ଧରାପଡିଗଲା ନକଲି ଡାକ୍ତରଙ୍କ ମିଛ ସାନ ଭାଇ କାହାଣୀ, ୨୨ ଲକ୍ଷ ଟଙ୍କା ଠକେଇ ଅଭିଯୋଗରେ ଗିରଫ

ଭୁବନେଶ୍ବର ୧୫।୧: ମାଟ୍ରିମୋନି ସାଇଟ୍‌ରେ ମିଛ ବିବାହ ପ୍ରତିଶ୍ରୁତି । ସାନ ଭାଇ ସହ ବାହାଘର କରାଇବାକୁ କହି ମହିଳାଙ୍କୁ ଠକେଇ । ୨୨ ଲକ୍ଷ ଟଙ୍କାର ଚୂନ ଲଗାଇଲେ ନକଲି ଡାକ୍ତର । ଆଉ ଶେଷରେ ଧରାପଡି ବନ୍ଧାହେଲେ ଠକ ଡାକ୍ତର ରଞ୍ଜୀବ କୁମାର ପ୍ରଧାନ । ମହିଳାଙ୍କ ପରିବାରଠୁ ୨୨ ଲକ୍ଷ ଟଙ୍କା ଠକେଇ ଅଭିଯୋଗ ପରେ ନକଲି ଡାକ୍ତରଙ୍କୁ ବାନ୍ଧିଲା ପାହାଳ ଥାନା ପୋଲିସ ।

ସୂଚନାଯୋଗ୍ୟ ଯେ, ୨୦୨୧ ମସିହାରେ ମାଟ୍ରିମୋନି ସାଇଟ୍‌ରେ ଅଭିଯୁକ୍ତ ଜଣଙ୍କ ନିଜକୁ ଡକ୍ଟର ପ୍ରକାଶ ପ୍ରଧାନ ବୋଲି ପରିଚୟ ଦେଇ ଜଣେ ମହିଳାଙ୍କ ସହ ଯୋଗାଯୋଗରେ ଆସିଥିଲେ । ଅଭିଯୁକ୍ତ ଜଣଙ୍କ ନିଜ ସାନ ଭାଇ ତୁଷାର ପ୍ରଧାନଙ୍କ ସହ ବାହାଘର ପାଇଁ ଅଭିଯୋଗକାରିଣୀଙ୍କୁ ପ୍ରସ୍ତାବ ଦେଇଥିଲେ । ଏମିତି କି ଅଭିଯୋଗକାରିଣୀଙ୍କ ପରିବାର ଲୋକଙ୍କ ସହ ଯୋଗାଯୋଗ କରିଥିଲେ ।

ଏହାସହ ତାଙ୍କ ସାନ ଭାଇ ତୁଷାର ରାୟଗଡ଼ା ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆରେ ଡେପୁଟି ମ୍ୟାନେଜର ଥିବା ଅଭିଯୋକାରିଣୀଙ୍କ ପରିବାର ଲୋକଙ୍କୁ ଜଣାଇଥିଲେ । ବ୍ୟାଙ୍କରେ ବିଭିନ୍ନ ପଲିସି କରିବା ନାଁରେ ଅଭିଯୁକ୍ତ ନକଲି ଡାକ୍ତର ମହିଳାଙ୍କ ବାପାଙ୍କ ଠାରୁ ୨୨ ଲକ୍ଷ ଟଙ୍କା ନେଇଯାଇଥିଲେ । ଟଙ୍କା ନେବାପରେ ଅଭିଯୁକ୍ତ ଜଣଙ୍କ ଆଉ ଧରାଛୁଆଁ ଦେଉନଥିଲେ । ପରେ ଏନେଇ ପାହାଳ ଥାନାରେ ମହିଳା ଜଣଙ୍କ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୋଲିସ ତଦନ୍ତ ଆରମ୍ଭ କରିଥିଲା । ତଦନ୍ତ ବେଳେ ଜଣାପଡିଥିଲା ଯେ ଅଭିଯୁକ୍ତ ରଞ୍ଜୀବ ଜଣେ ଡାକ୍ତର ନୁହଁନ୍ତି । କି ତାଙ୍କର କେହି ଭାଇ ମଧ୍ୟ ନଥିବା ପୋଲିସ ଜାଣିବାକୁ ପାଇଥିଲା । ଶେଷରେ ପାହାଳ ଥାନା ପୋଲିସ ଅଭିଯୁକ୍ତ ନକଲି ଡାକ୍ତକଙ୍କୁ ଗିରଫ କରିଥିବା ଜଣାପଡିଛି ।