ପୁଟିନ ଆସିବା ପୂର୍ବରୁ ୨ ବିଲିଅନ ଡଲାର ଡିଲ୍ ଫାଇନାଲ: ଋଷ ଠାରୁ ପରମାଣୁ ଶକ୍ତିସମ୍ପନ୍ନ ବୁଡ଼ାଜାହାଜ ଆଣିବ ଭାରତ

ନୂଆଦିଲ୍ଲୀ: ପୁଟିନ ଭାରତ ଆସିବା ପୂର୍ବରୁ ଦୁଇ ଦେଶ ମଧ୍ୟରେ ଏକାଧିକ ଡିଲ୍ ଫାଇନାଲ ହୋଇସାରିଛି। ଋଷ ଠାରୁ ଏକ ପରମାଣୁ ଶକ୍ତିସମ୍ପନ୍ନ ଆକ୍ରମଣାତ୍ମକ ବୁଡ଼ାଜାହାଜ ଭଡ଼ାରେ ଆଣିବା ପାଇଁ ଭାରତ ପ୍ରାୟ ୨ ବିଲିୟନ ଆମେରିକୀୟ ଡଲାର ଦେବାକୁ ରାଜି ହୋଇଛି। ଏନେଇ ଦୁଇ ଦେଶ ମଧ୍ୟରେ ଦଶନ୍ଧୀ ଧରି ଆଲୋଚନା ଜାରି ରହିଥିଲା। ହେଲେ ଆଜି ପୁଟିନ ଆସିବା ପୂର୍ବରୁ ଡିଲ୍ ଫାଇନାଲ୍ ହୋଇଛି ବୋଲି ନ୍ୟୁଜ୍ ଏଜେନ୍ସି ବ୍ଲୁମବର୍ଗ ରିପୋର୍ଟ କରିଛି।

ଭଡ଼ାରେ ଆଣିବାକୁ ଋଷ ଅଧିକ ଦାମ କହୁଥିବାରୁ ଉଭୟ ଦେଶ ମଧ୍ୟରେ ଡିଲ୍ ଫାଇନାଲ ହୋଇପାରୁ ନଥିଲା। ଏଥିପାଇଁ ଦଶନ୍ଧୀ ଧରି ଆଲୋଚନା ଚାଲିଥିଲା ବୋଲି ଏ ସମ୍ପର୍କରେ ଜାଣିଥିବା ଜଣେ ବ୍ୟକ୍ତି ନାଁ ଗୋପନ ରଖି ବ୍ଲୁମବର୍ଗକୁ ସୂଚନା ଦେଇଛନ୍ତି। ହେଲେ ଏବେ ଦୁଇ ଦେଶର ଅଧିକାରୀ ଆଲୋଚନା ମାଧ୍ୟମରେ ଥିବା ସର୍ତ୍ତ ପୂରଣ କରିଛନ୍ତି। ଏଥିପାଇଁ ଜଣେ ଭାରତୀୟ ଅଧିକାରୀ ନେଭେମ୍ବର ମାସରେ ଋଷର ଶିପୟାର୍ଡରେ ବୁଡ଼ାଜାହାଜର ପ୍ରଡକ୍ସନ ଫେସିଲିଟି ପ୍ରୋଗ୍ରେସର ସମୀକ୍ଷା କରିବାକୁ ଯାଇଥିଲେ ବୋଲି ସୂଚନା ମିଳିଛି।

ୟୁକ୍ରେନ ଉପରେ ରୁଷର ଆକ୍ରମଣ ପରେ ପୁଟିନ ପ୍ରଥମ ଥର ପାଇଁ ଭାରତ ଆସୁଛନ୍ତି। ଗୁରୁବାରେ ସଂନ୍ଧ୍ୟାରେ ସେ ନୂଆଦିଲ୍ଲୀରେ ଓହ୍ଲାଇବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ତାଙ୍କର ଦ୍ୱିପାକ୍ଷିକ ଆଲୋଚନା ହେବ। ପ୍ରତିରକ୍ଷା ଏବଂ ଶକ୍ତି ସହଯୋଗ ବିସ୍ତାର ଉପରେ ଗୁରୁତ୍ୱାରୋପ କରିବେ ଦୁଇ ଦେଶ।

