ଭାରତରେ ବଡ଼ ନିବେଶ କରିବ ଗୁଗଲ, ଆଦାନୀକନେକ୍ସ ସହଭାଗିତାରେ ତିଆରି କରିବ ସବୁଠୁ ବଡ଼ ଏଆଇ ଡାଟା ସେଣ୍ଟର

ନୂଆଦିଲ୍ଲୀ: ଭାରତରେ ବଡ଼ ନିବେଶ୍ କରିବ ଟେକ୍ ଜାଏଣ୍ଟ ଗୁଗଲ। ତିଆରି କରିବ ଭାରତର ସବୁଠୁ ବଡ଼ ଏଆଇ ଡାଟା ସେଣ୍ଟର। ଆଦାନୀ କନେକ୍ସ ସହଭାଗିତାରେ ଗୁଗଲ ଏହି ନିବେଶ କରିବାକୁ ଯାଉଥିବାବେଳେ, ଏଥିରେ ଲକ୍ଷ ଲକ୍ଷ ନିଯୁକ୍ତି ଅବସର ସୃଷ୍ଟି ହେବ। ଏନେଇ ମଙ୍ଗଳବାର ଉଭୟ କମ୍ପାନିଙ୍କ ପକ୍ଷରୁ ବିଧିବଦ୍ଧ ଭାବରେ ଘୋଷଣା କରାଯାଇଛି।

ରିପୋର୍ଟ ଅନୁସାରେ, ଗୁଗଲ ଆଦାନୀ ଏଣ୍ଟରପ୍ରାଇଜେସର ସହଯୋଗୀ କମ୍ପାନି ଆଦାଦୀକନେକ୍ସ ସହଭାଗିତାରେ ଆନ୍ଧ୍ର ପ୍ରଦେଶର ବିଶାଖାପଟ୍ଟନମ୍‌ରେ ଭାରତର ସବୁଠୁ ବଡ଼ ଏଆଇ ଡାଟା ସେଣ୍ଟର ଏବଂ ନୂଆ ଗ୍ରୀନ ଏନର୍ଜୀ ଇନଫ୍ରାଷ୍ଟକଚର ବିକଶିତ କରିବ।

ଗୁଗଲର ଏହି ଏଆଇ ହବ୍ ପାଇଁ ୨୦୨୬-୨୦୩୦ ମଧ୍ୟରେ ପ୍ରାୟ ୧୫ ମିଲିୟନ ଡଲାର ବା ପ୍ରାୟ ୧.୩୫ ଲକ୍ଷ କୋଟି ଟଙ୍କାର ନିବେଶ କରିବ। ଏହି ପ୍ରକଳ୍ପରେ ଗିଗାଓ୍ବାଟ ସ୍ତରର ଡାଟା ସେଣ୍ଟର ପରିଚାଳନା, ମଜଭୁତ କେବୁଲ ନେଟଓ୍ବର୍କ ଏବଂ ସ୍ବଚ୍ଛ ଉର୍ଜା ପ୍ରଣାଳୀ ବା କ୍ଲିନ୍‌ ଏନର୍ଜୀର ବ୍ୟବହାର ହେବ। ଯାହା ଭାରତରେ ଉନ୍ନତ ଏଆଇ କାର୍ଯ୍ୟଭାରକୁ ସମ୍ଭାଳିବାକୁ ସକ୍ଷମ ହେବ। ଏୟାରଟେଲ ମଧ୍ୟ ଗୁଗଲ ସହ ମିଶି ଏହି ପ୍ରକଳ୍ପକୁ କାର୍ଯ୍ୟକାରୀ କରିବ।

