ଜଙ୍ଗଲ ବିଭାଗରେ ଥର୍ ଗାଡ଼ି କିଣାର ହେବ ତଦନ୍ତ, ଦୋଷୀଙ୍କ ବିରୁଦ୍ଧରେ ହେବ ଆକ୍ସନ

ଭୁବନେଶ୍ଵର: ଜଙ୍ଗଲ ବିଭାଗରେ ଥର୍ କିଣାର ହେବ ତଦନ୍ତ । ୨୦୨୪-୨୫ ଆର୍ଥିକ ବର୍ଷରେ ଜଙ୍ଗଲ ବିଭାଗ ପକ୍ଷରୁ ୫୧ଟି ମହିନ୍ଦ୍ରା ଥର୍ ଗାଡ଼ି କିଣାଯାଇ ୨୨ଟି ବନଖଣ୍ଡକୁ ଦିଆଯାଇଥିଲା | ତେବେ ଏହି ଥର ଗାଡି କିଣାରେ ଖର୍ଚ୍ଚ ଠାରୁ ଆରମ୍ଭ କରି ଏହାର ମୋଡିଫିକେସନ ପର୍ଯ୍ୟନ୍ତ ଖର୍ଚ୍ଚ ହୋଇଥିବା ଟଙ୍କାକୁ ନେଇ ଉଠିଛି ପ୍ରଶ୍ନ | ଏନେଇ ମୁହଁ ଖୋଲି କହିଛନ୍ତି ଜଙ୍ଗଲ ଓ ପରିବେଶ ବିଭାଗ ମନ୍ତ୍ରୀ । କହିଛନ୍ତି ଥର୍ ଗାଡ଼ି କିଣାରେ ଯଦି ଆବଶ୍ୟକ ଠାରୁ ଅଧିକ ଖର୍ଚ୍ଚ ହୋଇଥାଏ ତାହେଲେ ଏହାର ତଦନ୍ତ କରାଯାଇ ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ଜଙ୍ଗଲ ବିଭାଗରେ ଥର୍ ଗାଡ଼ି କିଣାର ହେବ ତଦନ୍ତ । ଆବଶ୍ୟକତା ଠାରୁ ଅଧିକ ଖର୍ଚ୍ଚ ହୋଇଛି କି ? କାହା ପକେଟକୁ ଯାଇଛି କି ଗାଡ଼ି କିଣାର କମିଶନ୍ ? ଏମିତି ଅନେକ ପ୍ରଶ୍ନର ଉତ୍ତର ଖୋଜିବାକୁ ହେବ ତଦନ୍ତ । ୨୦୨୪-୨୫ ଆର୍ଥିକ ବର୍ଷରେ ଜଙ୍ଗଲ ବିଭାଗ ପକ୍ଷରୁ ୫୧ଟି ମହିନ୍ଦ୍ରା ଥର୍ ଗାଡ଼ି କିଣାଯାଇ ୨୨ ଟି ବନଖଣ୍ଡକୁ ଦିଆଯାଇଥିଲା | ତେବେ ଏହି ଥାର ଗାଡି କିଣାରେ ଖର୍ଚ୍ଚ ଠାରୁ ଆରମ୍ଭ କରି ଏହାର ମୋଡିଫିକେସନ ପର୍ଯ୍ୟନ୍ତ ଖର୍ଚ୍ଚ ହୋଇଥିବା ଟଙ୍କାକୁ ନେଇ ଉଠିଛି ପ୍ରଶ୍ନ | ୫୧ଟି ମହିନ୍ଦ୍ରା ଥର ଗାଡି କିଣିବା ପାଇଁ ୭ କୋଟି ୧୪ ଲକ୍ଷ ୭୦ ହଜାର ୨୭୮ ଟଙ୍କା ଖର୍ଚ୍ଚ ହୋଇଥିଲା | ଆଉ ଏସବୁ ଗାଡ଼ିର ମୋଡିଫିକେସନ ବାବଦରେ ୫ କୋଟି ୨ ଲକ୍ଷ ୪୭ ହଜାର୬୯୬ ଟଙ୍କା ଖର୍ଚ୍ଚ ହୋଇଛି |

