ବାଂଲାଦେଶ ନିର୍ବାଚନରେ ବ୍ୟାପକ ହିଂସା : ବୁଥରେ ବୋମାମାଡ, ଜମାତ-ବିଏନପି କର୍ମୀ ମୁହାଁମୁହିଁ

ଢାକା, ୧୨|୦୨: ବାଂଲାଦେଶରେ ଚାଲିଛି ଭୋଟ୍ । ଦେଶରେ ସାଧାରଣ ନିର୍ବାଚନ ପାଇଁ ସକାଳ ସାଢେ ୭ଟାରୁ ମତାଧିକାର ସାବ୍ୟସ୍ତ କରୁଛନ୍ତି ଦେଶବାସୀ । ତେବେ ନିର୍ବାଚନ ସମୟରେ ଅନେକ ସ୍ଥାନରେ ହିଂସା ଦେଖିବାକୁ ମିଳିଛି । ପ୍ରମୁଖ ରାଜନୈତିକ ଦଳର କର୍ମୀ ମୁହାଁମୁହିଁ ହେବା ସହ କିଛି ଜାଗାରେ ବୋମାମାଡର ଖବର ମଧ୍ୟ ଆସୁଛି ।

ରିପୋର୍ଟ ଅନୁସାରେ, ଢାକାର ମୀରପୁର ନିର୍ବାଚନମଣ୍ଡଳୀରେ ଜମାତ-ଏ-ଇସଲାମି ଏବଂ ବାଂଲାଦେଶ ନ୍ୟାସନାଲିଷ୍ଟ ପାର୍ଟିର କର୍ମୀ ମୁହାଁମୁହିଁ ହୋଇଛନ୍ତି । ଏଠାରେ ଜମାତ-ଏ-ଇସଲାମିର ମୁଖ୍ୟ ସାଫିକର ରେହମାନ ନିର୍ବାଚନ ଲଢୁଛନ୍ତି । ତେଣୁ ପରିସ୍ଥିତି ଅଧିକ ଉତ୍ତେଜନାପୁର୍ଣ୍ଣ ରହିଛି । ଏହାକୁ ରୋକିବାକୁ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । ଯାହାର ଅନେକ ଫଟୋ ସାମ୍ନାକୁ ଆସୁଛି ।

ସେହିପରି ଗୋଫାଲଗଞ୍ଜର ଏକ ବୁଥରେ ବୋମାମାଡ ହୋଇଛି । ଏଥିରେ ତିନି ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରେ ଜଣେ ନାବାଳିକା ମଧ୍ୟ ରହିଛନ୍ତି । ଏହା ହେଉଛି ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ସେଖ ହସିନାଙ୍କ ନିର୍ବାଚନମଣ୍ଡଳୀ । ଏଠାରେ ଆଓ୍ୱାମୀ ଲିଗର ଭଲ ଦବଦବା ରହିଛି ।

ଅନ୍ୟ ଦିଗରେ ବାଂଲାଦେଶର ନିର୍ବାଚନ ପାଇଁ ଆଲର୍ଟ ରହିଛି ବିଏସଏଫ । ଭାରତୀୟ ସୀମା ସୁରକ୍ଷା ବଳ ସୀମାରେ କଡା ନଜର ରଖିଛି । ଫୁଲବାରୀ ଚେକ୍ ପୋଷ୍ଟରେ ଅଧିକ ସୁରକ୍ଷାକର୍ମୀ ନିୟୋଜିତ ହୋଇଛନ୍ତି । ଜଲପାଇଗୁଡିରେ ମଧ୍ୟ ସୀମାକୁ ସିଲ୍ କରାଯାଇଥିବା ସୂଚନା ମିଳିଛି ।

ସୂଚନାଯୋଗ୍ୟ, ଦେଶର ୨୯୯ ସଂସଦୀୟ ନିର୍ବାଚନମଣ୍ଡଳୀରେ ସକାଳ ୭ଟା ୩୦ରୁ ଅପରାହ୍ନ ୪ଟା ୩୦ ପର୍ଯ୍ୟନ୍ତ ମତଦାନ ଅନୁଷ୍ଠିତ ହେବ । ଜଣେ ପ୍ରାର୍ଥୀଙ୍କ ମୃତ୍ୟୁ ପରେ ଗୋଟିଏ ନିର୍ବାଚନ ମଣ୍ଡଳୀରେ ଭୋଟିଂ ବାତିଲ ହୋଇଛି । ମୋଟ ୫୦ ରାଜନୈତିକ ଦଳ ଏହି ନିର୍ବାଚନ ଲଢ଼ୁଛନ୍ତି । ଏହା ବାଦ୍ ୨୭୩ ସ୍ୱାଧୀନ ପ୍ରାର୍ଥୀ ବି ଅଛନ୍ତି । ବିଏନପି ସର୍ବାଧିକ ୨୯୧ ଜଣ ପ୍ରାର୍ଥୀ ଦେଇଛି । ନିର୍ବାଚନକୁ ଦୃଷ୍ଟିରେ ରଖି ଦେଶବ୍ୟାପୀ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ନିର୍ବାଚନ କମିଶନଙ୍କ ତରଫରୁ ପାଖାପାଖି ୧୦ ଲକ୍ଷ ସୁରକ୍ଷା କର୍ମୀ ମୁତୟନ ହୋଇଛନ୍ତି । ବାଂଲାଦେଶ ନିର୍ବାଚନ ଇତିହାସରେ ଏତେ ସଂଖ୍ୟକ ସୁରକ୍ଷା କର୍ମୀ ପୂର୍ବରୁ କେବେ ମୁତୟନ ହୋଇ ନ ଥିଲେ । ପଡ଼ୋଶୀ ଦୃଷ୍ଟିରୁ ଭାରତ ପାଇଁ ଏହି ନିର୍ବାଚନ ବେଶ୍ ଗୁରୁତ୍ୱ ରଖୁଛି ।