ପାନ ମସଲା ବିଜ୍ଞାପନରେ ଅଭିନୟ ସଲମାନ ଖାନଙ୍କୁ ପଡିଲା ମହଙ୍ଗା, ହାଜର ହେବାକୁ କୋର୍ଟଙ୍କ ନିର୍ଦ୍ଦେଶ

କୋଟା ୨୭।୧୨: ବଲିଉଡ ସେଲିବ୍ରିଟିଙ୍କୁ ଜନତା ଆଖିମୁଦି ବିଶ୍ୱାସ କରନ୍ତି। ଏଥିରେ ସଲମାନ ଖାନଙ୍କ ଭଳି ଅଭିନେତା ଯେତେବେଳେ ପରଦା ଉପରକୁ ଆସି କୌଣସି ଉତ୍ପାଦକୁ ପ୍ରଶଂସା କରନ୍ତି ସାଧାରଣ ଲୋକେ ଏହାକୁ ନା କେବଳ କିଣନ୍ତି ଏହାକୁ ସୁରକ୍ଷିତ ମଧ୍ୟ ମାନନ୍ତି। ତେବେ ଲୋକଙ୍କ ଭରସା କଣ ବାସ୍ତବରେ ସତ? ରାଜସ୍ଥାନ କୋଟାର ଏକ କଞ୍ଜ୍ୟୁମର କୋର୍ଟ ଲୋକଙ୍କ ଏହି ଭରସା ଉପରେ ଗୁରୁତର ପ୍ରଶ୍ନ ଉଠାଇଛନ୍ତି।

ମାମଲା ପାନ ମସଲା ବିଜ୍ଞାପନ ସମ୍ପର୍କିତ, ହେଲେ ଏହା ଏବେ କେବଳ ବିଜ୍ଞାପନ ମଧ୍ୟରେ ସୀମିତ ନାହିଁ। ମାମଲାରେ କୋର୍ଟ କଡ଼ା ଆଭିମୁଖ୍ୟ ଗ୍ରହଣ କରି ସଲମାନଙ୍କୁ ବ୍ୟକ୍ତିଗତ ଭାବେ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦେଇଛନ୍ତି। ଏହି ପୁରା ବିବାଦ ଏକ ମୌଳିକ ପ୍ରଶ୍ନରୁ ସୃଷ୍ଟି ହୋଇଛି, ଯାହା ସବୁ ଉପଭୋକ୍ତା ଭାବି ଦେଖିବା ଜରୁରି। କୋଟାର ଓକିଲ ଇନ୍ଦ୍ରମୋହନ ସିଂହ ହନି କଞ୍ଜ୍ୟୁମର କମିଶନରେ ଅଭିଯୋଗ କରିଛନ୍ତି ଯେ ‘ରାଜଶ୍ରୀ ପାନ ମସଲା ଓ ସଲମାନ ଖାନ ଜନତାଙ୍କୁ ଭ୍ରମିତ କରୁଛନ୍ତି। ବିଜ୍ଞପାନରେ ଦାବି କରୁଛନ୍ତି ଏହି ପାନମସଲା ‘କେଶର’ ଯୁକ୍ତ’।

ଏଥିରେ ଅଭିଯୋଗକାରୀ ତର୍କ ଦେଇଛନ୍ତି ଯେ ବଜାରରେ ଅସଲି କେସର ପ୍ରତି କେଜି ଦର ୪ଲକ୍ଷ ଟଙ୍କା। ଏଥିରେ କମ୍ପାନୀ ୫ ଟଙ୍କାର ଏକ ପାଉଚରେ ଲୋକଙ୍କୁ କିପରି ଅସଲି କେଶର ଦେଉଥିବାର ଦାବି କରୁଛି? ସେ ଅଭିଯୋଗରେ କହିଛନ୍ତି ଏହା କେବଳ ‘ଶବ୍ଦର ଖେଳ’, ଯାହା ମାଧ୍ୟମରେ ଯୁବ ବର୍ଗଙ୍କୁ ଭ୍ରମିତ କରାଯାଉଛି ଓ ସେମାନଙ୍କୁ ପାନ ମସଲା ଭଳି ହାନୀକାରକ ଉତ୍ପାଦ ଆଡକୁ ଧକ୍କା ଦିଆଯାଉଛି। ଯାହା ଅନ୍ତତଃ କ୍ୟାନସର ଭଳି ରୋଗର କାରଣ ହେଉଛି। ତେବେ ମାମଲା ସେତେବେଳେ ଅଧି୍କ ଜଟିଳ ହୋଇ ପଡିଲା ଯେତେବେଳେ କୋର୍ଟ କାର୍ଯ୍ୟାନୁଷ୍ଠାନରେ ଉପସ୍ଥାପିତ ଡକ୍ୟୁମେଣ୍ଟ ଉପରେ ପ୍ରଶ୍ନ ଉଠିଲା।

