ଭଜା ବୁଟରେ କ୍ୟାନସର! ଜେପି ନଡ୍ଡାଙ୍କୁ ଚିଠି ଲେଖିଲେ ରାଜ୍ୟସଭା ସାଂସଦ, ସ୍ୱାସ୍ଥ୍ୟ ବିଭାଗରେ ହଇଚଇ

ନୂଆଦିଲ୍ଲୀ, ୨୬/୧୧: ଭାରି ଅଳସୁଆ ଲାଗୁଛି । ମାନ୍ଦା ମାନ୍ଦା ଲାଗୁଛି...କାମ କରିବାକୁ ଇଚ୍ଛା ହଉନି । ବୋର ଲାଗୁଛି ବେ...ଆରେ ଭାଇ ତୋ ପାଖରେ ଭଜା ଚଣା ଅଛି କି । ଦୁଇଟା ଦେଲୁ । ଟିକେ ଚୋବେଇ ଦେଲେ ଚାଙ୍ଗା ଲାଗିବ । ଘରେ ଅଫିସରେ ସବୁଠି ଥାଏ ଏମିତି ମାହୋଲ । କେବଳ ଅଫିସ ନୁହେଁ ରୋଷ୍ଟେଡ୍ ଚଣା ସଭିଁଙ୍କ ପସନ୍ଦ । ବୋରିଂ ଲାଇଫ୍‌କୁ ଚେଞ୍ଜ ହେଉ ବା ଭୋକ ମେଣ୍ଟାଇବା । ପିଲାଠୁ ବୁଢ଼ା ସଭିଁଙ୍କ ଫାଷ୍ଟ ଚଏସ୍ ।

ତେବେ ଏହି ଭଜା ଚଣା ଆମ ଜୀବନ ପ୍ରତି ସାଜିଛି କଣ୍ଟା । ପ୍ରତିଟି ଜୀବନ ବିନାଶର କାରଣ ପାଲଟିଛି ଏହି ଚଣା । କାରଣ ସେହି ଚଣାରେ ଅଛି କ୍ୟାନସର ତତ୍ତ୍ୱ । ଏକଥା ଆମେ କହୁନୁ ବରଂ ସ୍ୱାସ୍ଥ୍ୟ ଚେତାବନୀ ପରେ ବଢିଛି ଚିନ୍ତା । ବ୍ୟାପିବାରେ ଲାଗିଛି ଭୟଙ୍କର ଗବେଷଣା । ଏନେଇ ଜେପି ନଡ୍ଡାଙ୍କୁ ଚିଠି ଲେଖିଛନ୍ତି ରାଜ୍ୟସଭା ସାଂସଦ । ଶିବସେନା ସାଂସଦ ପ୍ରିୟଙ୍କା ଚତୁର୍ବେଦୀ ଦର୍ଶାଇଛନ୍ତି, ବେଆଇନ ଭାବେ ଭଜା ଚଣା ଓ ଅନ୍ୟ ଖାଦ୍ୟପାନୀୟ ପ୍ରସ୍ତୁତିରେ ଅରାମାଇନ ଭଳି ହାନିକାରକ କେମିକାଲ ମିଶାଇବା ଦ୍ୱାରା କ୍ୟାନ୍ସର ଭଳି ରୋଗ ହୋଇପାରେ ।

ଅରାମାଇନକୁ କପଡ଼ା, ଚମଡ଼ା ରଙ୍ଗ କରିବାରେ ବ୍ୟବହାର କରାଯାଏ । କିନ୍ତୁ କିଛି ଲୋକ ତାହାକୁ ଖାଦ୍ୟ ପଦାର୍ଥରେ ମିଶାଉଛନ୍ତି । ଏଥିଯୋଗୁ କୋଟି କୋଟି ଲୋକଙ୍କ ଜୀବନ ବିପଦରେ ଅଛି । ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ମଧ୍ୟ ଅରାମାଇନକୁ ବିପଜ୍ଜନକ ପଦାର୍ଥ ମାନିଛି । ତେଣୁ ଏ ଦିଗରେ କେନ୍ଦ୍ର ସରକାର ତ୍ୱରିତ ଭିତ୍ତିରେ କଡ଼ା ପଦକ୍ଷେପ ନିଅନ୍ତୁ ବୋଲି ପ୍ରିୟଙ୍କା ଅପିଲ କରିଛନ୍ତି । ଏଥିସହ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସେ ଦାବି କରିଛନ୍ତି ।

