ରାମାୟଣ ଷ୍ଟେଜ୍‌ରେ ଅଶ୍ଳୀଳତା ପ୍ରଦର୍ଶନ ମାମଲା : ୧୦ରୁ ଅଧିକ କଳାକାର ଓ କମିଟି ସଦସ୍ୟ ଥାନାରେ ହାଜର

ବ୍ରହ୍ମପୁର ୨୦।୧୧: ରାମାୟଣ ଷ୍ଟେଜ୍ରେ ଅଶ୍ଳୀଳତା ପ୍ରଦର୍ଶନ ମାମଲାରେ ଥାନାରେ ହାଜରେ ହେଲେ ୧୦ରୁ ଅଧିକ କଳାକାର ଓ କମିଟି ସଦସ୍ୟ । କାର୍ତ୍ତିକ ପୂର୍ଣ୍ଣିମା ଯାତ୍ରା ଉପଲକ୍ଷେ ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ୍ ଦିଗପହଣ୍ଡି ଥାନା ମୌଳାଭଞ୍ଜା ଗାଁରେ ପ୍ରତିଯୋଗିତାମୂଳକ ଭାବେ ଦୁଇଟି ନାଟ୍ୟ ଅନୁଷ୍ଠାନ ପକ୍ଷରୁ ପୌରାଣିକ ରାମାୟଣ ପ୍ରଦର୍ଶନ କରାଯାଇଥିଲା ।

ଏହି ନାଟକରେ ଅଶ୍ଳୀଳତା ପ୍ରଦର୍ଶନ ହେବା ଘଟଣା ଥାନାରେ ପହଞ୍ଚିବା ପରେ ପୋଲିସ ଘଟଣାର ତଦନ୍ତ ଜାରି ରଖିଛି । ଜୁରା ଗାଁର ରାମାୟଣ ନାଟକ ଅନୁଷ୍ଠାନର ୪ କଳାକାରଙ୍କ ସମେତ ମୌଳାଭଞ୍ଜା ଯାତ୍ରା କମିଟିର ୬ରୁ ଅଧିକ ସଦସ୍ୟଙ୍କୁ ପୋଲିସ ଥାନାକୁ ଡ଼ାକି ପଚରାଉଚରା କରିଥିଲା ।

ମଞ୍ଚସ୍ଥ ହୋଇଥିବା ନାଟକରେ ରାବଣ ଭୂମିକାରେ ଅଭିନୟ କରିଥିବା କଳାକାର ଜଣଙ୍କ ଆଧ୍ୟାତ୍ମିକ ଓ ପୌରାଣିକ କଥାବସ୍ତୁ ରାମାୟଣ ଭଳି ପବିତ୍ର ଗ୍ରନ୍ଥକୁ ଅପମାନିତ କରି ବେଦମତି ଓ ସୀତା ହରଣ ଦୃଶ୍ୟରେ ଅତ୍ୟନ୍ତ ଅଶ୍ଳୀଳ ଅଙ୍ଗଭଙ୍ଗୀ ପ୍ରଦର୍ଶନ କରିଥିବା ନେଇ ଥାନାରେ ଅଭିଯୋଗ ହୋଇଥିଲା । ଖଲ୍ଲିକୋଟ ଗାଁ ରାମାୟଣ ନାଟକ ଅନୁଷ୍ଠାନର କୌଣସି କଳାକାର ଥାନାରେ ପହଞ୍ଚି ନଥିବା ଜଣାପଡ଼ିଛି ।