ବିଜେପି ଯେତେ ଏକ୍ସରସାଇଜ କରୁଛି କରୁ, ବିଜେଡିର ଆବଶ୍ୟକ ନାହିଁ, ଦଳ ସଂପୂର୍ଣ୍ଣ ପ୍ରସ୍ତୁତ

ଭୁବନେଶ୍ୱର ୦୩/୧୦: ନୂଆପଡ଼ାରେ କିଏ ହେବ ବିଜେଡିର ପ୍ରାର୍ଥୀ ଲାଗି ରହିଛି କଳ୍ପନା ଜଳ୍ପନା । ଏହାରି ଭିତରେ ବିଜେପିକୁ କାଉଣ୍ଟର କରିଛନ୍ତି ବରିଷ୍ଠ ବିଜେଡି ବିଧାୟିକା ପ୍ରମିଳା ମଲ୍ଲିକ । ସେ କହିଛନ୍ତି ନୂଆପଡାରେ କିଏ ହେବ ପ୍ରାର୍ଥୀ । ସେ ନିଷ୍ପତ୍ତି ନେବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ସେ କହିଛନ୍ତି ବିଜେପି ଯେତେ ଏକ୍ସରସାଇଜ କରୁଛି କରୁ ।

ବିଜେଡିର ଏକ୍ସରସାଇଜ ଆବଶ୍ୟକ ନାହିଁ, ନୂଆପଡା ବିଜେଡିର ଥିଲା, ରହିବ । ସ୍ୱାଭାବିକ ଭାବେ ଜଣେ ବିଧାୟକଙ୍କ ଦେହାନ୍ତ ହୋଇଛି ମାନେ ସିମ୍ପଥି ରହିବ ଦଳ ପ୍ରତି । ଆମର କୌଣସି ଏକ୍ସରସାଇଜ ଆବଶ୍ୟକତା ନାହିଁ ଆମ ଦଳ ସମ୍ପୂର୍ଣ ପ୍ରସ୍ତୁତ ଅଛି । ନୂଆପଡା ପାଇଁ ଆମ ଦଳର ନେତା ଓ କର୍ମୀ ସମ୍ପୂର୍ଣ୍ଣ ଲାଗି ପଡିବେ । ପ୍ରାର୍ଥୀ କିଏ ହେବ ସେ ନିଷ୍ପତ୍ତି ସୁପ୍ରିମୋ ଠିକ୍ ସମୟରେ ଜଣାଇବେ । 
​​​​​​​​​​​​​

ନୂଆପଡ଼ା ବିଧାୟକ ରାଜେନ୍ଦ୍ର ଢୋଲକିଆଙ୍କ ଦେହାନ୍ତ ପରେ ଉପ-ନିର୍ବାଚନ ନେଇ ଆରମ୍ଭ ହୋଇଛି ଚର୍ଚ୍ଚା । କାରଣ ନୂଆପଡ଼ାର ଫଳାଫଳ ଓଡ଼ିଶାବାସୀଙ୍କ ମୁଡକୁ ସାମ୍ନାକୁ ଆଣିବ । ନୂଆ ସରକାରର ପୂର୍ବଭଳି ଲୋକପ୍ରିୟତା ରହିଛି ନା ବିରୋଧୀ ଏହା ଭିତରେ ଲୋକଙ୍କ ଭରସା ଜିତିଲେଣି ତାହାର ପ୍ରମାଣ ଦେବ ନୂଆପଡ଼ା ଉପ-ନିର୍ବାଚନ । ଏବେଠାରୁ ୩ ଦଳ ମଧ୍ୟରେ ଆରମ୍ଭ ହୋଇଗଲାଣି ପ୍ରତିଯୋଗିତା । 

୨୦୨୪ ନିର୍ବାଚନ ପରେ ପ୍ରଥମ ଉପନିର୍ବାଚନ ଦେଖିବ ଓଡ଼ିଶା । ଏହି ନିର୍ବାଚନ ଫଳାଫଳ ସରକାର ଭାଙ୍ଗିବନି କି ଗଢ଼ିବନି । ହେଲେ ୩ ରାଜନୈତିକ ଦଳର ଲୋକପ୍ରିୟତାର ଏସିଡ୍‌ ଟେଷ୍ଟର ପ୍ରମାଣ ଦେବ ଉପ-ନିର୍ବାଚନ । ଗୋଟିଏ ପଟେ ଲୋକଙ୍କ ସରକାର ଦେବେ ଲୋକପ୍ରିୟତାର ପରୀକ୍ଷା । ଅନ୍ୟପଟେ ବିନା କ୍ଷମତାରେ ଦୀର୍ଘ ୨୫ ବର୍ଷ ପରେ ଉପ-ନିର୍ବାଚନର ସାମ୍ନା କରିବ ବିଜେଡି । ନୂଆପଡ଼ା ଉପ-ନିର୍ବାଚନ ହିଁ କହିବ ନବୀନଙ୍କ ଲୋକପ୍ରିୟତା କମିଛି ନା କାଏମ ଅଛି । ​​​​କଂଗ୍ରେସ ମଙ୍ଗୁଆଳଙ୍କ ହୋମଗ୍ରାଉଣ୍ଡ ହୋଇଥିବାରୁ ଭକ୍ତଙ୍କ ପାଇଁ ନୂଆପଡ଼ା ଉପ-ନିର୍ବାଚନ ପାଲଟିବ ସମ୍ମାନର ଲଢ଼େଇ । ତେବେ ଏସବୁ ଭିତରେ ମୁହଁ ଖୋଲିଛନ୍ତି ସବୁ ଦଳର ତୁଙ୍ଗ ନେତା ।