ତାଙ୍କ କହିବା କଥା ଜଣେ ଯୁବକ ଏହି ଭିଡିଓ କରି ମାର୍କେଟରେ ମିଳୁଥିବା ଖୋଲା ଭଜା ବୁଟର ପ୍ରସ୍ତୁତିକୁ ଦେଖାଇଛନ୍ତି । ସେ ବିନା ଅପମିଶ୍ରଣରେ ହୋଇଥିବା ବୁଟ ଭଜା ଏବଂ ହାନିକାରକ ମିଶାଯାଇଥିବା ବୁଟକୁ ଦେଖାଇ ସେଥିରେ ଥିବା ପ୍ରାର୍ଥକ୍ୟକୁ ସମ୍ମୁଖକୁ ଆଣିଛନ୍ତି । ମାର୍କେଟରେ ବୁଟକୁ ସାମାନ୍ୟ ହଳଦିଆ ଦେଖାଇବା ଲାଗି ସେଥିରେ ଅରାମାଇନ୍ ନାମକ କେମିକାଲ ମିଶାଯାଉଛି । ଏହି କେମିକାଲ ହଳଦୀର ରଙ୍ଗ ଭଳି ଦେଖାଯାଉଛି । ବୁଟ ଭଜା ଯିବା ପରେ ସେଥିରେ ଅରାମାଇନ୍ ଗୁଣ୍ଡକୁ ପାଣିରେ ମିଶାଇ ହଳଦୀ ପାଣି ପରି ବୁଟରେ ଢଳା ଯାଉଛି ।

ଏହା ଦ୍ୱାରା ବୁଟ ବା ଚଣା ସତେଜ ଦେଖାଯାଉଛି । କିନ୍ତୁ ବିନା କେମିକାଲରେ ଭଜା ଯାଇଥିବା ବୁଟ ତାହାଠାରୁ ଭିନ୍ନ ଦେଖାଯାଉଥିବା ଯୁବକ ଜଣକ ଭିଡିଓରେ ଦେଖାଇଛନ୍ତି । କେମିକାଲ ମିଶ୍ରିତ ବୁଟ ଦୀର୍ଘ ଦିନ ଖାଇବା ଦ୍ୱାରା କ୍ୟାନ୍ସର ଭଳି ଗୁରୁତର ସ୍ୱାସ୍ଥ୍ୟ ସମସ୍ୟା ଦେଖାଦେଇପାରେ ବୋଲି ଏଥିରେ ସେ ଚେତାଇଛନ୍ତି ।

ଏହାର ସେବନ ଯକୃତ, ବୃକକ୍ ଏବଂ ମୂତ୍ରାଶୟ କର୍କଟ ରୋଗର ବିପଦକୁ ବୃଦ୍ଧି କରେ। ଏହା ସ୍ନାୟୁତନ୍ତ୍ର ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଅଙ୍ଗକୁ ମଧ୍ୟ କ୍ଷତି ପହଞ୍ଚାଇପାରେ। ଭାରତରେ, ଖାଦ୍ୟ ସୁରକ୍ଷା ଏବଂ ମାନକ ଆଇନ, ୨୦୦୬ ଅନୁଯାୟୀ ଖାଦ୍ୟରେ ଶିଳ୍ପ ରଙ୍ଗର ବ୍ୟବହାର ସମ୍ପୂର୍ଣ୍ଣ ନିଷିଦ୍ଧ। ଏହା ସତ୍ତ୍ୱେ, ତଦାରଖ ଅଭାବରୁ ଅବୈଧ ବାଣିଜ୍ୟ ଜାରି ରହିଛି।