ପାକିସ୍ତାନ କ୍ୱେଟାରେ ଆତ୍ମଘାତୀ ଆକ୍ରମଣ, ୬ ମୃତ

ଲାହୋର,୦୧ /୧୨: ପାକିସ୍ତାନ ଅଶାନ୍ତ । ପୁଣି ଥରେ ହେଲା ଆକ୍ରମଣ । ଦେଶର ବେଲୁଚିସ୍ତାନ ପ୍ରାନ୍ତରେ ଥିବା ଫ୍ରଣ୍ଟିଅର୍ ପୋଲିସର ମୁଖ୍ୟାଳୟର ମୁଖ୍ୟ ଗେଟରେ ସୋମବାର ସାକାଳେ ଆତ୍ମଘାତୀ ଆକ୍ରମଣ ହୋଇଛି । ଏଥିରେ ୬ ଜଣ ପ୍ରାଣ ହରାଇଥିବା ଜଣାପଡିଛି । ବେଲୁଚିସ୍ତାନ ଲିବରେସନ ଫ୍ରଣ୍ଟର ଅପରେସନ ବ୍ୟାଟାଲିୟନ ଏହି ଆକ୍ରମଣ କରିଥିବା ଅନୁମାନ କରାଯାଉଛି ।

ରିପୋର୍ଚ ଅନୁସାରେ, ସୋମବାର ସକାଳେ ମୁଖ୍ୟାଳୟର ମେନ୍ ଗେଟରେ ଭୟଙ୍କର ବିସ୍ଫୋରଣ ହୋଇଥିଲା । ଫଳରେ କାନ୍ଥ ଭୁଶୁଡି ପଡିଥିଲା । ଏଠାରେ ଏକ ଗାଡିରେ ବିସ୍ଫୋରକ ରଖାଯାଇଥିଲା । ଯାହା କାର୍ଯ୍ୟାଳୟ ଖୋଲିବା ସମୟରେ ବିସ୍ଫୋରଣ ହୋଇଥିଲା । ଆକ୍ରମଣ ପରେ କିଛି ବନ୍ଧୁକଧାରୀ ବ୍ୟକ୍ତି ମୁଖ୍ୟାଳୟ ମଧ୍ୟରେ ପ୍ରବେଶ କରି ଆଖିବୁଜା ଗୁଳିମାଡ କରିଥିଲେ ।

ମୁଖ୍ୟାଳୟ ଭିତରେ ଏବେବି ଗୁଳି ବିନିମୟ ଚାଲିଥିବା ସୂଚନା ମିଳିଛି । ଘଟଣାସ୍ଥଳରେ ବରିଷ୍ଠ ପୋଲିସ ଅଧିକାରୀ ଏବଂ ସେନାର ଅଧିକାରୀ ପହଁଚିଥିବା ବେଳେ ପରିସ୍ଥିତି ସଙ୍ଗୀନ ରହିଛି । ଆକ୍ରମଣ ପରେ ଆଖପାଖ ଅଞ୍ଚଳରେ ଥିବା ସମସ୍ତ ହସ୍ପିଟାଲକୁ ଆଲର୍ଟ ରହିବା ପାଇଁ ନିର୍ଦ୍ଦେଶ ଦିଆଯାଇଛି ।

ସ୍ଥାନୀୟ ରିପୋର୍ଟ ଅନୁସାରେ, ଘଟଣାସ୍ଥଳରେ ପୋଲିସକୁ ସାହାଯ୍ୟ ପାଇଁ କ୍ୱେଟାରୁ ଦୁଇଟି ହେଲିକପ୍ଟର ପହଁଚିଛି । କିନ୍ତୁ ଘଟଣା ପାଇଁ କେହି ହେଲେ ନିଜକୁ ଦାୟୀ କରିନାହାଁନ୍ତି । ଗତ କିଛି ଦିନ ହେବ ବେଲୁଚିସ୍ତାନ ଲିବରେସନ ଆର୍ମୀ ପାକିସ୍ତାନର ସୁରକ୍ଷାକର୍ମୀଙ୍କୁ ଟାର୍ଗେଟ କରିବା ବଢାଇ ଦେଇଛି । ଏହାର ଆରମ୍ଭ ମାର୍ଚ୍ଚରୁ ହୋଇଥିଲା । ଯେତେବେଳେ ବେଲୁଚିସ୍ତାନ ପ୍ରାନ୍ତରେ ଏକ ଟ୍ରେନକୁ ବନ୍ଧକ ରଖାଯାଇଥିଲା । ସେହିପରି ଗତ ସପ୍ତାହରେ ପାକିସ୍ତାନର ଏକ ଅର୍ଧସାମରିକ ବାହିନୀର କାର୍ଯ୍ୟାଳୟରେ ଆକ୍ରମଣ ହୋଇଥିଲା ।