ପାକିସ୍ତାନରେ ରାଜନୈତିକ ଅସ୍ଥିରତା : ମୁନୀରଙ୍କ ନିଯୁକ୍ତି ପତ୍ରରେ ଦସ୍ତଖତ କଲେନି ସରିଫ୍

ଲାହୋର,୦୧ /୧୨: ପାକିସ୍ତାନରେ ରାଜନୈତିକ ସଙ୍କଟ । ଦେଶରେ ସୈନ୍ୟ ନେତୃତ୍ୱକୁ ନେଇ ବଡ ସାମ୍ବିଧାନିକ ଏବଂ ପ୍ରଶାସନିକ ସଙ୍କଟ ଘଟିବାକୁ ମିଳିଛି । ଫିଲ୍ଡ ମାର୍ଶାଲ ଅସିମ୍ ମୁନୀର ଦେଶର ପ୍ରଥମ ସିଡିଏଫ ବା ଚିଫ୍ ଅଫ୍ ଡିଫେନ୍ସ ଫୋର୍ସ ହୋଇଥାନ୍ତେ । ଯାହାର ନିର୍ଦ୍ଦେଶ ନଭେମ୍ବର ୨୯ ସୁଦ୍ଧା ଆସିଯାଇଥାନ୍ତା । କିନ୍ତୁ ଶେହବାଜ ସରକାର କୌଣସି ବିଜ୍ଞପ୍ତି ପ୍ରକାଶ କରି ନାହାଁନ୍ତି । ଶେହବାଜ ସରିଫ ଜାଣିଶୁଣି ଏଥିରୁ ନିଜକୁ ଦୂରେଇ ରଖିଥିବା କହିଛନ୍ତି ପୂର୍ବତନ ସୁରକ୍ଷା ପରାମର୍ଶଦାତା ବୋର୍ଡର ସଦସ୍ୟ ତିଲକ ଦେବେଶ୍ୱର ।

ସେ କହିଛନ୍ତି ଯେ, ଶେହବାଜ ସରିପ ଫୂର୍ବରୁ ବହରୀନ ଏବଂ ପରେ ଲଣ୍ଡନ ଗସ୍ତ କରିଥିଲେ । କାରଣ ତାଙ୍କୁ ଅସିମ ମୁନୀରଙ୍କ ସିଡିଏଫ ନିଯୁକ୍ତ ଆଦେଶନାମାରେ ଦସ୍ତଖତ କରିବା ଦରକାର ଥିଲା । କିନ୍ତୁ ସେ ବହୁତ ଭାବିଚିନ୍ତି ବିଦେଶ ଗସ୍ତ କରିଥିଲେ । ଆଦେଶରେ ଦସ୍ତଖତ କଲେ ଦେଶର ରାଜନୈତିକ ଅବସ୍ଥା କଣ ହେବ ତାହା ସେ ଜାଣିପାରିଥିଲେ ।

ଦେଖିବାକୁ ଗଲେ ନଭେମ୍ବର ୨୯ରେ ମୁନୀରଙ୍କ ତିନି ବର୍ଷର କାର୍ଯ୍ୟକାଳ ଶେଷ ହୋଇଛି । ତାଙ୍କ ପୁନଃନିଯୁକ୍ତି ପାଇଁ କୌଣସି ବିଜ୍ଞପ୍ତି ପ୍ରକାଶ ପାଇନାହିଁ । ତେଣୁ ଦେଖିବାକୁ ଗଲେ ଦେଶରେ ଏବେ କୌଣସି ସେନାମୁଖ୍ୟ ନାହାଁନ୍ତି । ସବୁଠାରୁ ବଡ କଥା ହେଉଛି ଯେ ମୁନୀର ସିଡିଏଫ ନିଯୁକ୍ତ ହେଲେ ତାଙ୍କ ହାତକୁ ପରମାଣୁ ଶକ୍ତିର ଚାବି ଚାଲିଯିବ । ଯାହା ପାକିସ୍ତାନ ପାଇଁ ଶୁଭଙ୍କର ହେବ ନାହିଁ ।

କ'ଣ ରହିଛି ଆଇନ ?

କଛି ବିଶେଷଜ୍ଞଙ୍କ କହିବା କଥା ହେଲା, ୨୦୨୪ରେ ପୁରୁଣା ନିୟମକୁ ସଂଶୋଧନ କରାଯାଇଥିଲା । ଯେଉଁଥିରେ ଆର୍ମୀ ମୁଖ୍ୟଙ୍କ କାର୍ଯ୍ୟକାଳ ୫ ବର୍ଷ କରାଯାଇଥିଲା । ଏଥିପାଇଁ ଆଉ ଅନ୍ୟ ନୂଆ ଆଦେଶ ଜାରି କରିବାର ଆବଶ୍ୟକତା ନାହିଁ । କିଛି ବିଶେଷଜ୍ଞଙ୍କ କହିବାନୁସାରେ ସେନାମୁଖ୍ୟରେ ରହିବା ପାଇଁ ସରକାର ବିଜ୍ଞପ୍ତି ଜାରି କରିବା ଦରକାର । ଯାହାକୁ ନେଇ ପାକିସ୍ତାନରେ ଆଗକୁ ଅଚଳାବସ୍ଥା ସୃଷ୍ଟି ହୋଇପାରେ ବୋଲି ଆଶଙ୍କା କରାଯାଉଛି ।