PSL ପାଇଁ IPLକୁ ଏଡ଼ାଇଲେ CSK-RCBର ଅଧିନାୟକ ଫାପ୍ ଡୁପ୍ଲେସିସ୍

ନୂଆଦିଲ୍ଲୀ: ଆଇପିଏଲ୍ ୨୦୨୬ର ମିନି ନିଲାମ ପୂର୍ବରୁ ଦକ୍ଷିଣ ଆଫ୍ରିକାର ପୂର୍ବତନ ଅଧିନାୟକ ଫାଫ ଡୁ ପ୍ଲେସିସ ଶନିବାର ବଡ଼ ନିଷ୍ପତ୍ତି ନେଇଛନ୍ତି। ସେ ୧୪ ବର୍ଷରେ ପ୍ରଥମ ଥର ଆଇପିଏଲ୍ ନ ଖେଳିବାକୁ ନିଷ୍ପତ୍ତି ନେଇଛନ୍ତି। ସେ ପିଏସଏଲ ୨୦୨୬ ଖେଳିବାକୁ ଯାଉଥିବା କହିଛନ୍ତି। ଡୁପ୍ଲେସିସ୍ ୨୦୧୨ରେ ଚେନ୍ନାଇ ସୁପର କିଙ୍ଗ୍ସ ପାଇଁ ଆଇପିଏଲରେ ପଦାର୍ପଣ କରିଥିଲେ ଏବଂ ୩୯୮ ରନ କରି ନିଜର ସ୍ଵତନ୍ତ୍ର ଛାପ ଛାଡ଼ିଥିଲେ। ଏହା ପରେ ସେ ୨୦୧୮ ଓ ୨୦୨୧ରେ ସିଏସକେ ସହିତ ଦୁଇ ଥର ଆଇପିଏଲ୍ ଟାଇଟଲ୍ ଜିତିଥିଲେ।

ଡୁପ୍ଲେସିସ୍ ଏକ୍ସରେ ପୋଷ୍ଟ କରିଛନ୍ତି, ଆଇପିଏଲରେ ୧୪ ସିଜିନ ପରେ ମୁଁ ଚଳିତ ବର୍ଷ ନିଲାମୀରୁ ଓହରିବାକୁ ନିଷ୍ପତ୍ତି ନେଇଛନ୍ତି। ଏହା ମୋ ପାଇଁ ଏକ ବଡ଼ ନିଷ୍ପତ୍ତି। ଏହି ଲିଗ୍ ମୋ କ୍ରିକେଟ୍ ଯାତ୍ରାର ଏକ ବଡ଼ ଅଂଶ ହୋଇ ରହିଛି। ତେବେ ଭବିଷ୍ୟତରେ ସେ ଏହି ଲିଗ୍କୁ ପ୍ରତ୍ୟାବର୍ତ୍ତନ କରିବେ। ମୁଁ ଭାଗ୍ୟଶାଳୀ ଯେ, ମୋତେ ବିଶ୍ଵସ୍ତରୀୟ ଖେଳାଳି ଓ ଫ୍ରାଞ୍ଚାଇଜ ପାଇଁ ଖେଳିବାର ସୁଯୋଗ ମିଳିଛି।

ଡୁପ୍ଲେସିସ କହିଛନ୍ତି,୧୪ ବର୍ଷ ଲମ୍ବା ସମୟ ଏବଂ ଏହାକୁ ନେଇ ମୁଁ ଗର୍ବିତ ଯେ ଏହି ଅଧ୍ୟାୟ ମୋ ପାଇଁ କେତେ ମହତ୍ଵ ରଖୁଛି। ମୋ ହୃଦୟରେ ଭାରତ ପ୍ରତି ଖାସ୍ ସ୍ଥାନ ରହିଛି। ଏହା କୌଣସି ଗୁଡବାୟ ନୁହେଁ। ମାତ୍ର ଏବେ ୪୧ ବର୍ଷର ଏହି ଖେଳାଳି ପିଏସଏଲ ସହିତ ଏକ ନୂଆ ଯାତ୍ରାରେ ବାହାରିବାକୁ ପ୍ରସ୍ତୁତ।ଏହି ଲିଗ୍ ୨୦୨୬ ମାର୍ଚ୍ଚ ଓ ମେ ମଧ୍ୟରେ ଆଇପିଏଲ୍ ସହିତ ଗୋଟିଏ ସମୟରେ ଆୟୋଜିତ ହେବ।

ସେ କହିଛନ୍ତି, ଏହି ବର୍ଷ ମୁଁ ଏକ ନୂଆ ଚ୍ୟାଲେଞ୍ଜ ନେବାକୁ ନିଷ୍ପତ୍ତି ନେଇଛି। ମୁଁ ଆଗାମୀ ପିଏସଏଲ ସିଜିନ ଖେଳିବାକୁ ଯାଉଛି। ଏହା ମୋ ପାଇଁ ଏକ ରୋମାଞ୍ଚକର ପଦକ୍ଷେପ। କିଛି ନୂଆ ଅନୁଭବ ସାଉଁଟିବା, ଜଣେ ଖେଳାଳି ଭାବେ ନିଜକୁ ଉନ୍ନତ କରିବା ପାଇଁ ଉର୍ଜାରେ ଭରା ଏହି ଲିଗ୍ ଆପଣେଇବାକୁ ସୁଯୋଗ ମିଳିଛି।

ଫାଫ୍ ଡୁ ପ୍ଲେସିସ୍ ୨୦୨୨ ଓ ୨୦୨୪ ମଝିରେ ଆରସିବିର ଅଧିନାୟକତ୍ଵ କରିଛନ୍ତି ଏବଂ ଗତ ସିଜିନରେ ଦିଲ୍ଲୀ କ୍ୟାପିଟାଲ୍ସ ପାଇଁ ଖେଳିଛନ୍ତି। ସେ ୧୫୪ ଆଇପିଏଲ୍ କ୍ୟାରିୟରରେ ୪,୭୭୩ ରନ୍ କରିଛନ୍ତି। ଏଥିରେ ୩୯ଟି ଅର୍ଦ୍ଧଶତକ ସାମିଲ୍।