ଡାଏବେଟିସ୍-ହୃଦରୋଗ ଥିଲେ ମିଳିବନି ଆମେରିକା ଭିସା : ଟ୍ରମ୍ପ୍ ସରକାର ଦେଲେ ନିର୍ଦ୍ଦେଶ

ଓ୍ୱାସିଂଟନ୍, ୦୮|୧୧  :   ଶରୀରରେ କିଛି ରୋଗ ଥିଲେ ଆମେରିକା ଦେବନି ଭିସା । ଡାଏବେଟିସ, ହୃଦରୋଗ ଭଳି ରୋଗୀଙ୍କୁ ଏବେ ୟୁଏସ ଭିସା ଏବଂ ଗ୍ରୀନକାର୍ଡ ସହଜରେ ମିଳିବ ନାହିଁ । କିଛି ଏମିତି ନିର୍ଦ୍ଦେଶନାମା ଜାରି କରିଛି ଟ୍ରମ୍ପ୍ ପ୍ରଶାସନ । ଯାହାକୁ ନେଇ ଜୋରଦାର ବିରୋଧ ଆରମ୍ଭ ହୋଇଯାଇଛି ।

ଟ୍ରମ୍ପ୍ ସରକାରଙ୍କ ଏକ ନିର୍ଦ୍ଦେଶନାମାରେ କୁହାଯାଇଛି ଯେ, ଅନେକ ବ୍ୟକ୍ତି ଅଛନ୍ତି ଯେଉଁମାନଙ୍କ ଚିକିତ୍ସା ପାଇଁ ଅଧିକ ଅର୍ଥ ଖର୍ଚ୍ଚ ହେଉଛି । ସେମାନଙ୍କୁ ଭିସା ପ୍ରଦାନ କରାଯିବ ନାହିଁ । ସେମାନଙ୍କୁ ଅଧିକ ଚିକିତ୍ସା ଦରକାର । ଏପରି ଏକ ଲମ୍ବା ତାଲିକା ୟୁଏସ ଷ୍ଟେଟ୍ ଡିପାର୍ଟମେଣ୍ଟ ଭିସା ଅଧିକାରୀଙ୍କୁ ପ୍ରଦାନ କରିଛି । ଯେଉଁଥିରେ ଦୃଦରୋଗ, ନ୍ୟୁରୋଲୋଜି, କର୍କଟ, ଡାଏବେଟିସ୍ ଓ ମାନସିକ ରୋଗ ଆଦି ସାମିଲ ଅଛି ।

ଏପରି ଉଚ୍ଚ ରକ୍ତଚାପ, ଆସ୍ଥମା କିମ୍ବା ମେଦ ବହୁଳତାର ଶିକାର କିଛି ବ୍ୟକ୍ତିଙ୍କୁ ମଧ୍ୟ ଭିସା ପ୍ରଦାନ ନ କରିବାକୁ ଅଧିକାରୀଙ୍କୁ କୁହାଯାଇଛି । କିନ୍ତୁ ଏସବୁ ରୋଗ କ୍ଷେତ୍ରରେ ଅଧିକାରୀ ଗମ୍ଭୀରତାକୁ ନେଇ ଭିସା ପ୍ରଦାନ କରିବେ । ଭିସା ପାଇଁ ଆବେଦନ କରୁଥିବା ବ୍ୟକ୍ତି ସ୍ବାସ୍ଥ୍ୟ ସମ୍ଭନ୍ଧରେ ସମସ୍ତ ତଥ୍ୟ ପ୍ରଦାନ କରିବେ । ଏସବୁ ରୋଗରେ ଆକ୍ରାନ୍ତ ବ୍ୟକ୍ତି ଆଗାମୀ ଦିନରେ ଆମେରିକା ଉପରେ ଆର୍ଥିକ ବୋଝ ହୋଇପାରନ୍ତି ବୋଲି କୁହାଯାଇଛି ।

ତେବେ ନୂଆ ନିୟମ ପର୍ଯ୍ୟଟକ କିମ୍ବା ଛାତ୍ରଙ୍କ ପାଇଁ ଲାଗୁ ହେବ ନା ନାହିଁ ତାହା ଆଗରୁ ସ୍ପଷ୍ଟ ହୋଇନଥିଲା । କିନ୍ତୁ ନିର୍ଦ୍ଦେଶନାମା ଅନୁସାରେ ବି୧,ବି୨, ଏଫ୧ ସହ ସମସ୍ତ ଭିସା ଉପରେ ଏହା ଲାଗୁ ହେବ ବୋଲି କୁହାଯାଇଛି । ଏପରିକି ଆମେରିକା ବୁଲିବା ପାଇଁ ପାଖରେ ପର୍ଯ୍ୟାପ୍ତ ଟଙ୍କା ଥିବା ଦରକାର ବୋଲି ଆମେରିକୀୟ ଅଧିକାରୀ କହିଛନ୍ତି । ଯାହା ଫଳରେ କିଛି ଅସୁବିଧା ହେଲେ ୟୁଏସ ସରକାର କିମ୍ବା ଦେଶର ଅର୍ଥନୀତି ଉପରେ ସେମାନେ ବୋଝ ହେବେ ନାହିଁ ।

କିଛି ଅଧିକାରୀଙ୍କ କହିବା କଥା ହେଲା, ଆମେରିକୀୟ ଦୁତାବାସରେ ପର୍ଯ୍ୟପ୍ତ ସ୍ବାସ୍ଥ୍ୟ ଅଧିକାରୀ ନାହାଁନ୍ତି । ତେଣୁ ସମସ୍ତ ଆବେଦନକାରୀଙ୍କ ସ୍ବାସ୍ଥ୍ୟ ଯାଂଚ୍ ସହଜ ନୁହେଁ । ଆବେଦନକାରୀ ଭିସାରେ ନିଜ ରୋଗ ବାବଦରେ କେବେହେଲେ ଦର୍ଶାଇବେ ନାହିଁ । ଏହି ନିୟମ ଅନେକ ମାତ୍ରାରେ ଆମେରିକାକୁ ଅନ୍ୟ ଦେଶରୁ ପଳାଇ ଆସୁଥିବା ବିସ୍ଥାପିତଙ୍କ ସଂଖ୍ୟା କମାଇବ ବୋଲି କୁହାଯାଉଛି ।