କୋଲ୍ଡ ଡ୍ରିଙ୍କସ ୪୦୦ ଟଙ୍କା, କଫି ୭୦୦ : ସିନେମା ହଲକୁ ସୁପ୍ରିମକୋର୍ଟଙ୍କ କଡା ସମାଲୋଚନା

ନୂଆଦିଲ୍ଲୀ, ୦୫ |୧୧  :  ଫିଲ୍ମ ଦେଖିବାକୁ ଗଲେ ଖାଲି ହୋଇଯିବ ପକେଟ୍ । କଫି ଓ ପପକର୍ଣ୍ଣର ଦାମ୍ ସିନେମାର ଟିକେଟଠୁ ବି ଆପଣଙ୍କୁ ଭାରି ଲାଗିବ । ଖାଲି ଏତିକି ନୁହେଁ ୧୦ ଟଙ୍କାର ପାଣି ବୋତଲ ସିନେମା ହଲରେ ହୋଇଯିବ ୧୦୦ ଟଙ୍କା । ଏସବୁ ପ୍ରସଙ୍ଗକୁ ଗୁରୁତର ସହ ନେଇଛନ୍ତି ସୁପ୍ରିମକୋର୍ଟ । ଦର୍ଶକଙ୍କୁ ଲୁଟୁଥିବା ବିଭିନ୍ନ ହଲ୍ ଏବଂ ମଲ୍ଟିପ୍ଲେକ୍ସକୁ ଏବେ ସୁପ୍ରିମକୋର୍ଟଙ୍କ ଛାଟ  ବାଜିଛି ।

ଅନେକ ସମୟରେ ଆପଣ ସିନେମା ଦେଖିବା ବେଳେ ହଲରେ କିଛି କିଣାକିଣି କରିଥାନ୍ତି । ଯାହାର ମୂଲ୍ୟ ବଜାର ଦରଠୁ ଖୁବ୍ ଅଧିକ ରହିଥାଏ । ଗୋଟିଏ ପ୍ୟାକେଟ୍ ପପକର୍ଣ୍ଣର ଦାମ୍ ହଲ ମଧ୍ୟରେ ୫୦୦ ଟଙ୍କା ଥିବା ବେଲେ ଏଥିରେ ଆଉ କିଛି ମିଶାଇଲେ ତାହା ୭୦୦ ଟଙ୍କା ହୋଇଯାଏ । ସେହିପରି ବାହାରେ ୫୦ ଟଙ୍କାରେ ମିଳୁଥିବା କୋଲ୍ଡ ଡ୍ରିଙ୍କସ ୪୦୦ ଟଙ୍କାରେ ବିକ୍ରି ହୁଏ । ଦୀର୍ଘଦିନ ଧରି ଦର୍ଶକଙ୍କୁ ଏପରି ଭାବେ ଲୁଟି ଆସୁଛନ୍ତି ମଲ୍ଟି ପ୍ଲେକ୍ସ । ଯାହା ଉପରେ ଟିପ୍ପଣୀ ଦେଇଛନ୍ତି ସୁପ୍ରିମକୋର୍ଟ ।

ସୋମବାର କୋର୍ଟ କହିଛନ୍ତି ଯେ, ଏତେ ପରିମାଣରେ ଟ୍ୟାକ୍ସ ଏବଂ ଦାମ୍ ଦର୍ଶକଙ୍କୁ ହଲଠୁ ଦୂରେଇ ରଖିବ । ଆଗକୁ ହଲ୍ ଖାଲି ପଡିପାରେ । କର୍ଣ୍ଣାଟକ ସରକାରଙ୍କ ହଲ୍ ଟିକେଟ ଦାମ ଉପରେ ଏକ ନିଷ୍ପତ୍ତିକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଆବେଦନର ଶୁଣାଣି କରି କୋର୍ଟ ଏହା କହିଛନ୍ତି । ଆହୁରି ମଧ୍ୟ ଜଷ୍ଟିସ ବିକ୍ରମ ନାଥ ଏବଂ ସନ୍ଦିପ ମେହତାଙ୍କ ଖଣ୍ଡପୀଠ ମଲ୍ଟିପ୍ଲେକ୍ସରେ ମିଳୁଥିବା ପାନୀୟ ଏବଂ ଖାଦ୍ୟର ଦାମ୍ ନେଇ ଆଲୋଚନା କରିଛନ୍ତି ।

ନିକଟରେ କର୍ଣ୍ଣାଟକ ସରକାର ସିନେମା ଟିକେଟର ଦାମ୍ ସର୍ବାଧିକ ୨୦୦ ଟଙ୍କା ରଖିବାକୁ ହଲ୍ ଗୁଡିକୁ ନିର୍ଦ୍ଦେଶ ଦେଇଥିଲେ । ଏହା ଦ୍ୱାରା ସିନେମା ଅଧିକରୁ ଅଧିକ ଲୋକପ୍ରିୟ ହୋଇପାରିବ ବୋଲି ସରକାର କହିଥିଲେ ।  ଯାହା ବିରୋଧରେ କର୍ଣ୍ଣାଟକ ଷ୍ଟେଟ୍ ଫିଲ୍ମ ଚାମ୍ବର ପ୍ରଥମେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲା । କୋର୍ଟ ସରକାରଙ୍କ ନିର୍ଦ୍ଦେଶକୁ କାଏମ ରଖିବା ସହ ହଲ ଗୁଡିକୁ କିଛି ସର୍ତ୍ତ ମାନିବାକୁ କହିଥିଲେ । ସମସ୍ତ ବିକ୍ରି ହୋଇଥିବା ଟିକେଟର ଅଡିଟ୍ କରି ଦର୍ଶକଙ୍କ ଅଧିକାରକୁ ଅଧିକ ଧ୍ୟାନ ଦେବା ପାଇଁ କହିଥିଲେ । ସେହିପରି ରିଫଣ୍ଡ କ୍ଷେତ୍ରରେ ସଂସ୍କାର ଆଣିବା ପାଇଁ ପରାମର୍ଶ ଦେଇଥିଲେ କୋର୍ଟ । ପରେ ମାମଲା ସୁପ୍ରିମକୋର୍ଟକୁ ଯାଇଥିଲା ।

ବରିଷ୍ଠ ଅଧିବକ୍ତା ମୁକୁଲ ରୋହତଗୀ କହିଥିଲେ ଯେ, କଫି ପାଇଁ ହଲରେ ୧୦୦୦ ଟଙ୍କା ଗଣିବାକୁ ପଡୁଛି । ଯାହାର ଜବାବରେ କୋର୍ଟ କହିଥିଲେ ଯେ, ଏସବୁ ଦାମ୍ କମିବା ଦରକାର । ସିନେମାର ଚାହିଦା କମୁଥିବାରୁ ଏତେ ଅଧିକ ଦାମ୍ ଦର୍ଶକଙ୍କୁ ହଲଠାରୁ ଦୂରେଇ ରଖିବ । ଅନ୍ୟ ଦିଗରେ ହାଇକୋର୍ଟଙ୍କ କିଛି ସର୍ତ୍ତ ମାନିବା ସମ୍ଭବପର ନୁହେଁ ବୋଲି ଅଧିବକ୍ତା ଦର୍ଶାଇଥିଲେ ।