇଥିଲେ ଯେ, ସେମାନେ ଦୀର୍ଘ ସମୟ ପର୍ଯ୍ୟନ୍ତ ଘଟଣା ସଂପର୍କରେ କିଛି କହିପାରି ନଥିଲେ ।

ପୀଡ଼ିତଙ୍କ ବୟସ ବହୁତ କମ୍ ବୋଲି ଜଣାପଡ଼ିଛି। କେତେକ ମାନସିକ ଏବଂ ଶାରୀରିକ ଭାବରେ ଗୁରୁତର ଭାବରେ ପ୍ରଭାବିତ ହୋଇଛନ୍ତି ଏବଂ ଏବେ ବି ସେମାନଙ୍କର ଚିକିତ୍ସା ଚାଲିଛି। ପ୍ରଶାସନ ପିଲାମାନଙ୍କ ପାଇଁ ପରାମର୍ଶ ଏବଂ ପୁନର୍ବାସ ଆରମ୍ଭ କରିଛି। ଏହି ମାମଲା ଉତ୍ତର ପ୍ରଦେଶରେ ଶିଶୁ ସୁରକ୍ଷା ଉପରେ ଗମ୍ଭୀର ପ୍ରଶ୍ନ ଉଠାଇଛି। ବିଶେଷଜ୍ଞମାନେ କହିଛନ୍ତି ଯେ, ପିତାମାତାମାନେ ସେମାନଙ୍କ ପିଲାମାନଙ୍କ ଉପରେ ନଜର ରଖିବା ଉଚିତ । ଅପରିଚିତ ବ୍ୟକ୍ତିଙ୍କଠାରୁ ଦୂରେଇ ରଖିବା ସହ ପିଲାଙ୍କ ସହିତ ଖୋଲାଖୋଲି ବାର୍ତ୍ତାଳପ କରିବା ଆବଶ୍ୟକ। ପୋଲିସ କହିଛି ଯେ, ଏହି ମାମଲାରେ ଆହୁରି ଅନେକ ଖୁଲାସା ହୋଇପାରେ। ତଦନ୍ତ ଜାରି ରହିଛି ଏବଂ ଅଭିଯୁକ୍ତଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।