ଗାଡି ବିକ୍ରି ପରେ ମିଳୁନି ସେବା, ସୋ ରୁମ୍ ସମ୍ମୁଖରେ ଶତାଧିକ ଅଟୋ ଚାଳକ ଧାରଣା

ଭଦ୍ରକ ୧୮।୧୧ : ଅଟୋ ବିକ୍ରି କରୁଛନ୍ତି । ହେଲେ ସର୍ଭିସ ଦେବା ବେଳକୁ ଆଖିବୁଜି ଦେଉଛନ୍ତି ସୋ’ ରୁମ୍ । ଭଦ୍ରକ ଚରମ୍ପାରେ ଥିବା ଏକ ଅଟୋ ସୋ’ ରୁମ୍ରେ ନାଁରେ ଆସିଛି ଏପରି ସାଂଘାତିକ ଅଭିଯୋଗ ।

ଭଦ୍ରକ ଜିଲ୍ଲା ଚରମ୍ପା ସ୍ଥିତ ରେଲଓ୍ୱ ପାସେଞ୍ଜର ଅଟୋ ଷ୍ଟାଣ୍ଡରେ ଲାଗିଥିବା ୩୦୦ରୁ ଅଧିକ ଅଟୋ ଏକ ନିର୍ଦ୍ଧିଷ୍ଟ କମ୍ପାନୀର । ପ୍ରତିବର୍ଷ ୧୦ରୁ ଅଧିକ ନୂଆ ଅଟୋ ମଧ୍ୟ ଗ୍ରାହଣ କରି ଚରମ୍ପା ରେଲଓ୍ୱେ ଷ୍ଟେସନରେ ଲଗାଇ ନିଜର ଜୀବିକା ନିର୍ବାହ କରିଥାନ୍ତି । କିନ୍ତୁ ଦୁର୍ଭାଗ୍ୟର ବିଷୟ ଅଟୋ ମରାମତି ପାଇଁ ସୋ ରୁମ୍କୁ ଗଲେ ନାହିଁ ନଥିବାର ଅସୁବିଧାର ସମ୍ମୁଖୀନ ହୁଅନ୍ତି ଗାଡ଼ି ମାଲିକ । କେବେ ପାର୍ଟସ ନାହିଁ ତ ଆଉ କେବେ ମିସ୍ତ୍ରୀ ନାହାନ୍ତି ବୋଲି କୁହନ୍ତି ସର୍ଭିସ ମ୍ୟାନେଜର । ଏମିତିକି ଏ ବାବଦରେ ଅଟୋ ଷ୍ଟାଣ୍ଡର ମୁଖିଆ ମଧ୍ୟ ସର୍ଭିସ ମ୍ୟାନେଜରକୁ ଭେଟିବା ପରେ କୌଣସି ସୁଫଳ ମିଳିପାରୁନାହିଁ । ମରାମତି ପାଇଁ ଗାଡ଼ି ସୋ ରୁମ୍ରେ ଦୀର୍ଘ ଦିନ ଧରି ପଡ଼ିଲେ ପରିବାର ଚଳାଇବା କଷ୍ଟକର ହେଉଛି । ଶେଷରେ ବାଧ୍ୟ ହୋଇ ୨୦୦ରୁ ଅଧିକ ଅଟୋ ମାଲିକ ନିଜ ଗାଡ଼ି ଧରି ସୋ ରୁମ୍ ଆଗରେ ପଞ୍ଚି ନାରାବାଜି କରିଥିଲେ । ଗାଡ଼ି ବିକିବା ପରେ ସୋ ରୁମ୍ ସହଯୋଗ କରୁନାହିଁ । ତେଣୁ ଆମକୁ ନ୍ୟାୟ ଦରକାର ବୋଲି କହିଛନ୍ତି । ସେପଟେ ସୋ ରୁମ୍ ଜେନେରାଲ ମ୍ୟାନେଜର କହିଛନ୍ତି ଯେ, ଆମେ ସର୍ଭିସ ଦେଉଛି, କିନ୍ତୁ ସମସ୍ତଙ୍କୁ ସଠିକ ସମୟରେ ସର୍ଭିସ ଦେବା ସମ୍ଭବ ନୁହେଁ ।