ତେବେ ଗୁଗଲର ଏହି ଏଆଇ ହବ୍ ଭାରତରେ କମ୍ପ୍ୟୁଟିଂ କ୍ଷମତା ବଢ଼ାଇବ ଏବଂ ଦେଶର ଏଆଇ କ୍ଷମତାକୁ ମଜଭୁତ କରିବ। ଦୁଇ କମ୍ପାନି ସ୍ଥାୟୀତ୍ବ ଉପରେ ଧ୍ୟାନ ଦେଇଛନ୍ତି। ଆନ୍ଧ୍ରପ୍ରଦେଶରେ ନୂଆ ଟ୍ରାନ୍ସମିଶନ ଲାଇନ୍ସ, ସ୍ବଚ୍ଛ ଉର୍ଜା ଉତ୍ପାଦନ ଏବଂ ଉର୍ଜାକୁ ଷ୍ଟୋର କରି ରଖିବା ପାଇଁ ଆବଶ୍ୟକୀୟ ସିଷ୍ଟମରେ ମଧ୍ୟ ନିବେଶ କରାଯିବ।

ଏହି ହବ୍‌କୁ ଗିଗାଓ୍ବାଟ-ସ୍ତରୀୟ କମ୍ପ୍ୟୁଟିଂ କ୍ଷମତା ସହ ଡାଟା ସେଣ୍ଟର ପରିସରରେ ବିକଶିତ କରାଯିବ। ଆଦାନିକନେକ୍ସ ଏବଂ ଏୟାରଟେଲ ସହଭାଗିତାରେ ଗୁଗଲ ସେହି ଆଡଭାନ୍ସ ଟେକ୍ନୋଲୋଜି ବ୍ୟବହାର କରିବ, ଯାହା ଗୁଗଲ ସର୍ଚ୍ଚ, ଓ୍ବାର୍କସ୍ପେଶ ଏବଂ ୟୁଟ୍ୟୁବ ପାଇଁ କରାଯାଉଛି। ଏହି ହବ୍‌, ବ୍ୟବସାୟିକ ପ୍ରତିଷ୍ଠାନ ଏବଂ ସଂସ୍ଥାଙ୍କୁ ଏଆଇ ସଲ୍ୟୁସନ ଏବଂ ରିସର୍ଚ୍ଚରେ ସାହାଯ୍ୟ କରିବ। ଯାହାଦ୍ବାରା ବିଶ୍ବରେ ଭାରର ଏଆଇ ନେତୃତ୍ବରେ ଆଗକୁ ବଢ଼ିପାରିବ।

ଗୁଗଲ ଏଆଇ ହବ୍‌ ଲଞ୍ଚକୁ ପିଏମ ମୋଦୀଙ୍କ ସ୍ବାଗତ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଶାଖାପଟ୍ଟନମରେ ଗୁଗଲ ଏଆଇ ହବ୍‌ ଲଞ୍ଚ୍‌କୁ ନେଇ ଖୁସି ପ୍ରକାଶ କରିଛନ୍ତି। ସେ କହିଛନ୍ତି ଏହି ନିବେଶ ଦ୍ବାରା ଏଆଇ ଟେକ୍ନୋଲୋଜି ସମସ୍ତଙ୍କ ନିକଟରେ ପହଞ୍ଚିପାରିବ। ଡିଜିଟାଲ ଅର୍ଥବ୍ୟବସ୍ଥାକୁ ପ୍ରୋତ୍ସାହିତ କରିବ ଏବଂ ଟେକ୍ନୋଲୋଜିରେ ଭାରତର ନେତୃତ୍ବକୁ ଆଗକୁ ବଢ଼ାଇବ।’’

ସେହିଭଳି କେନ୍ଦ୍ର ଆଇଟି ମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି, ‘‘୧୫ ବିଲିୟନ ଡଲାର ନିବେଶ ପାଇଁ ଗୁଗଲକୁ ଧନ୍ୟବାଦ। ଏହି ଡିଜିଟାଲ ଇନଫ୍ରାଷ୍ଟକଚର ଆମର ଏଆଇ ମିଶନ ଲକ୍ଷ୍ୟକୁ ହାସଲ କରିବାରେ ସାହାଯ୍ୟ କରିବ। ଉଦ୍ୟୋଗକୁ ଆମର ଆଇଟି ପ୍ରଫେସନାଲଙ୍କୁ ନୂଆ ଟେକ୍ନୋଲୋଜି ପାଇଁ ପ୍ରଶିକ୍ଷିତ କରିବା ଦରକାର।’’

