ସୋନିଆ-ରାହୁଲଙ୍କ ପାଇଁ ବଢିଲା ଅଡୁଆ : EOWରେ ରୁଜୁ ହେଲା ମାମଲା, ଏବେ କ'ଣ କରିବ କଂଗ୍ରେସ ?

ନୂଆଦିଲ୍ଲୀ, ୩୦/୧୧: ବଢିଲା ସୋନିଆ ଏବଂ ରାହୁଲଙ୍କ ପାଇଁ ଅଡୁଆ । କଂଗ୍ରେସ ନେତ୍ରୀ ସୋନିଆ ଗାନ୍ଧୀ ଏବଂ ପୁଅ ରାହୁଲ ଗାନ୍ଧୀଙ୍କ ପାଇଁ ଅଡୁଆ ବଢିବାରେ ଲାଗିଛି । ଦିଲ୍ଲୀ ପୋଲିସର ଅର୍ଥନୈତିକ ଅପରାଧ ଶାଖା ଉଭୟଙ୍କ ନାଁରେ ଏଫଆଇଆର ରୁଜୁ କରିଛି । ନ୍ୟାଶନାଲ ହେରାଲ୍ଡ ମାମଲାରେ ଏହି ଏଫାଆଇଆର ହୋଇଛି । ଅନ୍ୟ ୭ ଜଣଙ୍କ ନାଁ ମଧ୍ୟ ଏଫଆଇଆରରେ ଉଲ୍ଲେଖ ରହିଛି । ସେମାନଙ୍କ ବିରୋଧରେ ଠକେଇର ମାମଲା ଲାଗିଛି । ୨୦୦୦ କୋଟି ଟଙ୍କାର ଆସୋସିଏଟେଡ୍ ଜର୍ଣ୍ଣାଲ ଲିମିଟେଡକୁ ଅକ୍ତିଆର କରିବା ସମୟରେ ସେମାନେ ଚଞ୍ଚକତା କରିଥିବା ଅଭିଯୋଗ ହୋଇଛି । ଯେଉଁଥିରେ ଗାନ୍ଧୀ ପରିବାରର ୭୬ ପ୍ରତିଶତ ସେୟାର ରହିଥିଲା ।

ରିପୋର୍ଟ ଅନୁସାରେ, ଅକ୍ଟୋବର ୩ ତାରିଖରେ ଏଫଆଇଆର ରୁଜୁ ହୋଇଥିଲା । ଏବେ ଏହାର ତଥ୍ୟ ସାର୍ବଜନୀନ ହୋଇଛି । ଇଡିର ଏକ ଅଭିଯୋଗ ପରେ ମାମଲା ରୁଜୁ ହୋଇଥିଲା । ଅଭିଯୋଗରେ ଦର୍ଶାଯାଇଛି ଯେ, ୨୦୦୦ କୋଟିର ଆସୋସିଏଟେଡ୍ ଜର୍ଣ୍ଣାଲ ଲିମିଟେଡକୁ ୟଙ୍ଗ୍ ଇଣ୍ଡିଆ ମାଧ୍ୟମରେ ଚଞ୍ଚକତା କରି ହାତେଇଥିଲେ ସୋନିଆ ଏବଂ ରାହୁଲ । କୋଲକାତାରେ ଥିବା ଡୋଟେକ୍ସ ମର୍ଚାଣ୍ଟାଇଜ୍ ପ୍ରାଇଭେଟ୍ ଲିମିଟେଡ୍ ନାମକ ସେଲ କମ୍ପାନୀକୁ ତଦନ୍ତର ପରିସରଭୁକ୍ତ କରାଯାଇଛି । ସେଲ୍ କମ୍ପାନୀ ୟଙ୍ଗ ଇଣ୍ଡିଆକୁ ୧ କୋଟି ଚଙ୍କା ପ୍ରଦାନ କରିଥିଲା । ଯାହା ଆସୋସିଏଟେଡ୍ ଜର୍ଣ୍ଣାଲ ଲିମିଟେଡର ଅଧିଗ୍ରହଣକୁ ସହଜ କରିଥିଲା ।

ଦିଲ୍ଲୀ ପୋଲିସ ପକ୍ଷରୁ ହୋଇଥିବା ମାମଲାରେ ସୋନିଆ ଏବଂ ରାହୁଲଙ୍କ ,ସମେତ ଅନ୍ୟମାନେ ସାମିଲ ଅଛନ୍ତି । ଏଥିରେ ସାମ୍ ପିଟ୍ରୋଡାଙ୍କ ନାଁ ମଧ୍ୟ ରହିଛି । ଏଫଆଇଆରରେ ତିନୋଟି କମ୍ପାନୀର ନାଁ ରହିଛି । ଯାହାର ତଦନ୍ତ କରାଯିବ । ଜଣାପଡିଛି ଯେ, ଏପ୍ରିଲ ୯ ତାରିଖରେ ଗାନ୍ଧୀ ପରିବାର ଏବଂ ଅନ୍ୟମାନଙ୍କ ବିରୋଧରେ ପିଏମଏଲଏ ଆକ୍ଟ ଅନୁସାରେ ଚାର୍ଜସିଟ୍ ଦାଖଲ ହୋଇଥିଲା । ରାଉସ ଆଭିନ୍ୟୁ କୋର୍ଟରେ ମାମଲା ଦୀର୍ଘଦିନ ହେବ ଏହି ମାମଲା ଚାଲିଛି । ଡିସେମ୍ବର ୧୬ରେ ମାମଲା ଉପରେ ରାୟ ପ୍ରକାଶ ପାଇପାରେ ।

ସୂତ୍ରାନୁସାରେ, ଆସୋସିଏଟେଡ୍ ଜର୍ଣ୍ଣାଲ ଲିମିଟେଡର ସେୟାରହୋଲ୍ଡରଙ୍କୁ ପଚରାଉଚରା ପାଇଁ ସମନ ହୋଇପାରେ । କଂଗ୍ରେସ ୟଙ୍ଗ ଇଣ୍ଡିଆକୁ ହସ୍ତାନ୍ତର କରିବା ପୂର୍ବରୁ ବୋର୍ଡ ସଦସ୍ୟଙ୍କ ସହ ଆଲୋଚନା କରିଥିଲା ନା ନାହିଁ ତାହା ଏଥିରୁ ସ୍ପଷ୍ଟ ହେବ । ପୂର୍ବରୁ ଅଭିଯୋଗକୁ ଦଳ ପକ୍ଷରୁ ଖଣ୍ଡନ କରାଯାଇଛି । ଇଡି ସରକାରଙ୍କ ପାଇଁ କାର୍ଯ୍ୟ କରୁଥିବା କହି ଆସିଛି । ଅନ୍ୟ ଦିଗରେ ନୂଆ ଏଫଆଇଆର ବାବଦରେ ଦଳ କିଛି ଜାଣିନଥିବା ମଧ୍ୟ କିଛି ନେତା କହିଛନ୍ତି ।