ତେବେ ବଡ଼ କଥା ହେଲା ଭାରତ ଋଷ ଠାରୁ ଯେଉଁ ପରମାଣୁ ଶକ୍ତିସମ୍ପନ୍ନ ଆକ୍ରମଣାତ୍ମକ ବୁଡ଼ାଜାହାଜ ଭଡ଼ାରେ ଆଣିବା ତାକୁ କେବଳ ୧୦ ବର୍ଷ ପାଇଁ ବ୍ୟବହାର କରାଯିବ। ଏହାକୁ କୌଣସି ଯୁଦ୍ଧରେ ବ୍ୟବହାର କରାଯାଇପାରିବ ନାହିଁ। କେବଳ ପ୍ରଶିକ୍ଷଣ ପାଇଁ ଏହାକୁ ନୌସେନାରେ ସାମିଲ୍ କରାଯିବ ବୋଲି ବ୍ୟକ୍ତି ଜଣଙ୍କ ସୂଚନା ଦେଇଛନ୍ତି। ଭାରତ ନିଜସ୍ୱ ପରମାଣୁ ଶକ୍ତି ସମ୍ପନ୍ନ ବୁଡ଼ାଜାହାଜ ନିର୍ମାଣ କରୁଥିବା ସମୟରେ ନାବିକମାନଙ୍କୁ ତାଲିମ ଦେବା ଏବଂ ପରମାଣୁ-ନୌକା ପରିଚାଳନା ବିଶେଷଜ୍ଞତାକୁ ସୁଦୃଢ଼ କରିବା ପାଇଁ ଏପରି କରାଯିବ।

ପରମାଣୁ ଶକ୍ତି ସମ୍ପନ୍ନ ବୁଡ଼ାଜାହାଜଗୁଡ଼ିକୁ ଡିଜେଲ-ଇଲେକ୍ଟ୍ରିକ୍ ଜାହାଜ ତୁଳନାରେ ବହୁତ ଉନ୍ନତ ବୋଲି ବିବେଚନା କରାଯାଏ। କାରଣ ଏଗୁଡ଼ିକ ଅଧିକ ସମୟ ବୁଡ଼ି ରହିପାରିବ। ବେଶି ଶବ୍ଦ ନ କରି ନୀରବରେ ଚାଲିପାରିବ। ସାଧାରଣତଃ ଆକାରରେ ବଡ଼ ହୋଇଥିଲେ ବି ଏହାକୁ ସହଜରେ ଚିହ୍ନଟ କରିବା କଷ୍ଟକର। ବିଶେଷକରି ଭାରତ ଏବଂ ପ୍ରଶାନ୍ତ ମହାସାଗରର ବିସ୍ତୃତ ଜଳ ରାଶିରେ ଏହି ବୁଡ଼ା ଜାହାଜକୁ ଚିହ୍ନଟ କରିବା କଷ୍ଟର ହୋଇପାରେ।ଦୁଇ ଦେଶ ମଧ୍ୟରେ ହୋଇଥିବା ଏହି ଚୁକ୍ତିନାମାରେ ରକ୍ଷଣାବେକ୍ଷଣ ଏବଂ ଲଜିଷ୍ଟିକ୍ ସହାୟତା ମଧ୍ୟ ସାମିଲ।

ରିପୋର୍ଟରେ କୁହାଯାଇଛି ଯେ ଭାରତ ପୂର୍ବରୁ ଏକ ବୁଡ଼ା ଜାହାଜକୁ ୧୦ ବର୍ଷ ପାଇଁ ଲିଜରେ ନେଇଥିଲା। ୨୦୨୧ କଣ୍ଟା ପୂରିବା ପରେ ଭାରତ ଏହାକୁ ଫେରାଇ ଦେଇଥିଲା। ୨୦୨୧ ମସିହାରେ ହିଁ ଏହି ଜାହାଜକୁ ସେବାନିବୃତ୍ତି କରାଯାଇଥିଲା।

ଭାରତ ବର୍ତ୍ତମାନ ୧୭ଟି ଡିଜେଲ-ଇଲେକ୍ଟ୍ରିକ୍ ବୁଡ଼ାଜାହାଜ ପରିଚାଳନା କରୁଛି। ପରମାଣୁ ଶକ୍ତିସମ୍ପନ୍ନ ବୁଡ଼ାଜାହାଜର ନିର୍ମାଣ ଜାରି ରହିଛି। ଏହି ସବ୍ମରିନକୁ ଭାରତ ପୂରା ସ୍ୱଦେଶୀ ଜ୍ଞାନକୌଶଳରେ ସ୍ୱଦେଶୀ ଡିଜାଇନ ସହ ନିର୍ମାଣ କରୁଛି।