ସେପଟେ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଏନ ଚନ୍ଦ୍ରବାବୁ ନାଇଡୁ କହିଛନ୍ତି, ‘‘ ଏହି ନିବେଶ ଆନ୍ଧ୍ର ପ୍ରଦେଶରେ ଡିଜିଟାଲ ପରିବର୍ତ୍ତନର ନୂଆ କାହାଣୀ ଲେଖୁଛି। ଭାରତର ପ୍ରଥମ ଗିଗାଓ୍ବାଟ-ସ୍ତରୀୟ ଡାଟା ସେଣ୍ଟର ଏବଂ ଗୁଗଲ ଏଆଇ ହବ୍‌ ରାଜ୍ୟରେ ଅଭିନବତା ଏବଂ ଏଆଇ ଆପଣାଇର ପ୍ରତିବଦ୍ଧତାକୁ ଦର୍ଶାଉଛି।’’

ଆଦାନୀ ଗ୍ରୁପ୍‌ ଚେୟାରମ୍ୟାନ ଗୌତମ ଆଦାନୀ କହିଛନ୍ତି, ‘ଆମେ ଗୁଗଲ ସହ ଏହି ଐତିହାସିକ ପ୍ରକଳ୍ପରେ ସହଭାଗିତାକୁ ନେଇ ଗର୍ବିତ। ଏହା ଭାରତର ଡିଜିଟାଲ ଭବିଷ୍ୟତକୁ ଆକାର ଦେଉଥିବା ପ୍ରକଳ୍ପ। ବିଶାଖାପଟ୍ଟନମ ଏବେ ବିଶ୍ବରେ ଟେକ୍ନୋଲୋଜିର କେନ୍ଦ୍ର ହେବାକୁ ଯାଉଛି।’’

ଗୁଗଲ କ୍ଲାଉଡ ସିଇଓ ଥମସ କୁରିୟନ କହିଛନ୍ତି, ‘‘ଭାରତର ଏଆଇ କ୍ଷମତାକୁ ଅନାବରଣ କରିବା ପାଇଁ ଆମେ ଏହି ହବ୍‌ରେ ନିବେଶ କରୁଛୁ। ଏହି ବ୍ୟବସାୟ, ଗବେଷକ ଏବଂ କ୍ରିଏଟରଙ୍କୁ AI ଦ୍ବାରା ବୃଦ୍ଧି ଏବଂ ନବସୃଜନ କରିବାର ସୁଯୋଗ ଦେବ। ଆଦାନୀ ଗ୍ରୁପ୍ ସହିତ କାମ କରି, ଆମେ ସମ୍ପ୍ରଦାୟ ଏବଂ ଗ୍ରାହକମାନଙ୍କ ପାଇଁ ସୁରକ୍ଷା, କାର୍ଯ୍ୟଦକ୍ଷତା ଏବଂ ମାପକାଠି ସୁନିଶ୍ଚିତ କରିବୁ।’’

ହଜାର ହଜାର ଲୋକଙ୍କ ପାଇଁ ଆର୍ଥିକ ବିକାଶ ଏବଂ ନିଯୁକ୍ତି

ଏହି ଏଆଇ ହବ୍ ଏବଂ ଏହାର ସଂଯୋଗର ପ୍ରବେଶପଥ ବିଶାଖାପାଟଣା, ଆନ୍ଧ୍ରପ୍ରଦେଶ ଏବଂ ସମଗ୍ର ଭାରତରେ ଆର୍ଥିକ ଅଭିବୃଦ୍ଧିକୁ ବୃଦ୍ଧି କରିବ। ଏହି ପ୍ରକଳ୍ପ ଡିଜିଟାଲ୍ ଅନ୍ତର୍ଭୁକ୍ତିକୁ ପ୍ରୋତ୍ସାହିତ କରିବ ଏବଂ ପ୍ରଯୁକ୍ତିବିଦ୍ୟା, ଉତ୍ପାଦନ ଏବଂ ସ୍ୱଚ୍ଛ ଶକ୍ତି କ୍ଷେତ୍ରରେ ହଜାର ହଜାର ନିଯୁକ୍ତି ସୃଷ୍ଟି କରିବ।