ମୁସଲମାନେ ଓ ଖ୍ରୀଷ୍ଟିଆନ ବି ଆରଏସଏସରେ ଯୋଗ ଦେଇପାରିବେ, ହେଲେ ଗୋଟିଏ ସର୍ତ୍ତ: କେଉଁ ସର୍ତ୍ତ ରଖିଲେ ମୋହନ ଭାଗବତ ?

ନୂଆଦିଲ୍ଲୀ: ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ) ମୁଖ୍ୟ ମୋହନ ଭାଗବତ ରବିବାର ଏକ ବଡ଼ କଥା କହିଛନ୍ତି। ମୁସଲମାନ ଏବଂ ଖ୍ରୀଷ୍ଟିଆନ ସମେତ ସମସ୍ତ ଧର୍ମର ଲୋକମାନେ ସଂଘରେ ଯୋଗ ଦେଇପାରିବେ। କିନ୍ତୁ ସେମାନଙ୍କୁ ଧାର୍ମିକ ଭିନ୍ନତା ଛାଡ଼ି ଏକ ହିନ୍ଦୁ ସମାଜର ସଦସ୍ୟ ଭାବିବାକୁ ପଡ଼ିବ।

ମୁସ୍ଲିମ୍‌ଙ୍କୁ ଯୋଗ ଦେବାକୁ ଆର୍‌ଏସଏସ୍‌ରେ ଅନୁମତି ଦିଆଯାଇଛି କି ନାହିଁ ପ୍ରଶ୍ନରେ ଭାଗବତ କହିଛନ୍ତି "ସଂଘରେ କୌଣସି ବ୍ରାହ୍ମଣଙ୍କୁ ଅନୁମତି ନାହିଁ। ସଂଘରେ ଅନ୍ୟ କୌଣସି ଜାତିକୁ ଅନୁମତି ନାହିଁ। ସଂଘରେ କୌଣସି ମୁସଲମାନଙ୍କୁ ଅନୁମତି ନାହିଁ, କୌଣସି ଖ୍ରୀଷ୍ଟିଆନଙ୍କୁ ଅନୁମତି ନାହିଁ... କେବଳ ହିନ୍ଦୁମାନଙ୍କୁ ଅନୁମତି ଅଛି।" ଏହାକୁ ଆଉ ଟିକେ ସ୍ପଷ୍ଟ କରି ସେ କହିଛନ୍ତି ଯେ ସମସ୍ତ ଧର୍ମର ଅନୁଗାମୀମାନେ ଭାରତ ମାତାର ପୁତ୍ର ଭାବରେ ସଂଘରେ ଯୋଗ ଦେବାକୁ ସ୍ୱାଗତ କରାଯିବ।

ଭାଗବତ କହିଛନ୍ତି “ ତେଣୁ ବିଭିନ୍ନ ସମ୍ପ୍ରଦାୟର ଲୋକମାନେ, ସେମାନେ ମୁସଲମାନ ହୁଅନ୍ତୁ କିମ୍ବା ଖ୍ରୀଷ୍ଟିଆନ , ଯେକୌଣସି ସମ୍ପ୍ରଦାୟର ଲୋକ ସଂଘକୁ ଆସିପାରିବେ କିନ୍ତୁ ଏଥିପାଇଁ ଆପଣଙ୍କର ଧାର୍ମିକ ଭିନ୍ନତାକୁ ବାହାରେ ରଖିବାକୁ ପଡ଼ିବ। ତେବେ ଆପଣଙ୍କୁ ବିଶେଷ ସ୍ୱାଗତ। କିନ୍ତୁ ଯେତେବେଳେ ଆପଣ ଶାଖା ଭିତରକୁ ଆସୁଛନ୍ତି, ସେତେବେଳେ ଆପଣ ଭାରତ ମାତାର ପୁତ୍ର ଭାବରେ ଆସନ୍ତି, ଏହି ହିନ୍ଦୁ ସମାଜର ସଦସ୍ୟ ଭାବେ ଆସନ୍ତି।”

