ରାହୁଲ ଗାନ୍ଧୀଙ୍କ ବୈଠକରେ ସାମିଲ ହେଲେନି ଶଶି ଥରୁର, ଲଗାତାର କଂଗ୍ରେସର ୩ଟି ମିଟିଂରୁ ଗାଏବ

ନୂଆଦିଲ୍ଲୀ: କଂଗ୍ରେସର ଲୋକସଭା ସାଂସଦଙ୍କୁ ନେଇ ଶୁକ୍ରବାର ରାହୁଲ ଗାନ୍ଧୀଙ୍କ ଅଧ୍ୟକ୍ଷତାରେ ହୋଇଥିବା ଏକ ବୈଠକରେ ସାମିଲ ହୋଇନାହାନ୍ତି ବରିଷ୍ଠ ନେତା ଶଶି ଥରୁର । ଲଗାତାର କଂଗ୍ରେସର ବୈଠକରୁ ଦୂରେଇ ରହୁଛନ୍ତି ଥରୁର । ଏହାକୁ ନେଇ ଦଳ ଭିତରେ ଏବଂ ବାହାରେ ଚର୍ଚ୍ଚା ଲାଗି ରହିଛି । ଆଜି ବୈଠକରେ ସାମିଲ ହୋଇପାରିବେ ନାହିଁ ବୋଲି ଥରୁର ଦଳୀୟ ନେତୃତ୍ବଙ୍କୁ ଜଣାଇଥିଲେ ବୋଲି କୁହାଯାଉଛି । କିନ୍ତୁ ଦଳର ମୁଖ୍ୟ ସଚେତକ କହିଛନ୍ତି ଯେ, ଥରୁର ବୈଠକରେ ସାମିଲ ହେବେ କି ନାହିଁ ତାଙ୍କୁ କିଛି ସୂଚନା ଦିଆଯାଇ ନାହିଁ ।

ଥିରୁଅନନ୍ତପୁରମର ସାଂସଦ ଶଶି ଥରୁର ପୂର୍ବରୁ ମଧ୍ୟ ଏକାଧିକ ବୈଠକରେ ଯୋଗ ଦେଇନାହାନ୍ତି । ଏହା ସହ ସେ ବିଭିନ୍ନ ସମୟରେ ପ୍ରଧାନମନ୍ତ୍ରୀ ମୋଦୀଙ୍କ ପ୍ରଶଂସା କରି ଦଳ ଭିତରେ ବିବାଦୀୟ ହୋଇପଡ଼ିଛନ୍ତି । ଦଳର ଗୁରୁତ୍ବପୂର୍ଣ୍ଣ ବୈଠକରୁ ଦୂରେଇ ରହୁଥିବା ଶଶି ଥରୁରଙ୍କ ଉପରେ ପ୍ରଶ୍ନ ଉଠିବା ବି ସ୍ବାଭାବିକ । ଲୋକସଭାର ବିରୋଧୀ ଦଳ ନେତା ଏବଂ କଂଗ୍ରେସର ଶୀର୍ଷ ନେତା ରାହୁଲ ଗାନ୍ଧୀଙ୍କ ବୈଠକରେ କେବଳ ଶଶି ଥରୁର ନୁହଁନ୍ତି, ଚଣ୍ଡିଗଡ଼ ସାଂସଦ ମନୀଷ ତିଓ୍ବାରୀ ମଧ୍ୟ ଅନୁପସ୍ଥିତ ଥିଲେ । ଥରୁରଙ୍କ କାର୍ଯ୍ୟକ୍ରମ ସୂଚୀ ଅନୁସାରେ, ସେ ଗୁରୁବାର ରାତିରେ କୋଲକାତାରେ ଆୟୋଜିତ ଏକ କାର୍ଯ୍ୟକ୍ରମରେ ସାମିଲ ହୋଇଥିଲେ । ତେଣୁ ଶୁକ୍ରବାର ଆୟୋଜିତ ବୈଠକରେ ସେ ପହଞ୍ଚି ପାରିନଥିଲେ ବୋଲି କୁହାଯାଉଛି ।

ଏହା ପୂର୍ବରୁ ନଭେମ୍ବର ୩୦ରେ ଦଳର ଏକ ଗୁରୁତ୍ବପୂର୍ଣ୍ଣ ବୈଠକରେ ମଧ୍ୟ ସାମିଲ ହୋଇନଥିଲେ ଶଶି ଥରୁର । ସେ ସେହି ସମୟରେ ବିମାନରେ ଥିଲେ ବୋଲି କହିଥିଲେ । ଦଳୀୟ ବୈଠକରେ ଥରୁର ସାମିଲ ନହେବାକୁ ନେଇ ରାଜନୀତି ଜୋର ଧରିଛି । ବିଭିନ୍ନ ଚର୍ଚ୍ଚା ଆଲୋଚନା ଜାରି ରହିଛି । ସାଂସଦ ଶଶି ଥରୁର ଏସଆଇଆରକୁ ନେଇ ହୋଇଥିବା ଚର୍ଚ୍ଚାରେ ମଧ୍ୟ ସାମିଲ ହୋଇନଥିଲେ । ଏହି ସମୟରେ ନିଜର ସ୍ବାସ୍ଥ୍ୟବସ୍ଥା ଖରାପ ଥିବା କଥା କହି ପ୍ରଶ୍ନକୁ ଏଡ଼ାଇ ଯାଇଥିଲେ ଥରୁର । ଏକାଧିକ ସାଂସଦଙ୍କ ରାହୁଲଙ୍କ ବୈଠକରେ ସାମିଲ ନହେବାକୁ ନେଇ ଦଳରେ ବିଭିନ୍ନ ଚର୍ଚ୍ଚା ସୃଷ୍ଟି କରିଛି ।

ବିଶେଷ କରି ଶଶି ଥରୁରଙ୍କ ଅନୁପସ୍ଥିତି କଂଗ୍ରେସ ପାଇଁ ବେଶୀ ଚିନ୍ତା ବଢ଼ାଇଛି । ନିକଟରେ ରୁଷ ରାଷ୍ଟ୍ରପତି ପୁଟିନଙ୍କ ସମ୍ମାନାର୍ଥେ ଆୟୋଜିତ ରାତ୍ର ଭୋଜନରେ ଏକମାତ୍ର କଂଗ୍ରେସ ନେତା ଭାବରେ ଶଶି ଥରୁରଙ୍କୁ ଆମନ୍ତ୍ରଣ ମିଳିଥିଲା ଏବଂ ସେ ମଧ୍ୟ ଯାଇଥିଲେ । ସେପଟେ ଲୋକସଭାର ବିରୋଧୀ ଦଳ ନେତା ଭାବରେ ରାହୁଲ ଗାନ୍ଧୀଙ୍କୁ ପୁଟିନଙ୍କ ସହ ସକ୍ଷାତ କରିବାକୁ ଅନୁମତି ନମିଳିବାକୁ ନେଇ କଂଗ୍ରେସ ଅସନ୍ତୋଷ ପ୍ରକାଶ କରିଥିଲା ।