ତେବେ ଏହାକୁ ନେଇ ପ୍ରଶ୍ନ ଉଠାଇଛନ୍ତି ବନ୍ୟ ପ୍ରାଣୀ ବିଶେଷଜ୍ଞ | ଗୋଟିଏ ଗାଡ଼ି ପିଛା ୧୪ ଲକ୍ଷରୁ ଅଧିକ ଟଙ୍କାରେ କିଣାଗଲା | ସେଇ ନୂଆ ଗାଡ଼ି ଗୁଡ଼ିକ ମୋଡିଫିକେସନ ପାଇଁ ପୁଣି ଖର୍ଚ୍ଚ ହେଲା ୫ କୋଟିରୁ ଅଧିକ ଟଙ୍କା | ଅର୍ଥାତ ଗୋଟିଏ ଗାଡ଼ିର ମୋଡିଫିକେସନ ପାଇଁ ୧୦ ଲକ୍ଷରୁ ଅଧିକ ଟଙ୍କା ଖର୍ଚ୍ଚ କରାଯାଇଛି । ଏତେ ଦାମୀ ଗାଡି କିଣିବାର କାହିଁକି ଆବଶ୍ୟକତା ପଡିଲା ? ମୋଡିଫିକେସନର ଆବଶ୍ୟକତା କଣ ଥିଲା ? ଏବଂ ମୋଡିଫିକେସନରେ ପ୍ରକୃତରେ କେତେ ଟଙ୍କା ଖର୍ଚ୍ଚ ହୋଇଛି ? ଏଥିରେ ଦୁର୍ନୀତିର ଗନ୍ଧ ବାରିବା ସହ ଏସବୁର ତଦନ୍ତ ପାଇଁ ଦାବି କରିଛନ୍ତି ବନ୍ୟ ପ୍ରାଣୀ ବିଶେଷଜ୍ଞ ।

ସେପଟେ ଥର୍ ଗାଡ଼ି କିଣାକୁ ନେଇ ଏଭଳି ଅଭିଯୋଗ ଆସିବା ପରେ ଜଙ୍ଗଲ ଓ ପରିବେଶ ବିଭାଗ ମନ୍ତ୍ରୀ ଗଣେଶ ରାମସିଂ ଖୁଣ୍ଟିଆ କହିଛନ୍ତି ଯେ, ଗାଡ଼ିଗୁଡ଼ିକର ମୋଡିଫିକେସନ ଆବଶ୍ୟକତା ଥିବା ଦୃଷ୍ଟିରୁ ହୋଇ ଥାଇପାରେ, କିନ୍ତୁ ଯଦି ଆବଶ୍ୟକତା ଠାରୁ ଅଧିକ ଖର୍ଚ୍ଚ ହୋଇଥାଏ ତାହେଲେ ଏହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ । ଏହି ଗାଡି ଗୁଡ଼ିକ ଏବେ ସମସ୍ତ PCCFଙ୍କ ଅଧୀନରେ ଅଛି |

ଜଙ୍ଗଲ ବିଭାଗରେ କିଣାଯାଇଥିବା ଥର୍ ଗାଡ଼ିଗୁଡ଼ିକୁ ଅଗ୍ନି ପ୍ରଶମନ, ରାସ୍ତା ଘାଟ ନଥିବା ଉପାନ୍ତ ଓ ଦୁର୍ଗମ ଅଞ୍ଚଳରେ ବନ କର୍ମଚାରୀ ଓ ସ୍କ୍ୱାର୍ଡଙ୍କ ନିୟୋଜନ ପାଇଁ ବ୍ୟବହାର କରାଯାଇଥାଏ | ସେହିଭଳି ବନ୍ୟଜନ୍ତୁ ସୁରକ୍ଷା, ଅନିୟମିତ କାର୍ଯ୍ୟ ଉପରେ ନିୟନ୍ତ୍ରଣ, ବାଘ ଏବଂ ଅନ୍ୟାନ୍ୟ ବନ୍ୟଜନ୍ତୁଙ୍କ ଚଳପ୍ରଚଳ ନିରୀକ୍ଷଣ ଓ ଉଦ୍ଧାର ଆଦି କାର୍ଯ୍ୟରେ ବ୍ୟବହାର କରିବା ପାଇଁ ଗାଡିକୁ ବ୍ୟବହାର କରାଯାଉଛି | ତେବେ ଗାଡ଼ି କିଣା ଖର୍ଚ୍ଚକୁ ନେଇ ତଦନ୍ତ ହେଲେ ଏଥିରେ କେତେ ଟଙ୍କା ହେରଫେର୍ ହୋଇଛି ତାହା ପଦାକୁ ଆସିବ ।