ସଂଖ୍ୟାଲଘୁଙ୍କ ପ୍ରତି କେନ୍ଦ୍ରମନ୍ତ୍ରୀ ଗିରିରାଜ ସିଂହଙ୍କ ବିବାଦୀୟ ଟିପ୍ପଣୀ, ଜାଣନ୍ତୁ ନିର୍ବାନ ରାଲିରେ କହିଲେ କ’ଣ?

ଅରୱଲ ୧୯।୧୦: ପ୍ରଥମ ପର୍ଯ୍ୟାୟ ବିହାର ବିଧାନସଭା ନିର୍ବାଚନ ପାଇଁ ରାଜ୍ୟରେ ରାଜନୈତିକ ଦଳମାନେ ପ୍ରଚାର ଅଭିଯାନ ଆରମ୍ଭ କରିସାରିଲେଣି। ଏଥି ପାଇଁ ଗୋଟିଏ ପରେ ଗୋଟିଏ ରାଲି ଅନୁଷ୍ଠିତ ହେଉଥିବା ବେଳେ ଦଳୀୟ ଷ୍ଟାର ପ୍ରଚାରକମାନେ ଭୋଟରଙ୍କୁ ଆକର୍ଷିତ କରିବାକୁ ଉଦ୍ୟମ ଆରମ୍ଭ କରିଦେଇଛନ୍ତି। ଏହିକ୍ରମରେ ବିଜେପିର ଫାୟାରବ୍ରାଣ୍ଡ ନେତା ଗିରିରାଜ ସିଂହ ତାଙ୍କର ଏକ ବିବାଦୀୟ ଟିପ୍ପଣୀକୁ ନେଇ ଏବେ ଚର୍ଚ୍ଚାକୁ ଆସିଛନ୍ତି।

ଗିରିରାଜ ଅରୱାଲରେ ଶନିବାର ଏକ ନିର୍ବାଚନୀ ସଭାକୁ ସମ୍ବୋଧିତ କରିବା ବେଳେ ସଂଖ୍ୟାଲଘୁ ସମ୍ପ୍ରଦାୟଙ୍କ ପ୍ରତି ଅଶାଳୀନ ମନ୍ତବ୍ୟ ଦେଇଛନ୍ତି। ସେ କହିଛନ୍ତି ଯେ ଅଳ୍ପ ସଂଖ୍ୟକ ବର୍ଗ ମୋଦି ସରକାରଙ୍କ ଲାଭ ନେଉଛନ୍ତି, ହେଲେ କେବେ ବିଜେପିକୁ ଭୋଟ ଦିଅନ୍ତି ନାହିଁ। ତାଙ୍କର ଏପରି ବିବାଦୀୟ ବୟାନ ଏବେ ବିହାରରେ ଜନଅସନ୍ତୋଷର କାରଣ ପାଲଟିଛି। ନିର୍ବାଚନୀ ସଭାରେ ସେ ଏକ କଥା ଛଳରେ ଏପରି କହିଛନ୍ତି। ତେବେ ପରେ ଏ ନେଇ ତାଙ୍କର କୌଣସି ପ୍ରତିକ୍ରିୟା ଆସି ନାହିଁ।

ନିର୍ବାଚନୀ ସଭା ମଞ୍ଚରେ ସେ କହିଛନ୍ତି ଯେ ମୁଁ ଜଣଙ୍କ ସହ କଥା ହେଉଥିଲି, ତାଙ୍କ ପଚାରିଲି ଆୟୁଷ୍ମାନ ଭାରତ କାର୍ଡ କଲେଣି?  କହିଲେ ହଁ କରି ସାରିଲାଣି। ମୁଁ ପଚାରିଲି ସେଥିରେ କୌଣସି  ପାତର ଅନ୍ତର ଥିଲା? ସେ ନା କଲେ, ଏଥିର ପଚାରିଲି ଆପଣ ମୋତେ ଭୋଟ ଦେଇଛନ୍ତି? ସେ ହଁ କହିଲେ। ମୁଁ କହିଲି ଭଗବାନଙ୍କ ରାଣ ଖାଇ କହନ୍ତୁ ମୋତେ ଭୋଟ ଦେଇଛନ୍ତି? ସେ ମନା କଲେ।

ମୁଁ ପଚାରିଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆପଣଙ୍କୁ ଗାଳି କରିଛନ୍ତି? ସେ ମନା କଲେ, ମୁଁ ପଚାରିଲି ମୁଁ ଆପଣଙ୍କୁ କେବେ ଅପମାନିତ କରିଛି? ସେ ମନା କଲେ। ତେବେ ମୋର ଭୁଲ କଣ ଥିଲା ମୋତେ ଆପଣ କାହିଁକି ଭୋଟ ଦେଲେନି? ମୁଁ କହିଥିଲି ଯିଏ କାହାର ଉପକାରକୁ ମାନେନି ତାକୁ ନିମକ ହରାମ କୁହାଯାଏ। ସଂଖ୍ୟା ଲଘୁ ସମ୍ପ୍ରରଦାୟର ଲୋକେ ସରକାରୀ ଲାଭ ନିଅନ୍ତି, ହେଲେ ସରକାରୀ ଦଳକୁ ଭୋଟ ଦିଅନ୍ତି ନାହିଁ। ମୁଁ ତାଙ୍କୁ କହିଲି ମୋତେ ଆପଣଙ୍କ ଭୋଟ ଲୋଡା ନାହିଁ। ଆପଣ ଯାହାକୁ ଇଛା ତାଙ୍କୁ ଭୋଟ ଦେଇ ପାରନ୍ତି। ଆମକୁ ନିମକ ହରାମଙ୍କ ଭୋଟର ଆବଶ୍ୟକତା ନାହିଁ।