ଭାଗବତ ଆହୁରି କହିଛନ୍ତି ଯେ ସଂଘ ଏହାର ଦୈନିକ ଶାଖାରେ ଯୋଗଦେବା ପାଇଁ କାହାରି ଧର୍ମ କିମ୍ବା ଜାତି ପଚାରେ ନାହିଁ। ଏନେଇ ଭାଗବତ କହିଛନ୍ତି “ହିନ୍ଦୁ ସମାଜର ଅନ୍ୟ ସମସ୍ତ ଜାତି ପରି ମୁସଲମାନମାନେ ବି ଶାଖାକୁ ଆସନ୍ତି, ଖ୍ରୀଷ୍ଟିଆନମାନେ ବି ଶାଖାକୁ ଆସନ୍ତି। କିନ୍ତୁ ଆମେ ସେମାନଙ୍କର ଗଣନା କରୁନା, ଏବଂ ସେମାନଙ୍କ ପରିଚୟ ପଚାରୁନାଁ। ଆମେ ସମସ୍ତେ ଭାରତ ମାତାର ପୁତ୍ର। ସଂଘ ଏହିପରି କାମ କରେ।”

ଆରଏସଏସ ଦ୍ୱାରା ଆୟୋଜିତ ଏକ ପ୍ରଶ୍ନୋତ୍ତର କାର୍ଯ୍ୟକ୍ରମରେ ମୋହନ ଭାଗବତ ଏଭଳି ସମସ୍ତ ପ୍ରଶ୍ନର ଉତ୍ତର ରଖିଥିଲେ। ଯେଉଁଠାରେ ସେ ସଂଗଠନର ପଞ୍ଜିକରଣ ସ୍ଥିତି, ରାଜନୈତିକ ଭାବନା ଏବଂ ଅନ୍ୟାନ୍ୟ ଧର୍ମ ସହିତ ସମ୍ପର୍କ ଉପରେ ଉତ୍ତର ରଖିଥିଲେ। ଏହି ଅବସରରେ ଆରଏସଏସର ପଞ୍ଜୀକରଣ ଏବଂ ପାଣ୍ଠିର ଉତ୍ସ ଉପରେ ପ୍ରଶ୍ନ ଉଠାଇଥିବା କଂଗ୍ରେସ ନେତାମାନଙ୍କ ସମାଲୋଚନାର ଜବାବ ବି ଦେଇଥିଲେ।

ଭାଗବତ କହିଛନ୍ତି, "ଆରଏସଏସ ୧୯୨୫ ମସିହାରେ ପ୍ରତିଷ୍ଠିତ ହୋଇଥିଲା, ତେବେ ଆପଣ କ'ଣ ଆଶା କରୁଛନ୍ତି ଯେ ଆମେ ବ୍ରିଟିଶ ସରକାରଙ୍କ ପାଖରେ ପଞ୍ଜୀକୃତ ହୋଇଥିବୁ?" ସେ ଆହୁରି ମଧ୍ୟ କହିଛନ୍ତି ଯେ ସ୍ୱାଧୀନତା ପରେ, ପଞ୍ଜୀକରଣ ବାଧ୍ୟତାମୂଳକ ନଥିଲା। ଆମକୁ ବ୍ୟକ୍ତିବିଶେଷଙ୍କ ଏକ ସଂଗଠନ ଭାବରେ ବର୍ଗୀକୃତ କରାଯାଇଛି। ଏବଂ ଆମେ ଏକ ସ୍ୱୀକୃତିପ୍ରାପ୍ତ ସଂଗଠନ। ଆୟକର ବିଭାଗ ଏବଂ କୋର୍ଟ ଉଭୟ ଆରଏସଏସକୁ ବ୍ୟକ୍ତିବିଶେଷଙ୍କ ସଂଗଠନ ଭାବରେ ଦର୍ଶାଇବା ସହିତ ଆୟକରରୁ ମୁକ୍ତ କରାଯାଇଛି ବୋଲି ଶ୍ରୀ ଭାଗବତ କହିଛନ୍ତି।

