ଆମେରିକାର କଟକଣାକୁ ଭାରତର ଫୁ’, ନଭେମ୍ୱରରେ ୫ ମାସର ସର୍ବୋଚ୍ଚ ସ୍ତରରେ ରୁଷ ତେଲ ଆମଦାନୀ

ନୂଆଦିଲ୍ଲୀ: ନଭେମ୍ବରରେ ଭାରତର ରୁଷ ତୈଳ ଆମଦାନୀ ୪ ପ୍ରତିଶତ ବୃଦ୍ଧି ପାଇ ପାଞ୍ଚ ମାସର ସର୍ବୋଚ୍ଚ ସ୍ତରରେ ୨.୬ ବିଲିୟନ ୟୁରୋରେ ପହଞ୍ଚିଛି । ଏହି ରୁଷୀୟ ଅଶୋଧିତ ତୈଳର ଏକ ବଡ଼ ଅଂଶ ଭାରତୀୟ ରିଫାଇନାରୀଗୁଡ଼ିକରେ ପ୍ରକ୍ରିୟାକରଣ କରାଯାଉଛି ଏବଂ ତା’ପରେ ଅଷ୍ଟ୍ରେଲିଆ ସମେତ ଅନେକ ଦେଶକୁ ରପ୍ତାନି କରାଯାଉଛି । ୟୁରୋପୀୟ ଥିଙ୍କ-ଟ୍ୟାଙ୍କ ସେଣ୍ଟର ଫର୍ ରିସର୍ଚ୍ଚ ଅନ୍ ଏନର୍ଜି ଆଣ୍ଡ୍ କ୍ଲିନ୍ ଏୟାର (CREA) ଏହା କହିଛି ।

ସିଆରଇଏ କହିଛି ଯେ ଭାରତ ନଭେମ୍ବରରେ ଚୀନ୍ ପରେ ରୁଷ ଇନ୍ଧନର ଦ୍ୱିତୀୟ ସର୍ବବୃହତ କ୍ରେତା । ଅକ୍ଟୋବରରେ ରୁଷ ତୈଳ କିଣିବା ପାଇଁ ୨.୫ ବିଲିୟନ ୟୁରୋ ଖର୍ଚ୍ଚ କରିଛି । ନଭେମ୍ବରରେ ଚୀନ୍ ରୁଷର ଅଶୋଧିତ ତୈଳ ରପ୍ତାନିର ୪୭ ପ୍ରତିଶତ କିଣିଛି, ତା’ପରେ ଭାରତ (୩୮ ପ୍ରତିଶତ), ତୁର୍କୀ (୬ ପ୍ରତିଶତ) ଏବଂ ୟୁରୋପୀୟ ସଂଘ (୬ ପ୍ରତିଶତ) ରହିଛି ।

ଏଥିରେ ଦାବି କରାଯାଇଛି ଯେ ଡିସେମ୍ବରରେ ଭାରତର କ୍ରୟ ଆହୁରି ବୃଦ୍ଧି ପାଇପାରେ । ଆମେରିକାର ବୈଦେଶିକ ସମ୍ପତ୍ତି ନିୟନ୍ତ୍ରଣ କାର୍ଯ୍ୟାଳୟ ପ୍ରତିବନ୍ଧକ ଲାଗୁ ହେବା ପୂର୍ବରୁ ଲୋଡ୍ ହୋଇଥିବା କାର୍ଗୋଗୁଡ଼ିକ ମାସ ସାରା ଯାତ୍ରା କରିବେ । ଅକ୍ଟୋବର ୨ରେ, ଆମେରିକା ରୁଷର ଦୁଇ ବୃହତ୍ ତୈଳ ଉତ୍ପାଦକ, ରୋସନେଫ୍ଟ ଏବଂ ଲୁକୋଏଲ ଉପରେ ପ୍ରତିବନ୍ଧକ ଲଗାଇଥିଲା ।

ପ୍ରତିବନ୍ଧକ ଯୋଗୁ ରିଲାଏନ୍ସ ଇଣ୍ଡଷ୍ଟ୍ରିଜ୍, ହିନ୍ଦୁସ୍ତାନ ପେଟ୍ରୋଲିୟମ୍ କର୍ପୋରେସନ୍ ଲିମିଟେଡ୍ (HPCL), HPCL-ମିତ୍ତଲ ଏନର୍ଜି ଲିମିଟେଡ୍ ଏବଂ ମାଙ୍ଗାଲୋର ରିଫାଇନାରୀ ଏବଂ ପେଟ୍ରୋକେମିକାଲ୍ସ ଲିମିଟେଡ୍ ପରି କମ୍ପାନିଗୁଡ଼ିକ ଆମଦାନୀ ବନ୍ଦ କରିଦେଇଛନ୍ତି । ତଥାପି, ଇଣ୍ଡିଆନ୍ ଅଏଲ୍ କର୍ପୋରେସନ୍ ପରି ଅନ୍ୟ ରିଫାଇନାରୀଗୁଡ଼ିକ ପ୍ରତିବନ୍ଧିତ ରୁଷ କମ୍ପାନିଗୁଡ଼ିକଠାରୁ ତେଲ କିଣିବା ଜାରି ରଖିଛନ୍ତି । ଘରୋଇ ରିଫାଇନାରୀଗୁଡ଼ିକ ଦ୍ୱାରା ଆମଦାନୀ ସାମାନ୍ୟ ହ୍ରାସ ପାଇଥିଲେ ମଧ୍ୟ, ସରକାରୀ ମାଲିକାନାର ରିଫାଇନାରୀଗୁଡ଼ିକ ନଭେମ୍ବର ମାସରେ ମାସିକ ୨୨ ପ୍ରତିଶତ ରୁଷୀୟ ଅଶୋଧିତ ତୈଳର ପରିମାଣ ବୃଦ୍ଧି କରିଥିବା ସିଆରଇଏ କହିଛି ।