ଡିସେମ୍ବର ୯ରେ ହୋଇଥିବା ଶୁଣାଣି କାଳରେ ଅଭିଯୋଗକାରୀ ଏକ ଜଟିଳ ପ୍ରସଙ୍ଗ ଉପରେ କୋର୍ଟଙ୍କ ଧ୍ୟାନ ଆକର୍ଷଣ କରିଥିଲେ। ମାମଲାରେ ସଲମାନ ଖାନଙ୍କ ପକ୍ଷରୁ କୋର୍ଟରେ ଜବାବ ଓ ପାୱାର ଅଫ ଆଟର୍ଣ୍ଣି ଜମା କରାଯାଇଥିଲା। ଅଭିଯୋଗକାରୀ ଏହି କାଗଜପତ୍ରରେ ଯେଉଁ ସ୍ୱାକ୍ଷର ରହିଛି ତାହା ସଲମାନ ଖାନଙ୍କ ଅସଲି ହସ୍ତାକ୍ଷର ସହ ମେଳ ଖାଉ ନଥିବା ଅଭିଯୋଗ କରିଥିଲେ। ଅଭିଯୋଗକାରୀ ତର୍କ ରଖିଥିଲେ ଯେ ସଲମାନ ଖାନ ଯୋଦ୍ଧପୁର ଜେଲ ଓ ସେଠାକାର କୋର୍ଟରେ ଯେଉଁ ସ୍ୱାକ୍ଷର କରିଥିଲେ ତାହା ଏହି ପାୱାର ଅଫ ଆଟର୍ଣ୍ଣିରେ ମହଜୁଦ ଦସ୍ତଖତଠାରୁ ସମ୍ପୂର୍ଣ୍ଣ ଭିନ୍ନ।

ଏହାର ସିଧା ଅର୍ଥ ହେଉଛି ସମ୍ଭବତଃ କୋର୍ଟରେ ନକଲୀ କାଗଜପତ୍ର ଦାଖଲ କରାଯାଇଛି, ଯାହା ଏକ ଗୁରୁତର ଅପରାଧ ଶ୍ରେଣୀରେ ଆସୁଛି। କୋଟା କଞ୍ଜ୍ୟୁମର କୋର୍ଟ ଏହି ତର୍କକୁ ଗୁରୁତର ସହ ଗ୍ରହଣ କରିଛନ୍ତି ଓ ସଲମାନ ଖାନଙ୍କ ସ୍ୱାକ୍ଷରିତ କାଗଜପତ୍ରର ଫରେନସିକ୍ ଯାଞ୍ଚ ଆଦେଶ ଦେଇଛନ୍ତି। କେବଳ ଏତିକି ନୁହେଁ କୋର୍ଟ ଜାନୁୟାରୀ ୨୦ରେ ସଲମାନ ଖାନଙ୍କୁ କୋର୍ଟରେ ବ୍ୟକ୍ତିଗତ ହାଜର ହେବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ସେହିପରି ମାମଲାର ଗୁରୁତ୍ୱ ଦୃଷ୍ଟିରୁ ଯେଉଁ ଓକିଲ କାଗଜପତ୍ରକୁ ନୋଟରାଇଜ କରିଥିଲେ ତାଙ୍କୁ ମଧ୍ୟ ତଲବ କରାଯାଇଛି।