ତେବେ ସଂଗଠନର ରାଜନୈତିକ ଆଭିମୁଖ୍ୟ ନେଇ ଭାଗବତ ପୁଣିଥରେ ସମାନ କଥା ଦୋହରାଇଛନ୍ତି। ସେ କହିଛନ୍ତି ଯେ ସଂଘ କୌଣସି ରାଜନୈତିକ ଦଳକୁ ସମର୍ଥନ କରେ ନାହିଁ କିନ୍ତୁ ଜାତୀୟ ସ୍ୱାର୍ଥରେ ବିଶ୍ୱାସ କରୁଥିବା ନୀତିକୁ ସମର୍ଥନ କରେ। ଆମେ ଭୋଟ ରାଜନୀତି, ସାମ୍ପ୍ରତିକ ରାଜନୀତି, ନିର୍ବାଚନ ରାଜନୀତି ଇତ୍ୟାଦିରେ ଅଂଶଗ୍ରହଣ କରୁ ନାହୁଁ। ସଂଘର କାର୍ଯ୍ୟ ସମାଜକୁ ଏକତ୍ର କରିବା ଏବଂ ରାଜନୀତି, ସ୍ୱଭାବତଃ, ବିଭାଜନକାରୀ, ତେଣୁ ଆମେ ରାଜନୀତିରୁ ଦୂରରେ ରହୁ ବୋଲି ଭାଗବତ କହିଛନ୍ତି।

ସେହିପରି ପାକିସ୍ତାନ ସହିତ ଭାରତର ସମ୍ପର୍କ ବିଷୟରେ ମଧ୍ୟ ଉତ୍ତର ରଖିଥିଲେ ଆରଏସଏସ ମୁଖ୍ୟ। ସେ କହିଛନ୍ତି ଯେ ପଡ଼ୋଶୀ ଦେଶ ଭାରତକୁ କ୍ଷତି ପହଞ୍ଚାଇବାର ପ୍ରୟାସ ବନ୍ଦ କଲେ ହିଁ ଶାନ୍ତି ସମ୍ଭବ। ଭାଗବତ କହିଛନ୍ତି "ପାକିସ୍ତାନ ଆମ ସହିତ ଶାନ୍ତି ଚାହୁଁ ନାହିଁ। ଯେପର୍ଯ୍ୟନ୍ତ ସେ ଭାରତକୁ କ୍ଷତି ପହଞ୍ଚାଇ ସନ୍ତୋଷ ପାଏ, ସେପର୍ଯ୍ୟନ୍ତ ସେ ଏହା କରି ଚାଲିବ।" ସେ ଚେତାବନୀ ଦେଇ କହିଛନ୍ତି ଯେ ଯଦି ପାକିସ୍ତାନ ସେହି ପଥରେ ଜାରି ରହେ, ତେବେ ଦିନେ ତାକୁ ଉଚିତ ଶିକ୍ଷା ମିଳିବ। ୧୯୭୧ ମସିହାର ବାଂଲାଦେଶ ସୃଷ୍ଟିର ଯୁଦ୍ଧକୁ ଉଦାହରଣ ଦେଇ କହିଥଲେ ଭାଗବତ।

ଭାରତରେ ଜାତିବାଦ ବର୍ଣ୍ଣ ବୈଷମ୍ୟ ଆଦି ସାମାଜିକ ସମସ୍ୟା ଉପରେ ମଧ୍ୟ ଭାଗବତ ତାଙ୍କ ମତ ରଖିଛନ୍ତି। ସାମାଜିକ ପ୍ରସଙ୍ଗଗୁଡ଼ିକୁ ସମ୍ବୋଧିତ କରି ଭାଗବତ କହିଛନ୍ତି ଯେ ଜାତିବାଦ ଆଉ ନାହିଁ କିନ୍ତୁ ଜାତି ଦ୍ୱନ୍ଦ୍ୱ ରହିଛି, ଯାହା ନିର୍ବାଚନ ରାଜନୀତି ଏବଂ ରିହାତି ଦ୍ୱାରା ପରିଚାଳିତ ହେଉଛି। ଜାତିକୁ ଦୂର କରିବାର କୌଣସି ଆବଶ୍ୟକତା ନାହିଁ। ଜାତିକୁ ଭୁଲିଯିବା ଆବଶ୍ୟକ ବୋଲି ସେ କହିଥିଲେ। ତଥାକଥିତ 'ଲଭ୍ ଜିହାଦ' ପ୍ରସଙ୍ଗରେ ଭାଗବତ ଲୋକମାନଙ୍କୁ ଅନ୍ୟମାନେ କ'ଣ କରନ୍ତି ତାହା ଉପରେ ଅତ୍ୟଧିକ ଧ୍ୟାନ ନ ଧଏଇ ନିଜ ଘରେ "ହିନ୍ଦୁ ମୂଲ୍ୟବୋଧକୁ ସୁଦୃଢ଼ ​​କରିବାକୁ ଅନୁରୋଧ କରିଛନ୍ତି।