ଯୁବ ଡାକ୍ତରଙ୍କ ବିରୁଦ୍ଧରେ ସାଙ୍ଘାତିକ ଅଭିଯୋଗ, ପତ୍ନୀଙ୍କୁ ୧୦ ଦିନରୁ ଅଧିକ ଦିନ ଘରେ ପକାଇଦେଲେ ତାଲା

କଟକ: କେନ୍ଦ୍ରାପଡ଼ା ଜିଲ୍ଲା ଆଳିରେ କାର୍ଯ୍ୟରତ ଜଣେ ଯୁବ ଡାକ୍ତରଙ୍କ ବିରୁଦ୍ଧରେ ସାଙ୍ଘାତିକ ଅଭିଯୋଗ। ଖୋଦ ଡାକ୍ତରଙ୍କ ପତ୍ନୀ ଆଣିଲେ ଅଭିଯୋଗ। କହିଲେ ଡାକ୍ତର ସ୍ବାମୀ ଦେଉଛନ୍ତି ମାନସିକ ନିର୍ଯାତନା। ମହିଳାଙ୍କ ଅଭିଯୋଗ କ୍ରମେ କଟକ ମହିଳା ଥାନାରେ ମାମଲା ରୁଜୁ ହୋଇଛି।

ସୂଚନା ଅନୁସାରେ, କଟକ କ୍ୟାଣ୍ଟନମେଣ୍ଟ ଥାନା ଅଞ୍ଚଳର ଜଣେ ଡାକ୍ତର କେନ୍ଦ୍ରାପଡ଼ା ଆଳିରେ ଏକ ଡାକ୍ତରଖାନାରେ କାର୍ଯ୍ୟ କରନ୍ତି। ଡାକ୍ତର ଜଣକ ୨୦୨୧ରେ ବିବାହ କରିଥିଲେ। ତେବେ ବିବାହର ଦୁଇ ବର୍ଷ ପରେ ସ୍ଵାମୀ ସ୍ତ୍ରୀଙ୍କ ମଧ୍ୟରେ ବିବାଦ ଆରମ୍ଭ ହୋଇଥିଲା। ହେଲେ ପତ୍ନୀ ସ୍ବାମୀଙ୍କ ସହ ରହିବାକୁ ଚାହୁଥିବା ବେଳେ ଡାକ୍ତର ସ୍ବାମୀ କିନ୍ତୁ ଛାଡ଼ପତ୍ର ଦେବାକୁ ଚାହୁଁଛନ୍ତି। ଏହାରି ମଧ୍ୟରେ ସ୍ବାମୀଙ୍କର କଟକରେ ଥିବା ଅନ୍ୟ ଏକ ଘରକୁ ଯାଇ ରହିଥିଲେ ପତ୍ନୀ।

ହେଲେ ଏହାକୁ ବିରୋଧ କରି ସ୍ବାମୀ ଉକ୍ତ ଘର ବାହାର ଗେଟ୍ରେ ତାଲା ପକାଇଦେଲେ। ଏହି ବିଷୟରେ ପତ୍ନୀ ତୁରନ୍ତ ଜାଣି ପାରି ନଥିଲେ। ତେବେ ଜାଣିବା ପରେ ସ୍ବାମୀଙ୍କୁ ଫୋନ୍ କରି ତାଲା ଖୋଲିବା ପାଇଁ କହିଥିଲେ ବି କିଛି ଲାଭ ହୋଇନଥିଲା। ପ୍ରାୟ ୧୧ ଦିନ ଧରି ତାଲା ନଖୋଲିବାରୁ ସମ୍ପର୍କୀୟଙ୍କୁ କହି ଗେଟ୍ର ତାଲା ଖୋଲିବା ସହିତ ପୋଲିସକୁ ଜଣାଇଥିଲେ ପତ୍ନୀ। ପୋଲିସ ଆସି ସ୍ଥିତି ଯାଞ୍ଚ୍ କରିଥିଲା ବୋଲି କ୍ୟାମେରା ଆଗରେ ଅଭିଯୋଗ କରିଛନ୍ତି ପତ୍ନୀ ।

ମହିଳା ଜଣକ ଆହୁରି କହିଛନ୍ତି ତାଙ୍କ ସ୍ବାମୀ ଚତୁରତା ସହ କୌଣସି ଏକ ଅସ୍ତ୍ରୋପଚାର କରିଛନ୍ତି। ଘର ତାଲା ଭାଙ୍ଗି ତାଙ୍କୁ ଉଦ୍ଧାର କରିବା ପରେ ବର୍ତ୍ତମାନ ଶ୍ବଶୁର ଘର ଓ ସ୍ଵାମୀଙ୍କ ପକ୍ଷରୁ ଅନେକ ପ୍ରକାରର ଧମକ ମିଳୁଛି। ଏମିତିକି ଜୀବନ ପ୍ରତି ବିପଦ ଥିବା ମଧ୍ୟ ଅଭିଯୋଗ କରିଛନ୍ତି। ଆହୁରି ମଧ୍ୟ ଡାକ୍ତର ସ୍ବାମୀଙ୍କ ଅନେକ ମହିଳାଙ୍କ ସହ ସହ ସମ୍ପର୍କ ଥିବା ମଧ୍ୟ ଅଭିଯୋଗ କରିଛନ୍ତି ଅଭିଯୋଗକାରିଣୀ । ଏହି ଘଟଣାରେ ଡାକ୍ତର କିମ୍ବା ତାଙ୍କ ପରିବାର ଲୋକଙ୍କ ପ୍ରତିକ୍ରିୟା ମିଳିପାରିନାହିଁ। ପୋଲିସ ମାମଲାର ତଦନ୍ତ କରୁଛି।